ཕྱི་ལོ་ ༢༠༢༠ ཟླ་ ༡༢ ཚེས་ ༧ རེས་གཟའ་ཟླ་བ།
༄༅། །ཕྱི་ལོ་ ༢༠༢༠ ཟླ་ ༡༢ ཚེས་ ༠༣ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༣༦ དེ་སྤེལ་ཡོད་པ་དང་། གསལ་བསྒྲགས་ཞུ་མཁན་འཕྲོད་བསྟེན་ལས་ཁུངས་ཀྱི་དྲུང་གཞོན་ཉི་མ་རྒྱལ་མཚན་ལགས་དང་། བོད་ལུགས་སྨན་པ་ཚེ་རིང་མཚམས་གཅོད་ལགས། ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་བཅས་ཡིན།
དང་པོ། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་གཞོན་ཉི་མ་རྒྱལ་མཚན་ལགས་ནས་དོན་ཚན་གསུམ་གྱི་ཐོག་གསལ་བཤད་ཞུ་རྒྱུའི་དང་པོ། ད་ལྟའི་ནད་ཡམས་འདི་སྤྱི་ཚོགས་དང་གྲོང་སྡེ་སོ་སོའི་ནང་སྔོན་འགོག་དང་ནད་ཡམས་ཁྱབ་གདལ་བཀག་འགོག་ཆེད་ང་ཚོ་ཚང་མས་མཉམ་འགན་མཉམ་འཁུར་ཞུ་རྒྱུ་གལ་ཆེ། དེ་ཡང་སྒྲིག་འཛུགས ཙམ་མིན་པར་ཚོགས་པ་ཁག་དང་། ལྷག་པར་དུ་གང་ཟག་མི་ར་ངོ་རེ་ནས་འགན་འཁུར་རྒྱུ་ཧ་ཅང་གལ་ཆེན་པོ་རེད། དེ་འང་སྔོན་འགོག་གི་ཐབས་ལམ་རྣམས་དཀའ་ལས་ཁག་པོ་དེ་འདྲ་མིན་པས་རྒྱུན་དུ་ཁ་རས་གྱོན་ཡས། མིའི་དབར་རྒྱང་ཐག་འཇོག་ཡས། འདུ་འཛོམས་སར་མ་ཕེབས་ཡས་དེ་དག་རེད། ཐབས་ལམ་དེ་རྣམས་བསྟེན་ན་མང་ཚོགས་ནང་ནད་ཡམས་ཁྱབ་གདལ་བཀག་འགོག་ཐུབ། དོན་ཚན་གཉིས་པ་དེ་གང་ཟག་ཅིག་ལ་ནད་གཞི་འདི་ཕོག་ཚེ་སྤྱི་ཚོགས་ནང་མི་མང་ནས་གཟིགས་སྟངས་དེ་དབྱེ་འབྱེད་ལྟ་བུ་མིན་པར་གཅིག་གིས་ཅིག་ལ་ཁ་དཀྲིས་ཡས་སོགས་གནང་ན་ཡག་པོ་མི་འདུག་པས་དེས་ནད་གཞི་ཕོག་པའི་མི་དང་འབྲེལ་གཏུག་བྱུང་མི་རྣམས་རྩད་གཅོད་སྐབས་སྦ་གསང་བྱེད་པ་སོགས་ཡོང་གི་འདུག་དེ་འདྲ་མ་གནང་བར་གཅིག་གིས་ཅིག་ལ་རོགས་ཕན་དང་རྒྱབ་སྐྱོར་གང་ཐུབ་གནང་གལ་ཆེ། ལྷག་པར་དུ་ད་ཆ་རྒྱ་གར་དང་ཕྱི་རྒྱལ་ཡུལ་གྲུ་ཁག་ཏུ་ནད་ཡམས་ཀྱི་རྦ་རླབས་གཉིས་པ་རྒྱག་ཉེན་ཡོད་པའི་འདི་སྐབས་ཚང་མས་རྒྱབ་སྐྱོར་དང་གཟབ་གཟབ་གནང་རྒྱུ་ཤིན་ཏུ་གལ་ཆེ། དོན་ཚན་གསུམ་པ་དེ་ནད་གཞི་ཕོག་པའི་རྗེས་སྨན་བཅོས་དང་འབྲེལ་གལ་ཏེ་འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་གི་ཚོགས་མིའི་ཁོངས་ཡིན་ན་ད་ལྟའི་ཛ་དྲག་ཏོག་དབྱིབས་གཉན་རིམས་༡༩ ཕོག་པ་མང་པོ་བྱུང་བ་རྣམས་ལ་ཐུགས་ཕན་གསོས་ཡོད། ད་ལན་འདིར་ཞུ་དགོས་དོན་གཙོ་བོ་དེ་ད་ལྟའི་སྨན་བཅོས་ལྟ་སྐྱོང་གི་ལས་གཞི་འདི་འཕྲོད་བསྟེན་ལས་ཁུངས་ཀྱི་ལས་གཞི་གལ་ཆེ་ཞིག་ཡིན་ལ་འདི་མི་མང་ལ་ཁ་ཡོད་ལག་ཡོད་ཀྱིས་ཕན་ཐོགས་ཆེན་པོ་ཡོད་པའི་ལས་གཞི་ཞིག་ཡིན། བྱས་ཙང་ནད་ཡམས་འདི་འདྲའི་སྐབས་སྨན་བཅོས་ཆེད་སྨན་བཅོས་ལྟ་སྐྱོང་གི་ལས་གཞིའི་འོག་ཁྱད་ཕན་ཐོབ་ཚད་ལྟར་ཐོབ་ཀྱི་ཡོད་ན་ད་ལན་གསར་འགོད་གསལ་བསྒྲགས་འདི་བརྒྱུད་ནས་མི་མང་ལ་སྨན་བཅོས་ལྟ་སྐྱོང་གི་ཚོགས་མིར་འཛུལ་བཞུགས་བྱ་རྒྱུའི་དུས་ཚོད་འདི་ཕྱི་ཟླ་དང་པོ་དང་གཉིས་པ་གསུམ་པ་བར་ཡིན་ཞིང་སོ་སོའི་ས་གནས་ལ་འགོ་འཛུགས་བྱེད་ཀྱི་ཡོད་པས་དེ་དོན་མང་ཚོགས་ནས་མཁྱེན་རྟོགས་སླད་ཞུས་པ་ཡིན།
གཉིས་པ། ལས་དོན་ཚོགས་ཆུང་གི་གསར་འགོད་འབྲེལ་མཐུད་སྨན་པ་ཚེ་རིང་མཚམས་གཅོད་ཀྱིས་འདས་པའི་བདུན་ཕྲག་ཅིག་ནང་ཚོགས་ཆུང་གི་གྲུབ་ཐོན་མདོར་བསྡུས་ཞུས་དོན། འདས་པའི་བདུན་ཕྲག་ནང་ཁྱོན་བོད་མི་གྲངས་༥༡༩ ༼རང་ཁྱིམ།༣༦༢ སྒྲིག་འཛུགས་ནས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་༢༡༦༽ འགོག་དབྱེ་ཟུར་བཀག་ཐོག་བཞུགས་ཡོད་པ་དང་། སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་ནང་ནད་གཞི་ཕོག་པའི་མི་གྲངས་༤༠ ལ་ཁ་པར་ཐོག་འབྲེལ་བ་གནང་བ་བརྒྱུད་སེམས་ཁམས་འཕྲོད་བསྟེན་ཐོག་སློབ་གསོ་ལམ་སྟོན་གནང་བ་དང་། ནད་ཡམས་ཁྱབ་གདལ་བཀག་འགོག་ཆེད་ས་གནས་སུ་ནད་གཞི་ཕོག་ཡོད་མེད་བརྟག་དཔྱད་བྱེད་བཞིན་ཡོད་པས་འདས་པའི་བདུན་ཕྲག་ཅིག་ནང་རྒྱ་གར་ནང་གི་ས་གནས་གྲངས་༢༠ ནང་ཁྱོན་མི་གྲངས་༡༡༤༠ ལ་བརྟག་དཔྱད་གནང་ཡོད་པ་དང་། བལ་ཡུལ་ནང་གི་ས་གནས་གྲངས་༤ ནང་ཁྱོན་མི་གྲངས་༤ ལ་བརྟག་དཔྱད་གནང་ཡོད། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ལམ་སྟོན་གནང་བ་བཞིན་བོད་མིའི་འདུ་སྡོད་ས་གནས་གཞིས་ཆགས་ཁག་ལ་ནད་ཡམས་ཁྱབ་གདལ་བཀག་འགོག་ཆེད་ས་གནས་སྨན་ཁང་གཙོས་མི་མང་འདུ་འཛོམས་ཆེ་སར་དུག་སེལ་གནང་ཡས་དང་དེ་བཞིན་ནད་གཞི་ཕོག་པའི་ས་འཁོར་དུ་དུག་སེལ་གནང་ཡས་མཚོན་ཛ་དྲག་ཚོགས་ཆུང་གི་ཚོགས་འདུ་དུས་ཐོག་བསྐོང་ཚོགས་ཐོག་ལས་དོན་མུ་མཐུད་འགྲོ་བཞིན་པའི་གནས་ཚུལ་ཞུ།
གསུམ་པ།
བཙན་བྱོལ་བོད་མིའི་སྤྱི་ཚོགས་ཁྲོད་གནས་སྟངས་ཇི་ཆགས་ཐད་འདས་པའི་བདུན་ཕྲག་ཅིག་གི་ནང་རྒྱ་གར་དང་བལ་ཡུལ་ནང་གི་བོད་མིའི་གཞིས་ཆགས་ཏུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༤༧ བྱུང་། ཞིབ་ཕྲ་ནི། ལ་དྭགས་ཁུལ་ནས་མི་གྲངས།༡༨ ལྡི་ལི་ཁུལ་ནས་མི་གྲངས།༤ བདེ་སྐྱིད་གླིང་གཞིས་ཆགས་ནས་མི་གྲངས།༨ མོན་གྷོ་གཞིས་ཆགས་ནས་མི་གྲངས།༢ རཱ་ཇི་པུར་གཞིས་ཆགས་ནས་མི་གྲངས།༣ བན་དྷཱ་རཱ་གཞིས་ཆགས་ནས་མི་གྲངས།༡ སྦེལ་ཀོབ་གཞིས་ཆགས་ནས་མི་གྲངས།༡ ཀེལ་མན་ཊོན་གཞིས་ཆགས་ནས་མི་གྲངས།༡ མེན་པཱཊ་གཞིས་ཆགས་ནས་མི་གྲངས།༨ བཅས་རྒྱ་གར་ནང་མི་གྲངས་༤༦ བྱུང་ཡོད་པ་དང་བལ་ཡུལ་ཀཐ་མན་ཌུ་ཁུལ་ནས་མི་གྲངས་༡ བཅས་ཁྱོན་བསྡོམས་པས་མི་གྲངས་༤༧ བྱུང་བ་ལས་དགུང་ན་མཐོ་ཤོས་དེ་༩༢ དང་ཆུང་ཤོས་དེ་ལོ་༦ ཡིན་པ་རེད། དེའི་ནང་ནས་སྐྱེས་པ་གྲངས་༡༩ དང་བུད་མེད་གྲངས་༢༨ ནད་རྟགས་ཅུང་མངོན་པ་མི་གྲངས་༢༦ དང་ནད་རྟགས་མེད་པ་མི་གྲངས།༢༡ ཡིད་སྐྱོའི་གནས་ཚུལ་ཞིག་ལ་འདས་པའི་བདུན་ཕྲག་ནང་ལ་དྭགས་ཁུལ་ནས་སྐྱེས་པ་རང་ལོ་༨༧ དང་རང་ལོ་༦༥ སོན་པ་ཅིག་དང་། ཧོན་སུར་རབ་རྒྱས་གླིང་གཞིས་ཆགས་ནས་སྐྱེས་པ་རང་ལོ་༨༨ སོན་པ་གཅིག་བཅས་མི་གྲངས་གསུམ་འདས་གྲོངས་སོང་ཡོད། ད་བར་རྒྱ་གར་དང་བལ་ཡུལ་ནང་ཁྱོན་བོད་མི་ནད་གཞི་ཕོག་པ་གྲངས་༡༣༢༡ དྲག་སྐྱེད་བྱུང་བ་མི་གྲངས། ༡༡༥༤ འདས་གྲོངས་སོང་བ་མི་གྲངས།༣༤ ད་ལྟ་ནད་མནར་བཞིན་པ་མི་གྲངས།༡༣༣ བཅས་བྱུང་བའི་གནས་ཚུལ་ཞུ། ནད་གཞི་ཕོག་པ་རྣམས་ས་གནས་ཛ་དྲག་ཚོགས་ཆུང་གི་ལམ་སྟོན་འོག་ཟུར་བཀག་ཐོག་བཞུགས་ཡོད་པའི་གནས་ཚུལ་ཞུ།
གསུམ་པ། མི་མང་ལ་ཐུགས་སྣང་ལམ་སྟོན་ཞུ་རྒྱུ་གཙོ་བོ་ད་ཆ་འཛམ་གླིང་ཁྱོན་ཡོངས་ནང་ནད་གཞི་ཕོག་པ་གྲངས་ས་ཡ་༦༣ ལྷག་བརྒལ་ཡོད་པ་དང་། ཨ་རིར་ནད་གཞི་ཕོག་པའི་གྲངས་ཇེ་མང་དུ་སོང་ནས་ད་ཉིན་བར་ས་ཡ་༡༣ ལྷག་བརྒལ་བའི་གནས་སྟངས་དང་། ཡུ་རོབ་རྒྱལ་ཡོངས་ནང་ས་ཡ་༡༩ ལྷག་བརྒལ་ཞིང་གནས་ཡུལ་རྒྱ་གར་ནང་དུའང་ཁྱོན་ནད་གཞི་ཕོག་པ་མི་གྲངས་ས་ཡ་༩ ལྷག་བརྒལ་ཡོད། ཏོག་དབྱིབས་གཉན་རིམས་༡༩ འདི་ཐོག་མར་ཁྱབ་གདལ་བྱུང་ནས་ད་བར་ལོ་ངོ་ཧྲིལ་པོ་གཅིག་འཁོར་ལ་ཉེ་བས་འདས་པའི་ཟླ་༡༡ ལྷག་ཙམ་རིང་ནད་ཡམས་འདིའི་རྐྱེན་པས་མི་མང་པོའི་སེམས་ནང་འཇིགས་དངངས། ཁོང་ཁྲོ། སེམས་ངལ་སེམས་དུབ་ཆེན་པོ་བྱུང་ཡོད་ཅིང་། དམིགས་བསལ་འཕྲོད་བསྟེན་ཞབས་ཞུ་བ་རྣམས་ལ་ལུས་སེམས་གཉིས་ཀའི་ཐོག་ནས་དཀའ་ངལ་དང་ཆེད་ལས་མི་སྣ་མང་དག་གི་ཚེ་སྲོག་ཀྱང་ཕྱིན་ཡོད་ལ་ད་ལྟའང་སྨན་པ་སྨན་ཞབས་མང་པོ་སྨན་ཁང་ནང་ནད་པར་དངོས་སུ་སྨན་བཅོས་གཅེས་སྐྱོང་གནང་བཞིན་ཡོད་པ་དང་། འཕྲོད་ལས་པ་མང་དག་ཅིག་མི་མང་གི་འཕྲོད་བསྟེན་བདེ་འཇགས་སྤྱི་དང་ཡང་སྒོས་ནད་ཡམས་སྔོན་འགོག་དང་ཁྱབ་གདལ་བཀག་འགོག་ཆེད་ས་གནས་མི་མང་ལ་སློབ་གསོ་ལམ་སྟོན་གནང་ནས་བཞུགས་ཡོད། ལྷག་པར་འདི་ལོ་ནད་ཡམས་ཀྱི་རྐྱེན་པས་གཞུང་འཛིན་མི་སྣ་དང་། འཕྲོད་བསྟེན་འབྲེལ་ཡོད་སྒྲིག་འཛུགས་དང་ཚོགས་པ་མང་པོས་སོ་སོའི་འབངས་མི་རྣམས་ཀྱི་བདེ་འཇགས་སྲུང་སྐྱོབ་ཆེད་ཁྲིམས་སྒྲིག་དང་སྲིད་བྱུས་གཏན་འབེབས་ལག་བསྟར། དུས་ནས་དུས་སུ་ལམ་སྟོན་བཀོད་ཁྱབ་གནང་བཞིན་ཡོད།
བོད་མིའི་སྒྲིག་འཛུགས་ནས་ཀྱང་ནད་ཡམས་འདི་ཐོག་མར་བྱུང་བ་ནས་མང་ཚོགས་ལ་གོ་རྟོགས་དང་སྔོན་འགོག་ཐབས་ལམ་རྣམས་ངོ་སྤྲོད་གནང་བ་དང་ཟླ་༣ པའི་ནང་གནས་ཡུལ་རྒྱ་གར་ནང་ཁྱབ་གདལ་སྒོ་འཛུགས་སྐབས་ཏེ་ཟླ་༣ ཚེས་༡༩ ཉིན་ལས་དོན་ཚོགས་ཆུང་ཟུར་འཛུགས་དང་དེ་ནས་རིམ་པས་དབུས་དང་ས་གནས་སུ་ཛ་དྲག་ཚོགས་ཆུང་བསྐོས་འཛུགས་ཀྱིས་ད་བར་བདུན་ཕྲག་༣༦ ཉིན་གྲངས་༢༥༠ ཙམ་རིང་འབྲེལ་ཡོད་ལས་མི་དང་བོད་མི་དོ་བདག་སོ་སོ་བཅས་ནས་ཐུགས་འགན་ཆེར་བཞེས་ཀྱིས་བཀོད་ཁྱབ་ལམ་སྟོན་ལ་བརྩི་སྲུང་དངས་ལེན་ཞུས་དང་ཞུ་མུས་ཡིན། ད་དུང་ཡིན་ནས་སྔོན་འགོག་སྨན་ཁབ་མ་ཐོན་བར་སྤྱི་སྒེར་གཉིས་སྨན་སླད་ཐུགས་སྣང་འགན་འཁུར་གང་ལེགས་གནང་དགོས་པའི་རེ་སྐུལ་ཞུ། འདས་པའི་ཟླ་༡༡ ཙམ་རིང་རྒྱལ་སྤྱིའི་འཕྲོད་བསྟེན་སྒྲིག་འཛུགས་གཙོས་རྒྱལ་ཁབ་རིམ་པའི་སྲིད་གཞུང་དང་། ཆེད་ལས་སྨན་པ། ཉམས་ཞིབ་པ་བཅས་ཆེད་གཉེར་མང་པོས་ཏོག་དབྱིབས་གཉན་རིམས་༡༩ སྔོན་འགོག་སྨན་ཁབ་ཐད་ཚོད་ལྟ་དང་ཉམས་ཞིབ་རབ་རིམ་མང་པོ་ཕྱིན་པས་ད་ལན་བདུན་ཕྲག་འདིའི་ནང་Pfizer BioNTech སྨན་རྫས་བཟོ་བསྐྲུན་ཁང་ནས་སྦྱོར་བཟོ་བྱས་པའི་སྔོནའགོག་སྨན་ཁབ་དེ་ཨིན་ཡུལ་གཞུང་གིས་མི་མང་ལ་རྒྱག་ཆོག་པའི་བཀའ་འཁྲོལ་ཐོབ་པ་བྱུང་ཡོད། སྔོན་འགོག་སྨན་ཁབ་དང་འབྲེལ་སྨན་པ་བསྟན་འཛིན་བརྩོན་ལགས་ནས་འགྲེལ་བརྗོད་ཞུ་རྒྱུ་དང་ཆབས་ཅིག འདི་ག་ཧི་མཱ་ཅལ་ཁུལ་དུ་ད་ཆ་ཕྱི་མི་འགྲུལ་བཞུད་བྱེད་མཁན་དང་ཡུལ་འཁོར་སྤྲོ་འཆམ་པ་མང་དུ་འགྲོ་བཞིན་ཟ་ཁང་དང་། མགྲོན་ཁང་ནང་གི་ལས་མི་ཁག་ཅིག་ལ་ནད་གཞི་ཕོག་པའི་གནས་ཚུལ་ཐོན་བཞིན་ཡོད་པས་དེའི་སྐོར་སྨན་པ་བརྩོན་འགྲུས་ནས་ལམ་སྟོན་གནང་རྒྱུ་ཡིན།
དེ་རྗེས་སྨན་པ་བསྟན་འཛིན་བརྩོན་འགྲུས་ལགས་ནས་ལམ་སྟོན་གནང་དོན། ཉེ་བའི་ཆར་ཧི་མཱ་ཅལ་མངའ་སྡེའི་སིམ་ལ་རྫོང། ཀངྒ་ར་རྫོང་། མཎ་ཌི་རྫོང་ནང་ཀོ་ཝིཌ་༡༩ ནད་གཞི་ཕོག་པའི་མི་གྲངས་དེ་འཕར་འགྲོ་ཡི་འདུག དེ་ཡང་ཟ་ཁང་དང་མགྲོན་ཁང་ནང་ལས་བཞིན་པའི་ལས་མི་འགའ་ཤས་ལ་ཐོན་འདུག ང་ཚོ་བོད་མི་མང་པོ་ཅིག་ཚོང་ལས་རྣམས་ཡུལ་འཁོར་སྤྲོ་འཆམ་དང་འབྲེལ་བ་ཆེན་པོ་ཡོད་དུས་འབྲེལ་ཡོད་ཚང་མས་གཟབ་གཟབ་གནང་རོགས་ཞུ། དེ་ནས་རྒྱ་གར་ལྷོ་ཕྱོགས་ཀར་ཎ་ཊ་ཀ་ཁུལ་དུ་ད་ཆ་གནས་སྟངས་བཟང་དུ་འགྲོ་བཞིན་འདུག ནད་གཞི་གསར་པ་ཕོག་མཁན་གྲངས་ཉུང་དུ་འགྲོ་བཞིན་འདུག འོན་ཀྱང་ཉམས་ཞིབ་པ་མང་པོ་གཅིག་གིས་འོང་རྒྱུའི་ཕྱི་ཟླ་དང་པོ་དང་གཉིས་པའི་ནང་ནད་ཡམས་ཀྱི་རྦ་རླབས་གཉིས་པ་དེ་སླེབ་རྒྱུའི་ཉེན་ཁ་ཡོད་པ་ཚོད་དཔག་བྱེད་ཀྱི་འདུག
དེ་ཡིན་དུས་ལྷོ་ཕྱོགས་ལ་བཞུགས་མཁན་རྣམས་ལ་འདས་པའི་ཟླ་བ་ཁ་ཤས་ནང་དཀའ་ངལ་ཆེན་པོ་བྱུང་ཡོད་རེད་དེ་ད་ཆ་གནས་སྟངས་བཟང་དུ་འགྲོ་ཡོད་དུས་མང་ཚོགས་ནས་ལྷོད་གཡེང་དང་རྣམ་གཡེང་མ་གནང་རོགས། དེ་ལྟར་ལྷོད་གཡེང་གནང་ཚེ་ད་དུང་དཀའ་ངལ་ཆེན་པོ་འཕྲད་ཉེན་འདུག དེ་ཡིན་དུས་ད་ལྟའི་གནས་སྟངས་བཟང་པོ་ཡོད་པ་དེ་མུ་མཐུད་ནས་གནས་རྒྱུར་ཁ་རས་གྱོན་ཡས། མིའི་དབར་རྒྱང་ཐག་འཇོག་རྒྱུ། གལ་ཆེ་དོན་ཆེན་མེད་ན་ཕྱིར་མ་ཕེབས་རོགས་ཅེས་འབོད་སྐུལ་ཞུ། ཡང་ད་ལྟའི་ཆར་རྣམ་པ་ཚོས་གསར་འགྱུར་རྒྱུད་ལམ་ནང་གསན་གྱི་ཡོད་པ་བཞིིན་ཏོག་དབྱིབས་གཉན་རིམས་༡༩ སྔོན་འགོག་སྨན་ཁབ་དང་འབྲེལ་ད་ཆ་ Pfizer BioNTech ཞེས་སྔོན་འགོག་སྨན་ཁབ་དེ་བརྒྱ་ཆ་༩༠་་༩༥ ཙམ་ཕན་ཐོགས་འདུག་ཅེས་བཤད་ཡོད་ཀྱང་ད་ཆ་ཉམས་ཞིབ་པའི་ཡིག་ཆར་ཞིབ་ཕྲ་དཔྱད་པ་བྱེད་བཞིན་པའི་གནས་སྟངས་རེད་འདུག སྔོན་འགོག་སྨན་ཁབ་དེ་ད་ཆ་ཨིན་ཇི་རྒྱལ་ཁབ་ནས་མང་ཚོགས་ལ་སྨན་ཁབ་དེ་རྒྱག་རྒྱུའི་ཆོག་ཆན་སྤྲོད་ཡོད་པའི་གནས་ཚུལ་འདུག དེ་ཡིན་ནས་འོང་རྒྱུའི་བདུན་ཕྲག་གཅིག་གཉིས་ནང་མང་ཚོགས་ནང་སྔོན་འགོག་སྨན་ཁབ་རྒྱག་རྒྱུའི་སྒོ་འཛུག་ཞུ་འཆར་འདུག དེ་འབྲེལ་ང་ཚོའི་ངོས་ནས་སྔོན་འགོག་སྨན་ཁབ་དེ་མང་ཚོགས་ནང་རྒྱབ་ནས་ག་ཚད་ཙམ་གྱིས་ཕན་ཐོགས་ཡོད་མེད་བལྟ་རྒྱུའི་གོ་སྐབས་ཡོད་པ་རེད། ངཚོའི་ངོས་ནས་དངང་ཚབ་བྱེད་དགོས་དོན་མིན་འདུག གལ་ཏེ་སྔོན་འགོག་སྨན་ཁབ་དེ་རག་པ་ཡིན་ནས་དེར་ཆ་རྐྱེན་མང་པོ་ཚང་དགོས་ཀྱི་འདུག ཁབ་དེ་ཉར་ཚག་ཆེད་གྲང་གློག་གི་ཤུགས་ཚད་ཀླད་སྐོར་འོག་གི་གི་གྲངས་༧༠ ཙམ་དགོས་ཀྱི་ཡོད།
ད་ལྟའི་ཆར་རྒྱ་གར་ནང་འདི་ལྟའི་ཆ་རྐྱེན་མེད་པ་རེད། དེར་རྟེན་སྔོན་འགོག་སྨན་ཁབ་རག་པ་ཡིན་ནས་དེ་ཚོར་དཀའ་ངལ་ཡོད། དེ་ལས་ང་ཚོའི་ངོས་ནས་ད་ལྟ་རྒྱ་གར་ནང་ལ་ Oxford-AstraZeneca vaccine སྔོན་འགོག་སྨན་ཁབ་དེ་ཚོ་ཉར་ཚག་གི་གྲང་གློག་གི་གྲང་ཚད་དེ་༢་་༨ ཏེ་ནམ་རྒྱུན་གྱི་འཁྱག་སྒམ་གྱི་གྲང་ཚད་འོག་བཞག་ན་བཞག་ཐུབ་པ་ཡིན་པས་སྔོན་ཁབ་དེ་རེ་བ་ཆེ་བའི་བཟོ་འདུག ད་ལྟའི་ཆར་སྔོན་འགོག་སྨན་ཁབ་འདི་ཡག་པ་རེད་དེ་ཉེས་པ་རེད་ཞུ་ཐག་གཅོད་རྒྱུ་གང་ཡང་མེད་པ་རེད། སྐབས་དང་དུས་ཀྱི་གནས་སྟངས་ལ་ལྟོས་ནས་གོམ་པ་སྤོ་རྒྱུ་རེད། སྔོན་འགོག་སྨན་ཁབ་དངོས་སུ་རྒྱག་ཐུབ་པར་ད་ལྟ་དུས་ཚོད་ཏོག་ཙམ་འགོར་རྒྱུ་རེད། དེ་མ་སླེབས་བར་ང་ཚོའི་ངོས་ནས་ཁ་རས་གྱོན་ཡས། མིའི་དབར་རྒྱང་ཐག་འཇོག་ཡས། གལ་ཆེ་ཤོས་དེ་སྨན་བཅོས་སོགས་གལ་ཆེའི་ལས་དོན་རྐྱེན་པས་ཕྱིར་འགྲོ་དགོས་འབྱུང་ན་ལས་གཞན་དོན་མེད་ཕྱིར་འགྲུལ་བཞུད་མ་བྱེད་ཡས་དེ་གལ་ཆེན་པོ་ཡིན་པས་དེའི་ཐོག་ཚང་མས་ཐུགས་སྣང་གཟབ་གཟབ་གནང་རོགས་ཅེས་ཞུ་རྒྱུ་ཡིན། ཐུགས་རྗེ་ཆེ། ཚང་མ་ཐུགས་ཅག་གནང་དགོས་ཞུས་པ་བཅས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་༣༦ པ་དེ་མཇུག་སྒྲིལ། །
