ཕྱི་ལོ་ ༢༠༢༠ ཟླ་ ༡༢ ཚེས་ ༡༠ རེས་གཟའ་ཕུར་བུ།
༄༅། །ཕྱི་ལོ་ ༢༠༢༠ ཟླ་ ༡༢ ཚེས་ ༡༠ རེས་གཟའ་ཕུར་བུའི་ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ངོ་ ༣༡ འཁོར་བའི་དུས་ཆེན་གྱི་མཛད་སྒོའི་ཐོག་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་གནང་མཁན་གྱི་ལས་བྱེད་དྲུག་ལ་ཞབས་ལོ་ ༢༥ ཧྲིལ་པོ་འཁོར་བའི་གཟེངས་བསྟོད་ལེགས་སྐྱེས་གནང་བ་རྣམས་ཀྱི་ལོ་རྒྱུས་སྙིང་བསྡུས།
༡ ༽ འཕྲོད་བསྟེན་ལས་ཁུངས་ཁྱབ་ཁོངས་ལས་བྱེད་བསྟན་འཛིན་སྦྱིན་པ་ལགས།
བསྟན་འཛིན་སྦྱིན་པ་ལགས་ཐོག་མར་ཕྱི་ལོ་ ༡༩༩༣ ཟླ་ ༨ ཚེས་ ༤ ཉིན་འཕྲོད་བསྟེན་ལས་ཁུངས་ནས་ཧོན་སུར་ཕན་བདེ་སྨན་ཁང་དུ་སྨན་ཁང་འགན་འཛིན་དུ་བསྐོ་གཞག་གིས་ལས་འཁུར་ཞུས། ཕྱི་ལོ་ ༡༩༩༧ ཟླ་ ༨ ཚེས་ ༡ ནས་བདེ་སྐྱིད་གླིང་འཕྲོད་བསྟེན་སྨན་ཁང་དུ་སྨན་ཁང་འགན་འཛིན་ལས་འགན་ཐོག་གནས་སྤོས་གནང་། ཕྱི་ལོ་ ༢༠༠༣ ཟླ་ ༤ ཚེས་ ༡ ནས་མོན་གྷོ་ DTR སྨན་ཁང་དུ་སྨན་ཁང་འགན་འཛིན་ལས་འགན་ཐོག་གནས་སྤོས་ཀྱིས་ལས་འཁུར་ཞུས། ཕྱི་ལོ་ ༢༠༠༤ ཟླ་ ༡༠ ཚེས་ ༡ ནས་ལོ་གཉིས་རིང་ཕོགས་མེད་གུང་སེང་ཞུས། ཕྱི་ལོ་ ༢༠༠༦ ཟླ་ ༡༡ ཚེས་ ༡ ནས་བདེ་སྐྱིད་གླིང་སྨན་ཁང་འགན་འཛིན་དུ་གནས་སྤོས་གནང་། ཕྱི་ལོ་ ༢༠༡༠ ཟླ་ ༩ ཚེས་ ༢༠ ནས་འཕྲོད་བསྟེན་ལས་ཁུངས་སུ་གནས་སྤོས་ཀྱིས་ཊི་སྦི་ལས་གཞི་དང་། མྱོས་རྫས་ངན་གོམས་ལས་གཞི། དངུལ་གཉེར་གྱི་ལས་འགན་ཐོག་ལས་འཁུར་ཞུས་པས་ད་བར་མི་ལོ་ཧྲིལ་པོ་ ༢༥ འཕྲོད་བསྟེན་ཁྱབ་ཁོངས་དང་དབུས་འཕྲོད་བསྟེན་ལས་ཁུངས་སུ་ཞབས་འདེགས་ཞུས་ཡོད།
༢ ༽ བདེ་ལེགས་སྨན་ཁང་གི་སྨན་ཞབས་བསྟན་འཛིན་ཆོས་སྐྱིད་ལགས།
བདེ་ལེགས་སྨན་ཁང་གི་སྨན་ཞབས་འགོ་པ་བསྟན་འཛིན་ཆོས་སྐྱིད་ལགས་སྨན་ཞབས་སློབ་སྦྱོང་ཐོན་རྗེས་མ་སུ་རི་གཏན་སློབ་ཏུ་ཞབས་ཞུའི་གོ་སྐབས་གནང་ཐོབ་ཀྱིས་ཕྱི་ལོ་ ༡༩༩༢ ཟླ་ ༢ ཚེས་ ༡༥ ནས་ལས་བཅར་འགོ་འཛུགས་ཞུས་པ་དང་། ཕྱི་ལོ་ ༡༩༩༦ ཟླ་ ༡༡ ཚེས་ ༡ ཉིན་ལུགས་མཐུན་རྩ་དགོངས་ཞུས་འཁྲོལ་བྱུང་། ཕྱི་ལོ་ ༡༩༩༨ ཟླ་ ༡༡ ཚེས་ ༡༦ ཉིན་བདེ་ལེགས་སྨན་ཁང་དུ་སྨན་ཞབས་པའིི་ལས་འགན་ཐོག་བསྐོ་གཞག་བྱུང་ཞིང་། ཕྱི་ལོ་ ༢༠༡༣ ཟླ་ ༤ ཚེས་ ༡ ནས་སྨན་ཞབས་འགོ་པར་གནས་སྤར་གྱིས་མུ་མཐུད་ལྷག་བསམ་ཧུར་བསྐྱེད་ཞུ་མུས་ཡིན།
༣། སྨན་རྩིས་ཁང་གི་བདེ་སྲུང་འགན་འཛིན་བཀྲ་ཤིས་ཟླ་བ་ལགས།
བཀྲ་ཤིས་ཟླ་བ་ལགས་ཕྱི་ལོ་ ༡༩༩༣ ཟླ་ ༡༠ ཚེས་ ༡༥ ཉིན་སྨན་རྩིས་ཁང་དུ་འཛུལ་ཞུགས་གནང་སྟེ་སྨན་སྦྱོར་ཁང་དུ་ལས་བཀོད་གནང་། ཕྱི་ལོ་ ༢༠༠༦ ཟླ་ ༥ ཚེས་ ༢༥ ཉིན་སྨན་མཛོད་དང་སྨན་ཚོང་སྡེ་ཚན་གྱི་སྨན་མཛོད་ཟོག་གཉེར་བའི་ལས་རོགས་སུ་གནས་སྤོས། ཕྱི་ལོ་ ༢༠༡༤ ཟླ་ ༧ ཚེས་ ༡ ཉིན་སྨན་རྩིས་ཁང་གི་ཁོར་ཡུག་བདེ་འཇགས་དང་ཉེན་སྲུང་དོ་དམ་པའི་འགན་འཛིན་དུ་བསྐོ་བཞག་གནང་། ཕྱི་ལོ་ ༢༠༡༥ ཟླ་ ༡ ཚེས་ ༡ ཉིན་སྨན་རྩིས་ཁང་གི་ལས་བྱེད་དང་ལས་མི་ཚོམ་བུ་ Job Pool ཡི་འགན་འཛིན་དང་། བདེ་སྲུང་འགན་འཛིན་གཅིག་ལྕོགས་སུ་བསྐོ་བཞག་གནང་། ལས་ཡུན་རིང་སྨན་རྩིས་ཁང་གི་ལས་བྱེད་བདེ་དོན་ཚོགས་ཆུང་གི་ཚོགས་གཙོ་དང་། ཚོགས་མིའི་ཁོངས་སུ་འོས་འདེམས་བྱུང་སྟེ་ལས་འགན་བསྒྲུབས་ཡོད་པ་བཅས་ད་བར་མི་ལོ་ཧྲིལ་པོ་ ༢༥ རིང་སྨན་རྩིས་ཁང་གི་ཞབས་འདེགས་བསྒྲུབས་ཡོད།
༤། གངས་སྐྱིད་ཡན་ལག་སྨན་རྩིས་ལས་སྣེ་བ་ཚེ་རིང་སྒྲོལ་དཀར།
སྨན་རྩིས་ལས་སྣེ་བ་ཚེ་རིང་སྒྲོལ་དཀར་ལགས་སྨན་རྩིས་ཁང་དུ་ལས་ཞུགས་གནང་སྟེ་ཕྱི་ལོ་ ༡༩༩༥ ཟླ་ ༡ ཚེས་ ༡ ཉིན་བལ་ཡུལ་སྤོག་ར་བཀྲ་ཤིས་དཔལ་འཁྱིལ་ཡན་ལག་སྨན་ཁང་གི་སྨན་སྤྲོད་པའི་ལས་འཁུར་ཞུས། ཕྱི་ལོ་ ༡༩༩༥ ཟླ་ ༠༨ ཚེས་ ༠༡ ནས་བལ་ཡུལ་རྒྱལ་སར་ཆ་ཏ་སྤ་ཀྲི་ཡན་ལག་སྨན་ཁང་གི་རྩིས་པའི་ལས་འགན་དུ་གནས་སྤོས་གནང་། ཕྱི་ལོ་ ༡༩༩༨ ཟླ་ ༠༥ ཚེས་ ༡༠ ཉིན་སླར་བཀྲ་ཤིས་དཔལ་འཁྱིལ་ཡན་ལག་སྨན་ཁང་གི་སྨན་རྩིས་ལས་སྣེ་བར་གནས་སྤོས་གནང་། གཞིས་ཆགས་སུ་ཛ་དྲག་ནད་མནར་སྐབས་ནད་པས་རེ་བསྐུལ་ནམ་ཞུས་ལ་སྨན་སྤྲོད་པའི་ཞབས་འདེགས་ཞུས་ཡོད། ཕྱི་ལོ་ ༢༠༠༤ ཟླ་ ༠༩ ཚེས་ ༢༥ ཉིན་ལྡེ་ར་ལྡུན་རཇ་པུར་ཡན་ལག་སྨན་ཁང་གི་སྨན་རྩིས་ལས་སྣེ་བའི་ལས་འགན་དུ་གནས་སྤོས་དང་། ཕྱི་ལོ་ ༢༠༠༩ ཟླ་ ༠༥ ཚེས་ ༣༠ ཉིན་རྡ་སྟེང་ཡན་ལག་སྨན་ཁང་གི་སྨན་རྩིས་ལས་སྣེ་ཐོག་གནས་སྤོས་གནང་། ཕྱི་ལོ་ ༢༠༡༨ ཟླ་ ༠༤ ཚེས་ ༠༡ ཉིན་གངས་སྐྱིད་ཡན་ལག་སྨན་ཁང་དུ་སྨན་རྩིས་ལས་སྣེ་བའི་ལས་འགན་དུ་གནས་སྤོས་གནང་བ་བཅས་ད་བར་མི་ལོ་ཧྲིལ་པོ་ ༢༥ རིང་སྨན་རྩིས་ཁང་གི་ཞབས་འདེགས་བསྒྲུབས་ཡོད།
༥། རྡ་སྟེང་ཡན་ལག་སྨན་ཁང་གི་སྨན་པ་བསོད་ནམས་རྡོ་རྗེ།
སྨན་རམས་པ་བསོད་ནམས་རྡོ་རྗེ་ལགས་སྨན་རྩིས་ཁང་དུ་ལས་ཞུགས་གནང་སྟེ་ཕྱི་ལོ་ ༡༩༩༥ ཟླ་ ༣ ཚེས་ ༡ ཉིན་ཅོག་ལམ་སར་ཡན་ལག་སྨན་ཁང་དུ་སྨན་པ་འགན་འཛིན་གྱི་ལས་འཁུར་ཞུས། སྐབས་དེར་ཨག་གླིང་ཡན་ལག་སྨན་པ་མ་བཞུགས་པའི་སྐབས་ཨག་གླིང་ཡན་ལག་སྨན་ཁང་དུ་སྨན་སྐོར་བསྐྱངས། ཕྱི་ལོ་ ༡༩༩༧ ཟླ་ ༥ ཚེས་ ༡༧ ཉིན་བདེ་སྐྱིད་གླིང་ཡན་ལག་སྨན་ཁང་གི་སྨན་པའི་ལས་འགན་དུ་གནས་སྤོས་གནང་། ཕྱི་ལོ་ ༡༩༩༩ ཟླ་ ༤ ཚེས་ ༡ ཉིན་སྤོན་ཊ་ཡན་ལག་སྨན་ཁང་གི་འགན་འཛིན་སྨན་པའི་ལས་འགན་དུ་གནས་སྤོས་གནང་། ཕྱི་ལོ་ ༢༠༠༨ ཟླ་ ༥ ཚེས་ ༣༠ ཉིན་འཇམ་ན་གར་ཡན་ལག་སྨན་ཁང་གསར་པ་དབུ་འབྱེད་ཐོག་དེ་གའི་འགན་འཛིན་སྨན་པར་གནས་སྤོས་གནང་།
ཕྱི་ལོ་ ༢༠༠༩ ཟླ་ ༥ ཚེས་ ༡༥ ཉིན་རཇ་པུར་ཡན་ལག་སྨན་ཁང་གི་འགན་འཛིན་སྨན་པ་དང་། ཕྱི་ལོ་ ༢༠༡༡ ཟླ་ ༤ ཚེས་ ༡༥ ཉིན་ཌལ་ཧོར་ཡན་ལག་སྨན་ཁང་གི་འགན་འཛིན་སྨན་པའི་ལས་འགན་དུ་གནས་སྤོས་གནང་། ཕྱི་ལོ་ ༢༠༡༣ ཟླ་ ༦ ཚེས་ ༥ ཉིན་ཅོན་ཏ་ར་དཔེ་དེབ་ཞིབ་འཇུག་དང་། དཔར་བསྐྲུན་སྡེ་ཚན་གྱི་སྨན་པའི་ལས་འགན་དུ་གནས་སྤོས་གནང་། ལས་ཡུན་རིང་ཕྱི་ལོ་ ༢༠༠༤ ཟླ་ ༤ ཚེས་ ༢༦ ནས་ཟླ ༥ ཚེས་ ༡༦ བར་ཀ་ཛག་ཀ་སི་ཐན་དུ་བདུན་ཕྲག་གསུམ་རིང་བརྟག་དཔྱད་སྨན་བཅོས་དང་། ས་གནས་དེ་གའི་བརྙན་འཕྲིན་གསར་འགོད་པར་བོད་སྨན་སྐོར་ལན་འདེབས་ཞུས་པ་དང་། ཕྱི་ལོ་ ༢༠༡༣ ཟླ་ ༡༡ ནས་ཟླ་གསུམ་རིང་ཐེ་ཝན་དུ་གཙོ་བོ་སྐམ་ཁབ་སློབ་སྦྱོང་དང་། ཞོར་དུ་དེ་གའི་རྒྱ་ནག་སྲོལ་རྒྱུན་ཀྲུང་དབྱིའི་སྨན་པ་ཚོར་བོད་སྨན་སྐོར་ངོ་སྤྲོད་དང་། རྩ་ཆུ་བརྟག་ཐབས། དཔྱད་ཀྱི་མེ་གསང་། ཁྲག་གི་གཏར་གསང་བཅས་ཀྱི་སྐོར་སྦྱང་བཤད་གནང་བ་དང་། མ་འོངས་པར་བོད་སྨན་དང་རྒྱ་ནག་དང་ཀྲུང་ལུགས་སྨན་དབར་རིག་གཞུང་སྤེལ་རེས་བྱ་ཕྱོགས་ཐད་གཏམ་བཤད་གནང་།
ཕྱི་ལོ་ ༢༠༡༤ ནང་སྨན་རྩིས་ཁང་གི་ཡན་ལག་སྦེལ་སྐོབ་དང་མོན་གྷོ། ཀོ་ལི་གྷལ། ཧོན་སུར། བལ་ཡུལ་ཁུལ། བྷན་རྡ་ར། མན་སྤར་མི་མང་ལ་སྐམ་ཁབ་ཐོག་སྨན་བཅོས་དང་། དེ་གའི་སྨན་པ་རྣམས་ལ་སྐམ་ཁབ་ཀྱི་ལག་ལེན་དམར་འཁྲིད་ཐོག་ཟབ་སྦྱོང་གནང་། ཕྱི་ལོ་ ༢༠༡༦ ཟླ་ ༡ ཚེས་ ༡ ཉིན་ཅོན་ཏ་ར་རྒྱ་ཡིག་སྡེ་ཚན་གྱི་སྨན་པ་དང་། ས་ཁུལ་གྱི་སྨན་སྐོར་སྨན་པའི་ལས་འགན་དུ་གནས་སྤོས་གནང་། ཕྱི་ལོ་ ༢༠༡༦ ཟླ་ ༡༠ ཚེས་ ༡ ཉིན་ལྡི་ལི་བོད་སྒར་ཡན་ལག་སྨན་ཁང་གི་སྨན་པ་འགན་འཛིན་གྱི་ལས་འགན་དུ་གནས་སྤོས་གནང་། ཕྱི་ལོ་ ༢༠༡༧ ཟླ་ ༧ ཚེས་ ༡ ཉིན་ཨེམ་རྡ་སྦཏ་ཡན་ལག་སྨན་ཁང་གི་འགན་འཛིན་སྨན་པའི་ལས་འགན་དུ་གནས་སྤོས་གནང་།
ཕྱི་ལོ་ ༢༠༡༨ ཟླ་ ༤ ཚེས་ ༡ ཉིན་ཅོན་ཏ་ར་རྒྱ་ཡིག་སྡེ་ཚན་དུ་གནས་སྤོས་དང་། ཕྱི་ལོ་ ༢༠༡༨ ཟླ་ ༧ ཚེས་ ༡ ཉིན་རྡ་སྟེང་ཡན་ལག་སྨན་ཁང་གི་སྨན་པའི་ལས་འགན་དུ་གནས་སྤོས་གནང་། ལས་ཡུན་རིང་རང་ཉིད་ནས་བོད་ཀྱི་གསོ་རིག་གཞུང་ལུགས་ལ་སྦྱངས་པའི་གྲུབ་འབྲས་སུ་ཕྱི་ལོ་ ༢༠༠༥ ཟླ་ ༤ ཚེས་ ༡ ཉིན་སྨན་རམས་པ་ཆུང་བ་དང་། ཕྱི་ལོ་ ༢༠༡༣ ཟླ་ ༤ ཚེས་ ༡ ཉིན་སྨན་རམས་པ་འབྲིང་བའི་མཚན་གནས་གནང་ཡོད་པ་བཅས་ད་བར་མི་ལོ་ཧྲིལ་པོ་ ༢༥ རིང་སྨན་རྩིས་ཁང་དུ་གསོ་རིག་བསྟན་པའི་ཞབས་འདེགས་བསྒྲུབས་ཡོད།
༦། སྨན་རྫས་ཉམས་ཞིབ་སྡེ་ཚན་གྱི་འགན་འཛིན་ལས་རོགས་བསྟན་འཛིན་སྙན་གྲགས་ལགས།
བསྟན་འཛིན་སྙན་གྲགས་ལགས་སྨན་རྩིས་ཁང་དུ་འཛུལ་ཞུགས་ཀྱིས་ཕྱི་ལོ་ ༡༩༩༥ ཟླ་ ༡༡ ཚེས་ ༡ ཉིན་ལྡི་ལི་ནེ་ཛམ་མུ་ཏིན་ཡན་ལག་གི་ལས་དྲུང་དང་། དེ་རྗེས་ལྡི་ལི་བོད་སྒར་ཡན་ལག་སྨན་ཁང་གི་མགྲོན་ཁང་བདག་གཉེར་བའི་ལས་འཁུར་ཞུས། ཕྱི་ལོ་ ༡༩༩༦ ཟླ་ ༡༢ ཚེས་ ༢༠ ཉིན་དབུས་སྨན་མཛོད་དང་། སྨན་ཚོང་སྡེ་ཚན་དུ་རྩིས་པའི་ལས་རོགས་སུ་གནས་སྤོས་གནང་། ཕྱི་ལོ་ ༡༩༩༨ ཟླ་ ༤ ཚེས་ ༡ ཉིན་དབུས་ཡན་ལག་སྤྱི་ཁྱབ་སྡེ་ཚན་དུ་རྩིས་ཁྲ་དང་སྦིལ་འཛིན་ཞིབ་འཇུག་པའི་ལས་བཀོད་གནང་བ་དང་། ཕྱི་ལོ་ ༢༠༠༤ ཟླ་ ༡༢ ཚེས་ ༡༥ ཉིན་དབུས་ཡན་ལག་སྤྱི་ཁྱབ་སྡེ་ཚན་དུ་རྩིས་པའི་ལས་གནས་སུ་བསྐོ་བཞག་གནང་།
ཕྱི་ལོ་ ༢༠༡༥ ཟླ་ ༡ ཚེས་ ༡ ཉིན་སྔོ་སྦྱོར་ཉམས་ཞིབ་སྡེ་ཚན་གྱི་འགན་འཛིན་ལས་རོགས་སུ་བསྐོ་བཞག་དང་། ཕྱི་ལོ་ ༢༠༡༦ ཟླ་ ༤ ཚེས་ ༡ ནས་ལ་དྭགས་སུ་སྨན་རྩིས་རིག་གཞུང་བསྟི་གནས་ཁང་གི་འགན་འཛིན་གྱི་ལས་འགན་དུ་གནས་སྤོས་གནང་། དེའི་རིང་ལ་དྭགས་མངའ་ཁོངས་ཀྱི་སྨན་རྩིས་ཁང་ཚོང་ཁྲལ་དེབ་སྐྱེལ་ཞུ་རྒྱུ་དང་། ས་ཁུལ་དེར་སྨན་རྩ་འདེབས་ལས། བྱང་ཐང་སྨན་སྐོར་བཅས་ཀྱི་ལས་དོན་བསྒྲུབས་ཡོད། ཕྱི་ལོ་ ༢༠༡༧ ཟླ་ ༡༠ ཚེས་ ༡ ཉིན་སྨན་རྫས་ཉམས་ཞིབ་སྡེ་ཚན་གྱི་འགན་འཛིན་ལས་རོགས་སུ་གནས་སྤོས་གནང་། སྨན་རྩིས་ཁང་དུ་ལས་ཡུན་རིང་ཕྱོགས་མཐའི་ཡན་ལག་སྨན་ཁང་ཁག་ཏུ་ནང་ཞིབ་གནང་ཡོད་པ་དང་། དབུས་སྨན་རྩིས་ཁང་གི་ལས་བྱེད་བདེ་དོན་ཚོགས་ཆུང་གི་ཚོགས་མི། ཨར་ལས་འཛུགས་བསྐྲུན་གྱི་ལས་གཞི་དང་འབྲེལ་བའི་ས་ཁང་ཚོགས་ཆུང་གི་ཚོགས་མི་གནང་ཡོད། སྐབས་ཐོག་སྨན་རྩིས་ཁང་གི་སྨན་རྒྱུ་མཁོ་སྒྲུབ་ཀྱི་ལས་དོན་གནང་མུས་བཅས་ད་བར་མི་ཧྲིལ་པོ་ ༢༥ རིང་སྨན་རྩིས་ཁང་གི་ཞབས་འདེགས་བསྒྲུབས་ཡོད་པ་བཅས། །
