ཕྱི་ལོ་ ༢༠༢༠ ཟླ་ ༡༢ ཚེས་ ༡༥ རེས་གཟའ་མིག་དམར། 

༄༅། །ཕྱི་ལོ་ ༢༠༢༠ ཟླ་ ༡༢ ཚེས་ ༡༠ ཉིན་ཏེ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་ཨ་རིའི་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་དང་འབྲེལ་བའི་ཤེས་བྱ་དང་གོ་རྟོགས་ཀྱི་ལས་གཞི་རྒྱ་ཆེ་སྤེལ་མཁན་(Article3.org) ཞེས་པའི་ཚོགས་པས་ལྷོ་ཨ་ཕི་རི་ཀའི་ཡི་ཤུའི་མཆོད་དཔོན་སྐུ་ཞབས་ཌེ་སི་མོན་ཊུ་ཊུ་ (Archbishop Desmond Tutu) མཆོག་ལ་འགྲོ་བ་མིའི་ཐོབ་ཐང་གི་གཟེངས་རྟགས་ཕུལ་བར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འཚམས་འདྲི་གནང་དོན། སྐུ་ཉིད་ལ་འགྲོ་བ་མིའི་ཐོབ་ཐང་གི་གཟེངས་རྟགས་ཐོབ་པར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན། སྐུ་ཉིད་ཀྱིས་མི་རིགས་དཀར་ནག་དབྱེ་འབྱེད་ཀྱི་གཞུང་ལ་ངོ་རྒོལ་དང་།  དེ་བཞིན་དྲང་བདེན་དང་འཚེ་མེད་ཞི་བའི་ཆེད་དུ་ཆོད་སེམས་བརྟན་པའི་སྒོ་ནས་ཕྱག་ལས་གནང་བ་དེས་འཛམ་གླིང་སྤྱི་དང་ལྷག་པར་བོད་མི་རྣམས་ལ་སེམས་འགུལ་ཐེབས་བཅུག་ཡོད། སྐུ་ཉིད་ཀྱི་དབུ་ཁྲིད་ལམ་སྟོན་འོག་དྲང་བདེན་དང་འཁོན་འཛིན་སྤངས་པའི་འཆམ་མཐུན་གྱི་སྒྲིག་འཛུགས་ཤིག་བཙུགས་ཏེ་འཛམ་གླིང་ནང་ཞི་བདེ་བསྐྲུན་ཐབས་སུ་ལས་འགུལ་སྣ་མང་སྤེལ་བ་དེས་འཛམ་གླིང་ཡོངས་ལ་ཁེ་ཕན་ཡོང་ངེས་རེད། གཞན་ཡང་སྐུ་ཉིད་ཀྱིས་གཞི་རྩའི་འགྲོ་བ་མིའི་ཐོབ་ཐང་དང་མི་རིགས་འདྲ་མཉམ་ཐོག་རྒྱབ་སྐྱོར་གྱིས་ལས་འགུལ་སྤེལ་བར་བོད་མིར་མཚོན་ན་བཀའ་དྲིན་ཆེན་པོ་ཡིན།

འཛམ་གླིང་གི་མཆོད་དཔོན་གྲགས་ཅན་སྐུ་ཉིད་མཆོག་དང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྣམ་གཉིས་དབར་མཛའ་བརྩེའི་འདུ་ཤེས་འཛིན་བཞིན་ཡོད་པར་སེམས་ནང་རང་བཞིན་གྱི་དགའ་ཚོར་ཆེན་པོ་སྐྱེ་ཡི་འདུག སླར་ཡང་ངས་སྐུ་ཉིད་མཆོག་ལ་འཚམས་འདྲི་དང་སྦྲགས་སྨོན་འདུན་ཞུ་རྒྱུ་ཡིན། །