ཕྱི་ལོ ༢༠༢༠ ཟླ་ ༡༢ ཚེས་ ༡༡ རེས་གཟའ་པ་སངས།
༄༅། །ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་ལ་ཕྱི་ལོ་ ༢༠༢༠ ལོའི་ལོ་འཁོར་དུས་སྟོན་ཐོག་ཨ་རིའི་རྒྱལ་ཡོངས་མང་གཙོ་བསྟི་གནས་ཁང་གིས་མང་གཙོའི་གཟེངས་རྟགས་ཕུལ་བར་ཕྱི་ལོ་ ༢༠༢༠ ཟླ་ ༡༢ ཚེས་ ༡༡ རེས་གཟའ་པ་སངས་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དགའ་བསུའི་གསུང་འཕྲིན་གནང་བའི་ནང་འཁོད་དོན། ཨ་རིའི་རྒྱལ་ཡོངས་མང་གཙོ་བསྟི་གནས་ཁང་གིས་ལྕམ་སྐུ་མཆོག་ལ་མང་གཙོའི་གཟེངས་རྟགས་ཕུལ་བར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ལྕམ་སྐུ་མཆོག་ལ་སྙིང་ཐག་པ་ནས་དགའ་བསུའི་འཚམས་འདྲི་ཞུ་རྒྱུ་ཡིན།
ལྕམ་སྐུ་ནེན་སི་པི་ལོ་སི་མཆོག་གིས། གལ་ཏེ་ང་ཚོས་རྒྱ་ནག་གཞུང་དང་ལྷན་དུ་ཚོང་གི་འབྲེལ་ལམ་ཡོད་པའི་ཆ་ནས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་སྐོར་གླེང་སློང་མ་བྱས་ཚེ། ང་ཚོས་འཛམ་གླིང་རྒྱལ་ཁབ་གཞན་གྱི་འགྲོ་བ་མིའི་ཐོབ་ཐང་སྐོར་གླེང་སློང་བྱེད་རྒྱུའི་བཟང་སྤྱོད་ཀྱི་ཐོབ་ཐང་མེད། ཅེས་གསུངས་པ་དེ་དཔལ་ལྡན་སྲིད་སྐྱོང་མཆོག་གིས་ལུང་འདྲེན་གནང་བ་དང་འབྲེལ་འཛམ་གླིང་ནང་སྐུ་ཉིད་ལྟར་འགོ་ཁྲིད་རྣམ་དཔྱོད་དང་སྙིང་སྟོབས་ཅན་གང་མང་དགོས་ཀྱི་ཡོད།
ཕྲན་རང་སྐུ་ཉིད་མཆོག་དང་མཇལ་འཕྲད་བྱུང་བར་ཧ་ཅང་དགའ་ཚོར་ཆེན་པོ་ཡོད། སྐུ་ཉིད་མཆོག་གིས་དུས་རྟག་ཏུ་སྨྲ་བརྗོད་རང་དབང་དང་ཕྱི་གསལ་ནང་གསལ་སླད་གསུང་གི་ཡོད་པ་དང་། སྐུ་ཉིད་ཀྱིས་བོད་མིའི་འགྲོ་བ་མིའི་ཐོབ་ཐང་དང་དྲང་བདེན་ཙམ་མ་ཡིན་པར་རྒྱལ་སྤྱིའི་འགྲོ་བ་མིའི་ཐོབ་ཐང་དང་དྲང་བདེན་ཆེད་ཆོད་སེམས་བརྟན་པོའི་སྒོ་ནས་ཕྱག་ལས་གནང་གི་ཡོད། སྐུ་ཉིད་མཆོག་གིས་བོད་མི་དང་བོད་དོན་ལ་གཡོ་བ་མེད་པའི་སྒོ་ནས་རྒྱབ་སྐྱོར་ཤུགས་ཆེ་གནང་བ་ནི་བོད་མི་ཡོངས་ལ་སྙིང་སྟོབས་ཆེན་པོ་བསྐྱེད་ཡོད། སླར་ཡང་ངས་སྐུ་ཉིད་མཆོག་ལ་འཚམས་འདྲི་གྲངས་མེད་ཞུས་པ་དང་སྦྲགས། སྐུ་གཟུགས་བདེ་ཐང་དང་བྱ་བ་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན། ཞེས་འཁོད་འདུག་པ་བཅས། །
