ཕྱི་ལོ་ ༢༠༢༠ ཟླ་ ༡༢ ཚེས་ ༡༡ རེས་གཟའ་པ་སངས། 

༄༅། །རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་མེ་ཐིའུ་མེ་ཁ་ཅི་ (Matteo Mecacci) མཆོག་པོ་ལན་ཊི་རྒྱལ་ས་ཝར་སའོ་ (Warsaw) ནང་རྟེན་གཞི་བྱས་པའི་རྒྱལ་སྤྱིའི་མང་གཙོའི་བསྟི་གནས་དང་འགྲོ་བ་མིའི་ཐོབ་ཐང་ལས་ཁུངས་ (Office for Democratic Institutions and Human Rights) ཀྱི་འགན་འཛིན་དུ་བསྐོ་གཞག་གནང་བར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འཚམས་འདྲིའི་གསུང་འཕྲིན་ཞིག་གནང་བའི་ནང་འཁོད་དོན། སྐུ་ཞབས་མེ་ཐིའུ་མེ་ཁ་ཅི་མཆོག་རྒྱལ་སྤྱིའི་མང་གཙོའི་བསྟི་གནས་དང་འགྲོ་བ་མིའི་ཐོབ་ཐང་ལས་ཁུངས་ཀྱི་འགན་འཛིན་དུ་བསྐོ་གཞག་གནང་བར་བོད་མི་ཡོངས་དང་ང་རང་སྒེར་གྱི་ངོས་ནས་དགའ་ཚོར་ཆེན་པོའི་སྒོ་ནས་འཚམས་འདྲི་ཞུ་རྒྱུ་ཡིན།

སྐུ་ཉིད་མཆོག་རྒྱལ་སྤྱིའི་མང་གཙོའི་བསྟི་གནས་དང་འགྲོ་བ་མིའི་ཐོབ་ཐང་ལས་ཁུངས་ཀྱི་འགན་འཛིན་དུ་བསྐོ་གཞག་གནང་བ་ནི། སྐུ་ཉིད་མཆོག་གིས་མི་ཚེའི་བྱ་གཞག་ཧྲིལ་པོ་ནང་ལས་འགན་འདྲ་མིན་ཁུར་ཏེ་རྒྱལ་སྤྱིའི་སྟེང་འགྲོ་བ་མིའི་ཐོབ་ཐང་དང་མང་གཙོ་གོང་འཕེལ་སླད་ཞབས་འདེགས་རླབས་ཆེན་ཞུས་པར་བདེན་དཔང་གནང་བ་མཚོན་གྱི་ཡོད།

སྐུ་ཉིད་མཆོག་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་ཡིན་པའི་ཆ་ནས་འཛམ་གླིང་རྒྱལ་ཁབ་ཁག་གི་གཞུང་དང་། རྒྱལ་སྤྱིའི་ཚོགས་སྡེ་ཁག་ལ་བོད་ནང་གི་འགྲོ་བ་མིའི་ཐོབ་ཐང་ཛ་དྲག་གི་གནས་སྟངས་སྐོར་ཞུ་གཏུག་གནང་བར་ང་ཚོས་སྐུ་ཉིད་མཆོག་ལ་བཀའ་དྲིན་ཤིན་ཏུ་ཆེ་ཞེས་ཞུ་རྒྱུ་ཡིན། སྐུ་ཉིད་མཆོག་གིས་རྒྱལ་སྤྱིའི་སྡིངས་ཆའི་སྟེང་བོད་མིའི་སྐུ་ཚབ་གནང་སྟེ་བོད་མིའི་མངོན་འདོད་བསྒྲུབ་ཆེད་ཕྱག་ལས་གནང་བར་ཐུགས་རྗེ་ཆེ་ཞུ་རྒྱུ་ཡིན། སྐུ་ཉིད་ཀྱི་དབུ་ཁྲིད་འོག་རྒྱལ་སྤྱིའི་མང་གཙོའི་བསྟི་གནས་དང་འགྲོ་བ་མིའི་ཐོབ་ཐང་ལས་ཁུངས་ཀྱི་ངོས་ནས་མུ་མཐུད་འགྲོ་བ་མིའི་ཐོབ་ཐང་དང་། ཞི་བདེ། གྲོས་མོལ་བཅས་གོང་མཐོར་གཏོང་བའི་ང་རང་ལ་གདེང་ཚོད་ཡོད།

སླར་ཡང་སྐུ་ཉིད་མཆོག་ལ་འཚམས་འདྲི་ཞུ་བ་དང་སྦྲགས་འབྱུང་འགྱུར་གྱི་བྱ་གཞག་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན། ཞེས་འཁོད།།