ཕྱི་ལོ་ ༢༠༢༠ ཟླ་ ༡༢ ཚེས་ ༤ རེས་གཟའ་པ་སངས།

༄༅། །བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ལོ་འདི་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་ཡོད་པ་ལྟར། ལས་འགུལ་དེའི་ཆ་ཤས་སུ་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་ཕྱི་ལོ་ ༢༠༢༠ ཟླ་ ༡༢ ཚེས་ ༤ ནས་ ༡༡ བར་བདུན་ཕྲག་གཅིག་རིང་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་སྐད་རིགས་སྣ་མང་ཐོག་བརྙན་འཕྲིན་བརྒྱུད་མཁས་པའི་གསུང་བཤད་ཀྱི་ལས་རིམ་ཞིག་དབུ་འཛུགས་གནང་ཡོད།

དེ་ཡང་ཕྱི་ཚེས་ ༤ ཉིན་གྱི་སྔ་དྲོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འཚམས་འདྲི་དང་འབྲེལ་དབུ་འབྱེད་ཀྱི་གསུང་བཤད་གནང་དོན། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་ཕྱི་ལོ་ ༢༠༢༠ ཟླ་ ༡༢ ཚེས་ ༤ ནས་ ༡༡ བར་བདུན་ཕྲག་གཅིག་རིང་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་བགྲོ་གླེང་གི་ལས་རིམ་ཞིག་གོ་སྒྲིག་གནང་ཡོད་པ་དང་། བགྲོ་གླེང་ཐོག་རྒྱལ་ཁབ་འདྲ་མིན་བཅུ་དགུའི་མཁས་དབང་དང་ཤེས་ཡོན་ཅན་མི་གྲངས་ ༡༢༠ ནས་བརྙན་འཕྲིན་བརྒྱུད་སྐད་རིགས་བཅོ་ལྔའི་ཐོག་གསུང་བཤད་གནང་རྒྱུ་ཡིན་སྟབས། ཚང་མས་གསན་གཟིགས་གནང་རོགས་ཞེས་ཞུ་རྒྱུ་ཡིན། གསུང་བཤད་གནང་མཁན་རྣམས་ནས་སྐུ་ལས་བསྐྱོན་ཏེ་ཐུགས་བསྐྱེད་དམ་བཅའ་བཞིའི་སྐོར་བཀའ་སློབ་དང་དགོངས་ཚུལ་གསུང་རྒྱུར་འབད་བརྩོན་གནང་བར་ཐུགས་རྗེ་ཆེ་ཞེས་ཞུ་རྒྱུ་ཡིན། 

བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ལོ་འདི་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་ཆེད་ལས་གཞི་མང་དག་ཅིག་སྤེལ་རྒྱུའི་འཆར་གཞི་ཡོད། འོན་ཀྱང་ཏོག་དབྱིབས་གཉན་རིམས་ཀྱི་རྐྱེན་པས་མང་ཚོགས་འདུ་འཛོམས་རིགས་གནང་དཀའ་བར་བརྟེན་དྲ་རྒྱ་བརྒྱུད་ལས་གཞི་སྤེལ་དང་སྤེལ་མུས་ཡིན། ཞེས་དང་།དེ་ནས་སྐུའི་རླབས་ཆེན་གྱི་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་མདོར་བསྡུས་ཤིག་གནང་སྟེ་མུ་མཐུད་གསུང་བཤད་གནང་དོན། ད་རེས་ཕྱི་དྲིལ་ལས་ཁུངས་ནས་བདུན་ཕྲག་གཅིག་རིང་སྐད་རིགས་བཅོ་ལྔའི་ནང་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་གསུང་བཤད་ཀྱི་ལས་རིམ་བང་བསྒྲིགས་ཡོད་སྟབས། བོད་མི་རྣམས་ནས་གསན་གཟིགས་གནང་རྒྱུ་ཙམ་དུ་མ་ཟད། ལག་བསྟར་གནང་སྟེ་འཛམ་གླིང་ཡོངས་ལ་ཁྱབ་སྤེལ་གཏོང་རྒྱུ་ཧ་ཅང་གལ་ཆེན་པོ་རེད། སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་རླབས་ཆེན་གྱི་མཛད་འཕྲིན་དེ་དག་འཛམ་གླིང་ཡོངས་ལ་འགྲེམས་སྤེལ་དང་མཁྱེན་པ་བཟོ་དགོས་ཀྱི་འདུག ཅེས་འབད་བརྩོན་བྱེད་བཞིན་ཡོད།

དེར་བརྟེན་བོད་མི་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་བ་དེ་དག་ལག་བསྟར་ཞུས་ནས་འཛམ་གླིང་ཡོངས་ལ་ཁྱབ་སྤེལ་བྱེད་ཀྱི་ཡིན་ཞེས་དམ་བཅའ་ལེན་དགོས་རྒྱུ་ཧ་ཅང་གལ་ཆེན་པོ་རེད། དེ་སྔ་མགོན་པོ་གང་ཉིད་མཆོག་གི་སྐུའི་འཁྲུངས་སྐར་ཉིན།  ངོས་ལ་སྐྱེས་སྐར་དུས་ཚིགས་ཀྱི་ཕྱག་རྟགས་ཡག་ཤོས་ག་རེ་དགོས་སམ་བརྗོད་ན། ཁྱེད་རང་ཚོས་སེམས་པ་བཟང་པོ་བྱེད་རོགས། སེམས་ཕྲན་བུ་འཁྲུག་པ་དང་ཁོང་ཁྲོ་ཟ་བ། བརྣག་སེམས་དང་། གནོད་སེམས་སྐྱེས་རྒྱུ་ཡོང་བའི་སྐབས་ལ་ངོས་ཀྱི་གདོང་འདི་དྲན་རོགས་བྱེད། སེམས་བཟང་པོ་བྱོས་དང་། དེ་ནི་ངོས་ལ་སྐྱེས་སྐར་གྱི་ལགས་རྟགས་ཡག་ཤོས་དེ་ཡིན། འཛམ་གླིང་འདིའི་གླིང་གཞན་དང་གཞན་པར་ཡོད་པའི་ངོས་ཀྱི་གྲོགས་པོ་ཚང་མས་འདི་སེམས་ལ་འཇོག་རོགས་བྱེད་ཅེས་བརྗོད་རྒྱུ་ཡིན། ཞེས་བཀའ་སློབ་ཕེབས་ཡོད། མགོན་པོ་གང་ཉིད་ཀྱི་དགོངས་བཞེད་དང་ལམ་སྟོན་བཞིན་བོད་བསྟན་སྲིད་མི་རིགས་ཆེད་དབུ་འོག་དཔུང་འདེགས་ཀྱི་ཞུ་སྒོ་གང་ཡོད་བཀའ་གསུང་ཅི་སྒྲུབ་དང་ལེན་ཞུ་རྒྱུ་བཅས་ལྷོད་གཡེང་མ་ཤོར་བ་བྱ་རྒྱུ་ཧ་ཅང་གལ་ཆེན་པོ་ཡིན། དེར་བརྟེན་ད་རེས་ཕྱི་དྲིལ་ལས་ཁུངས་ནས་འགན་བཞེས་ཏེ་མཁས་དབང་མང་པོ་གདན་འདྲེན་ཞུས་ཡོད། ཕྱི་དྲིལ་ལས་ཁུངས་ཀྱི་དྲུང་ཆེ་རྣམ་གཉིས་ཀྱིས་གཙོས་འབྲེལ་ཡོད་ཡོངས་ལ་བསྔགས་བརྗོད་དང་ཐུགས་རྗེ་ཆེ་ཞེས་ཞུ་རྒྱུ་ཡིན། ཞེས་གསུང་བཤད་གནང་གྲུབ་མཚམས་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་གནང་ཡོད་པ་བཅས། །

བརྙན་འཕྲིན་གཟིགས་ཆེད་འདིར་གནོན།