ཕྱི་ལོ་ ༢༠༢༠ ཟླ་ ༡༢ ཚེས་ ༥ རེས་གཟའ་སྤེན་པ།

༄༅། །ཕྱི་ལོ་ ༢༠༢༠ ཟླ་ ༡༢ ཚེས་ ༤ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཁེ་ན་ཌའི་ཕྱོགས་འགལ་རྙིང་ཞེན་ཆབ་སྲིད་ཚོགས་པའི་ (Conservative Party) ཕྱི་སྲིད་བློན་ཆེན་ (the Shadow Minister of Foreign Affairs) སྐུ་ཞབས་མ་ཡི་ཀེལ་ (Micheal Chong ) མཆོག་དང་ལྷན་ཐེངས་དང་པོ་དྲ་ལམ་བརྒྱུད་མཇལ་འཕྲད་གནང་ཡོད།

སྐབས་དེར་དཔལ་ལྡན་སྲིད་སྐྱོང་མཆོག་གིས་ཁེ་ན་ཌའི་རྙིང་ཞེན་ཆབ་སྲིད་ཚོགས་པ་གཞུང་འཛིན་ཡིན་པའི་སྐབས། རྙིང་ཞེན་ཆབ་སྲིད་ཚོགས་པས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཁེ་ན་ཌའི་གཞུང་གི་ལས་ཁུངས་ཁག་གི་ནང་ཐེངས་གཉིས་ཙམ་མཇལ་འཕྲད་ཞུས་ཡོད་པ་མ་ཟད། བཙན་བྱོལ་བོད་མིའི་སྒྲིག་འཛུགས་ལ་རོགས་དངུལ་གནང་བ་དང་། རྒྱ་གར་ཨ་རུ་ནཱ་ཅལ་མངའ་སྡེ་ནས་བཙན་བྱོལ་བོད་མི་ཆིག་སྟོང་ཐམ་པ་ཁ་ན་ཌའི་ནང་གཞིས་སྤོའི་ཆེད་དུ་བླངས་གནང་བ་སོགས་ཀྱིས་མཚོན་པའི་བོད་མི་རྣམས་ལ་ལོ་རྒྱུས་རང་བཞིན་ལྡན་པའི་རྒྱབ་སྐྱོར་ཤུགས་ཆེ་གནང་ཡོད་པས་སྐུ་ཞབས་མ་ཡི་ཀེལ་བརྒྱུད་རྙིང་ཞེན་ཆབ་སྲིད་ཚོགས་པར་ཐུགས་རྗེ་ཆེ་ཞུས་ཡོད།

དཔལ་ལྡན་སྲིད་སྐྱོང་མཆོག་དང་སྐུ་ཞབས་མ་ཡི་ཀེལ་མཆོག་གིས་མཐུན་ཕྱོགས་རྒྱལ་ཁབ་ཚོ་དང་ལྷན་མཉམ་རུབ་ཐོག་རྒྱ་ནག་གཞུང་ལ་དབུ་མའི་ལམ་གྱི་སྲིད་བྱུས་བརྒྱུད་བོད་དོན་བདེན་མཐའ་གསལ་ཐབས་སུ་གནོན་ཤུགས་སྤྲོད་དགོས་པའི་མོས་མཐུན་བྱུང་ཡོད། ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་སྐུ་ཞབས་མ་ཡི་ཀེལ་མཆོག་ལ་བོད་དོན་རྒྱབ་སྐྱོར་གྱི་ཁྲིམས་འཆར་ལ་རྒྱབ་སྐྱོར་གནང་དགོས་པ་སོགས་ཀྱི་སྐོར་གསུངས།

སྐུ་ཞབས་མ་ཡི་ཀེལ་མཆོག་གིས་དཔལ་ལྡན་སྲིད་སྐྱོང་མཆོག་ལ་ཡོངས་གྲགས་ཀྱི་མཇལ་འཕྲད་གནང་རྒྱུ་ཡིན། ཞེས་དང་། ད་ལྟ་བོད་པ་དང་ཡུ་གུར་མི་རིགས་རྣམས་ལ་འཕྲད་བཞིན་པའི་དཀའ་ངལ་ནི་རིག་གཞུང་རྩ་གཏོར་གྱི་གནད་དོན་ཞིག་རེད། ཅེས་གསུངས། དཔལ་ལྡན་སྲིད་སྐྱོང་མཆོག་དང་ལྷན་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་བསྟན་འཛིན་ལགས་མཉམ་ཞུགས་གནང་ཡོད་པ་བཅས།།