ཕྱི་ལོ་ ༢༠༢༠ ཟླ་ ༡༢ ཚེས་ ༧ རེས་གཟའ་ཟླ་བ།
༄༅། །༸སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་མཆོག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་བཀའ་སློབ་གནང་བའི་སྙིང་དོན། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་མི་གཙོ་བོར་གྱུར་བའི་འཛམ་གླིང་སྤྱི་དང་། བྱེ་བྲག་སེམས་ཅན་ཡོད་དོ་ཅོག་འགྲོ་བ་མིའི་རིགས་སུ་གྱུར་བ་འཛམ་གླིང་སྟེང་མི་དུང་ཕྱུར་བདུན་ཅུའི་བདེ་སྡུག་སླད་བསྔོ་བ་སྨོན་ལམ་དང་ཐུགས་བསྐྱེད་ཀྱི་མཛད་འཕྲིན་བསྐྱངས་དང་སྐྱོང་བཞིན་ཡོད། མཛད་འཕྲིན་དེ་དག་གི་ཆ་ཤས་སུ་མགོན་པོ་གང་ཉིད་མཆོག་གིས་ཐུགས་བསྐྱེད་དམ་བཅའ་བཞིའི་སྐོར་བཀའ་སློབ་སྩོལ་བཞིན་ཡོད།
དེ་ཡང་མགོན་པོ་གང་ཉིད་མཆོག་གིས། འགྲོ་བ་མིའི་རྒྱུད་ཀྱི་བྱམས་བརྩེ་གོང་འཕེལ་གཏོང་དགོས་པའི་སྐོར་བཀའ་སློབ་བསྩལ་བཞིན་ཡོད། འཛམ་གླིང་ནང་ཆོས་ལུགས་ཆེན་པོ་ནང་པ་དང་། ཧིན་དུ། ཁ་ཆེ། ཡི་ཤུ་སོགས་ཡོད་པ་དང་། ཆོས་ལུགས་ཚང་མའི་གཞི་རྩའི་བསླབ་བྱ་བྱམས་བརྩེའི་ལྟ་བ་གཅིག་གྱུར་ཡིན་ཞིང་། བྱམས་བརྩེའི་ཐབས་ལམ་བརྒྱུད་འགྲོ་བ་མི་དང་སེམས་ཅན་ཀུན་ལ་བདེ་སྐྱིད་སྐྲུན་བཞིན་ཡོད། འཛམ་གླིང་གི་ཆོས་ལུགས་ཚང་མ་མཐུན་སྒྲིལ་གནང་དགོས་པ་དང་། ཆོས་ལུགས་ནང་ཁུལ་མཐུན་སྒྲིལ་ཡོད་ན་འཛམ་གླིང་ཞི་བདེ་བསྐྲུན་པར་ཕན་ཐོགས་འབྱུང་གི་ཡོད་པའི་ཐུགས་འགན་བཞེས་གནང་གི་ཡོད།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་གྱི་ཐུགས་འགན་མཛད་བཞིན་ཡོད་པ་མ་ཟད། རྒྱ་གར་གནའ་བོའི་རིག་གཞུང་ཉམས་པ་སོར་ཆུད་གནང་རྒྱུའི་ཐུགས་འགན་བཞེས་བཞིན་ཡོད། སྤྱིར་རྒྱ་གར་ལ་གདོད་མ་དང་ཧིན་དུའི་རིག་གཞུང་ཕུན་སུམ་ཚོགས་པ་དང་རྒྱ་ཆེན་པོ་ཡོད། ལྷག་པར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དཔལ་ནཱ་ལེནྡྲ་ནས་བརྒྱུད་པའི་ཚད་མ་རིག་པ་དང་སེམས་ཁམས་རིག་པ་སོགས་ཀྱིས་མཚོན་པའི་བོད་ཀྱི་རིག་གཞུང་དར་སྤེལ་བྱེད་ན་འཛམ་གླིང་ཞི་བདེ་བསྐྲུན་པར་ཕན་ཐོགས་ཡོད་པ་ཞིག་གཟིགས་ནས་ཐུགས་འགན་མཛད་བཞིན་ཡོད།
དེ་བཞིན་རྒྱ་གར་གནའ་བོའི་རིག་གཞུང་རྒྱ་གར་ནང་ཉམས་ཡོད་པ་དེ་དག་བསྐྱར་གསོ་གནང་རྒྱུའི་ཐུགས་འགན་བཞེས་བཞིན་ཡོད། མགོན་པོ་གང་ཉིད་མཆོག་གིས་རྒྱ་གར་གནའ་བོའི་རིག་གཞུང་དང་། དེང་རབས་རིག་གཞུང་ཟུང་དུ་འབྲེལ་བའི་སྒོ་ནས་འཛམ་གླིང་གི་སྐྱེ་འགྲོ་མང་པོར་ཕན་ཐོགས་འབྱུང་གི་ཡོད་པར་གཟིགས་ནས་རྒྱ་གར་གནའ་བོའི་རིག་གཞུང་སླར་གསོ་དང་མི་ཉམས་རྒྱུན་འཛིན་གྱི་ཐུགས་འགན་མཛད་བཞིན་ཡོད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཐུགས་བསྐྱེད་དམ་བཅའ་བཞིའི་སྒོ་ནས་འཛམ་གླིང་ནང་མཛད་འཕྲིན་བསྐྱངས་པ་ལྟར་གྲུབ་འབྲས་ཀྱང་སྨིན་པ་དང་སྨིན་བཞིན་ཡོད།
མགོན་པོ་གང་ཉིད་མཆོག་གིས་བོད་པ་ཙམ་མ་ཡིན་པར་ཆོས་དད་ཡོད་མེད་ལ་མ་ལྟོས་པར་དེང་རབས་ཀྱི་ཤེས་ཡོད་དང་རྒྱ་གར་གནའ་བོའི་སེམས་ཁམས་རིག་པ། བྱམས་བརྩེ་སོགས་སློབ་གྲྭ་དང་ཤེས་ཡོན་གྱི་སྡེ་ཁག དེ་བཞིན་སྨན་ཁང་སོགས་ཀྱི་ནང་སྤེལ་ཐུབ་ན་ཕན་ཐོགས་ཡོད་པའི་མཛད་འཕྲིན་བསྐྱངས་དང་སྐྱོང་བཞིན་ཡོད། སྔོན་མ་ཡིན་ན་འཛམ་གླིང་གི་ཆོས་ལུགས་ཕན་ཚུན་བར་དགྲ་ལྟ་བུ་ཆགས་མྱོང་ཡོད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་རབ་དང་རིམ་པ་ཕེབས་པར་བརྟེན་ད་ལྟ་ཆོས་ལུགས་ཕན་ཚུན་བར་ཡིད་ཆེས་དང་དག་སྣང་གི་དུས་སྐབས་ཤིག་འཆར་ཡོང་གི་ཡོད། ད་ལྟ་བོད་ཀྱི་ཆོས་སྲིད་གཉིས་ཀ་ཉག་ཕྲ་བའི་སྐབས་ཤིག་ལ་སླེབས་ཡོད། བོད་མི་ཚང་མར་བོད་ཀྱི་ཆོས་དང་རིག་གཞུང་། སྐད་ཡིག་འཛིན་སྐྱོང་སྤེལ་གསུམ་བྱེད་རྒྱུའི་འགན་ཡོད། བོད་མི་ཚང་མས་༧སྐུའི་ཐུགས་བསྐྱེད་དམ་བཅའ་བཞི་རྣམས་གང་ཐུབ་ཅི་ཐུབ་ཀྱིས་ལག་བསྟར་ཞུ་རྒྱུ་གལ་ཆེན་པོ་རེད། ཅེས་སོགས་ཀྱི་བཀའ་སློབ་གནང་ཡོད་པ་བཅས།།
