ཕྱི་ལོ་ ༢༠༢༠ ཟླ་ ༡༢ ཚེས་ ༧ རེས་གཟའ་ཟླ་བ།
༄༅། །སྒྲུབ་བརྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་བཀའ་སློབ་གནང་བའི་སྙིང་དོན། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་འགྲོ་བ་མིའི་རིགས་སུ་སྐྱེ་བ་བཞེས་པའི་ཆ་ནས་ཡ་རབས་བཟང་སྤྱོད་ཀྱི་ཐུགས་འགན་བཞེས་སྟངས་སྐོར་དང་། དམིགས་བསལ་བོད་གངས་ཅན་པའི་རིགས་རྒྱུད་ལ་འཁྲུངས་ནས་བོད་རིགས་ཤིག་ཡིན་པའི་ཆ་ནས་ཐུགས་འགན་བཞེས་སྟངས། ནང་པ་སངས་རྒྱས་པའི་རྗེས་འཇུག་གནང་ནས་ཆོས་དད་ཡོད་མཁན་མི་སྣའི་གྲས་སུ་བཞུགས་གནང་མཛད་པའི་ཆ་ནས་ཐུགས་འགན་བཞེས་སྟངས་ག་རེ་ཡིན་པ། དེ་བཞིན་མགོན་པོ་གང་ཉིད་མཆོག་གིས་འཕགས་ཡུལ་གྱི་དཔལ་ནཱ་ལེནྡྲའི་གདན་ས་ཆེན་པོ་ནས་ཐེག་པ་ཆེ་ཆུང་སྔགས་དང་ལྟ་གྲུབ་བཅས་པ་གང་ལྟར་མདོ་སྔགས་ཆོས་ཚང་ལ་མ་ནོར་བ་བོད་ལ་གདན་དྲངས་པ་དེ་དག་ལ་ཐོས་བསམ་སྒོམ་གསུམ་ཉམས་ལེན་མཐིལ་ཕྱིན་པ་གནང་ནས་དབུ་ཁྲིད་དང་ལམ་སྟོན་གནང་མཁན་ཞིག་ཡིན་པའི་ཆ་ནས་ཐུགས་འགན་བཞེས་སྟངས་དང་དགོངས་པ་བཞེས་སྟངས་ག་འདྲ་ཡིན་པ། དེ་དག་ལ་གཞི་བཞག་ནས་ཐུགས་བསྐྱེད་དམ་བཅའ་བཞི་གསུངས་པ་རེད་དྲན་གྱི་འདུག
སྤྱིར་རྒྱལ་བ་དོན་གྱི་བདག་པོས་མང་ཚོགས་ལ་ངོས་ཀྱི་ཐུགས་བསྐྱེད་དམ་བཅའ་བཞི་འདི་དང་འདི་ཡིན་ཞེས་གསུངས་པ་དེ་ལས་ལྷག་པ་ཞིག་ང་རང་ལ་བཤད་རྒྱུ་མེད། བོད་གངས་ཅན་པ་ཡོངས་ནས་༧སྐུའི་ཐུགས་བསྐྱེད་དམ་བཅའ་བཞིའི་སྐོར་སློབ་སྦྱོང་དང་གང་ཐུབ་ཅི་ཐུབ་བསྒྲུབ་རྒྱུ་གལ་ཆེན་པོ་ཆགས་ཡོད། རྒྱ་ཆེ་ས་ནས་བཤད་ན་ཐུགས་བསྐྱེད་དམ་བཅའ་བཞིའི་ནང་མདོ་སྔགས་ཀྱི་ཆོས་ཚང་མ་འདུས་ཡོད། འགྲོ་བ་མིའི་བཟང་སྤྱོད་ཐོག་ནས་ཞུ་བ་ཡིན་ན་ང་ཚོ་འགྲོ་བ་མི་ཞིག་ཡིན་པའི་ཆ་ནས་ཆོས་ལུགས་ལ་དད་པ་ཡོད་ཀྱང་རུང་མེད་ཀྱང་རུང་ཚང་མས་འགྲོ་བ་མི་བཟང་པོ་ཞིག་བྱེད་རྒྱུའི་འགན་འཁུར་དེ་ང་ཚོ་ཚང་མར་ཡོད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཡང་ནས་ཡང་དུ་བཀའ་སློབ་རིམ་པ་ཕེབས་ཏེ་ཆོས་དད་ཡོད་མེད་ལ་མ་ལྟོས་པར་ཡ་རབས་བཟང་སྤྱོད་དང་། བྱམས་བརྩེ། དེ་བཞིན་འཛམ་གླིང་སྤྱི་ལ་ཕན་པའི་འགན་འཁུར་ལེན་སྟངས་སོགས་ཀྱི་སྐོར་བཀའ་སློབ་རབ་དང་རིམ་པ་ཕེབས་ཡོད། དེ་དག་ཚང་མ་འགྲོ་བ་མིའི་རིགས་སུ་གཏོགས་པའི་ཐམས་ཅད་གྱིས་ཉམས་ལེན་བྱེད་དགོས་པ་ཞིག་ཆགས་ཡོད།
བོད་པ་བརྒྱ་ཆ་ ༩༩ ཆོས་དད་ཡོད་མཁན་རེད། དེ་བཞིན་འཛམ་གླིང་ནང་ཆོས་དད་ཡོད་མཁན་དང་མེད་མཁན་ཡོད། ཆོས་བརྒྱུད་མང་པོ་ཡོད་པ་ནང་བཞིན་ལྟ་གྲུབ་ཀྱང་མ་མཐུན་པ་མང་པོ་ཡོད། འོན་ཀྱང་ཚང་མའི་མཐར་ཐུག་གི་དམིགས་ཡུལ་དེ་ལུས་བདེ་སེམས་སྐྱིད་ཡོང་བ་གནང་རྒྱུ་དེ་རེད། ཆོས་ལུགས་ནང་ཁུལ་ཕན་ཚུན་གནོད་པ་དང་ཕྱོགས་ཞེན་བྱེད་པ་དེ་དག་ཆོས་ལུགས་ཁག་གི་ལྟ་གྲུབ་དང་རྒྱབ་འགལ་ཆགས་ཡོད་སྟབས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་འཛམ་གླིང་གང་སར་ཕེབས་ནས་ཆོས་ལུགས་ཁག་གི་དབུ་ཁྲིད་རྣམས་དང་མཇལ་འཕྲད་གནང་སྟེ་ཆོས་ལུགས་རྗེས་འབྲང་བ་དང་ཆོས་ལུགས་ཁག་གི་དབུ་ཁྲིད་ཕན་ཚུན་ངོ་ཤེས་གྲོགས་པོ་བཟང་པོ་ཞིག་ཡོང་ཐབས་དང་། ཆོས་ལུགས་ཁག་གི་ལྟ་གྲུབ་ཕན་ཚུན་ཉམས་མྱོང་སྤེལ་རེས་གལ་ཆེན་པོ་ཡིན་པའི་སྐོར་བཀའ་སློབ་སྩལ་བ་སོགས་ཀྱིས་མཚོན་པའི་འཛམ་གླིང་ཞི་བདེ་ཡོང་བར་དགོངས་བཞེད་གནང་གི་ཡོད།
དེ་དག་ང་ཚོ་ཆོས་ལུགས་ལ་དད་པ་ཡོད་མཁན་ཚོས་སློབ་སྦྱོང་ཞུ་རྒྱུ་དང་མིག་དཔེ་ཡར་ལྟ་ཞུ་དགོས་པ་ཆགས་ཡོད། ནང་པ་ཡིན་ན་སེམས་ཅན་ཐམས་ཅད་ལ་སེམས་ཁུར་བྱེད་དགོས་པའི་འགྲོ་སྟངས་ཡོད། ང་ཚོ་བོད་གངས་ཅན་པའི་རིགས་རྒྱུད་ཡིན་པ་གཅིག་པ་དང་། ཕ་ས་ཕ་ཡུལ་གཅིག་པ་ཡིན་པའི་མི་རིགས་ཤིག་ཡིན་པའི་ཆ་ནས་སྐྱིད་སྡུག་གཅིག་པ་རེད། ལྷག་པར་བོད་ཀྱི་སྣོད་བཅུད་དང་རིག་གཞུང་དང་བཅས་པ་ཉམ་ང་བའི་གནས་སྟངས་ཆགས་ཡོད་པའི་སྐབས་འདིར་བོད་མི་རྒན་གཞོན་བར་གསུམ་དང་། སྐྱ་སེར་ཕོ་མོ་དབྱེ་བ་མེད་པར་ཆབ་སྲིད་པ་ཡིན་ན་ཆབ་སྲིད་ཐོག་ནས་འཇོན་ཚོད་དཔགས་ཚོད་ཀྱིས་བོད་སྤྱིའི་དོན་དག་ལ་ཕན་ཐོགས་བསྒྲུབ་རྒྱུ་དང་། ཆོས་ལུགས་ཀྱི་མི་སྣ་ཡིན་ན་ཆོས་ལུགས་ཀྱི་ཐོག་ནས་བོད་སྤྱིའི་དོན་དུ་ཕན་ཐོགས་བསྒྲུབ་རྒྱུ། རིག་གཞུང་གཅེས་སྐྱོང་གི་མི་སྣ་ཡིན་ན་རིག་གཞུང་གི་ཐོག་ནས་ཞབས་འདེགས་བསྒྲུབ་དགོས་པའི་དུས་ལ་སླེབས་ཡོད།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་དགོངས་ལྟར་བསྒྲུབ་རྒྱུའི་ལས་འགན་ང་ཚོ་ཚང་མར་ཡོད། དཔེར་ན་ཆོས་ལུགས་ཀྱི་ཕྱོགས་རིས་དང་ཆོལ་ཁའི་འཐེན་འཁྱེར་མི་བྱེད་པར། སོ་སོའི་སྒེར་གྱི་ཁེ་ཕན་བཞག་ནས་བོད་སྤྱི་པའི་ཁེ་ཕན་ཨང་དང་པོ་བརྩིས་ཏེ་བོད་དོན་སླད་བསམ་བློ་མང་ཙམ་གཏོང་རྒྱུ་དང་། དམ་ཚིག་ལ་རྒྱ་སྲུང་དགོས་པ་གལ་ཆེན་པོ་ཆགས་ཡོད། བོད་ཀྱི་ཆོས་ཀྱི་འབྱུང་ཁུངས་རྒྱ་གར་རེད། རྒྱ་གར་དུ་ནང་ཆོས་ཉམས་ཆག་ཕྱིན་ནས་མིང་ཙམ་མ་གཏོགས་ལྷག་མེད།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་ཆོས་བརྒྱུད་ཁག་གི་བླ་ཆེན་དབུ་ཁྲིད་རྣམ་པ་སོགས་ཀྱི་བཀའ་དྲིན་ལ་བརྟེན་ནས་རྒྱ་གར་ནང་སླར་ཡང་བཤད་སྒྲུབ་འཆད་ཉན་གྱི་སྡེ་བྱུང་ཡོད། ང་ཚོའི་མེས་པོ་ནས་བརྒྱུད་པའི་སངས་རྒྱས་ཀྱི་བསྟན་པ་འདི་འཛིན་སྐྱོང་སྤེལ་གསུམ་བྱེད་རྒྱུ་དེ་གལ་ཆེན་པོ་ཆགས་ཡོད། འགྲོ་བ་མི་ཡོངས་རྫོགས་ལ་བདེ་སྐྱིད་བསྐྲུན་ཐབས་སུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཚན་རིག་པ་ཚོ་དང་ལྷན་བགྲོ་གླེང་གནང་སྟེ་ཐུགས་འགན་མཛད་བཞིན་ཡོད། དེ་ཚོའི་སྐོར་ང་ཚོས་ངེས་པར་བསམ་བློ་ཞིབ་ཚགས་གཏོང་དགོས་པའི་གནད་འགག་ཆགས་ཡོད། ཅེས་སོགས་ཀྱི་བཀའ་སློབ་གནང་།།
