ཕྱི་ལོ་ ༢༠༢༠ ཟླ་ ༡༡ ཚེས་ ༡༢ རེས་གཟའ་མིག་དམར།
༄༅། །རྒྱ་གར་བྱང་ཕྱོགས་བི་ཧཱར་མངའ་སྡེའི་གྲོས་ཚོགས་ཀྱི་འོས་འདུ་ཆེན་མོ་ལེགས་གྲུབ་བྱུང་འབྲས་སུ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏིཤ་ཀུ་མཱར་ (Nitish Kumar) མཆོག་གིས་དབུ་ཁྲིད་པའི་རྒྱལ་ཡོངས་མང་གཙོ་མནའ་འབྲེལ་ཚོགས་པར་ (National Democratic Alliance ) སླར་ཡང་མང་མོས་ཀྱི་རྒྱལ་ཁ་ཐོབ་པར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འདྲིའི་གསུང་འཕྲིན་སྩལ་བའི་ནང་འཁོད་དོན། དེང་སྐབས་ངོས་རང་བི་ཧཱར་མངའ་སྡེ་དང་ལྷག་པར་གནས་མཆོག་རྡོ་རྗེ་གདན་དུ་ཡང་ཡང་བཅར་བའི་སྐབས་སྐུ་ཉིད་མཆོག་གིས་མཛའ་བརྩེ་ལྡན་པའི་སྒོ་ནས་སྣེ་ལེན་གཟབ་རྒྱས་གནང་བར་རྗེས་སུ་ཡི་རང་ཞུ་གི་ཡོད། ངོས་ཀྱིས་འཛམ་གླིང་གི་ཤར་ཕྱོགས་སུ་ཉི་འོད་ལྟར་འཕྲོ་བཞིན་པའི་རྒྱ་གར་གྱི་དཔལ་ནཱ་ལེནྡྲའི་གནའ་བོའི་ལེགས་བཤད་དེ་དག་བསྐྱར་གསོའི་སླད་དུ་འབད་བརྩོན་བྱེད་བཞིན་པའི་ཐད་སྐུ་ཉིད་མཆོག་གིས་རྒྱབ་སྐྱོར་གནང་བར་ཐུགས་རྗེ་ཆེ་ཞུ་འདོད་བྱུང་།
སྐུ་ཉིད་མཆོག་གིས་མཁྱེན་གསལ་རེད། རྒྱ་གར་ལ་ཆ་བཞག་ན་སྤྱོད་པ་འཚེ་བ་མི་བྱེད་པ་དང་། དེའི་རྩ་བ་སྙིང་རྗེའི་བློ་ཞེས་པ་འདི་ལོ་ངོ་སྟོང་ཕྲག་གསུམ་ཙམ་གྱི་གོང་ནས་རྒྱ་གར་ནང་དེ་འདྲའི་བསམ་བློ་འཁྱེར་སོ་ཞིག་དར་ཡོད། དེས་འཛམ་གླིང་ཡོངས་ལ་མིག་དཔེ་བཟང་པོ་ཞིག་བསྟན་ཡོད།
ངོས་ཀྱིས་སྐུ་ཉིད་མཆོག་གིས་འབྱུང་འགྱུར་གྱི་དཀའ་ངལ་ཁག་ལ་གདོང་ལེན་གནང་སྟེ་བི་ཧཱར་མངའ་སྡེའི་མི་མང་གི་རེ་བ་དང་མངོན་འདོད་བསྒྲུབ་ཐུབ་པའི་སྨོན་འདུན་ཞུ་རྒྱུ་ཡིན། ཞེས་གསུང་འཕྲིན་བསྩལ།།
གསུང་འཕྲིན་ངོ་མ་ཨིན་ཡིག་ནང་ཡོད་པ་དེར་རྩ་འཛིན་ཡོང་བ་ཞུ།།
