ཕྱི་ལོ་ ༢༠༢༠ ཟླ་ ༡༡ ཚེས་ ༨ རེས་གཟའ་ཉི་མ།
༄༅། །ཕྱི་ལོ་ ༢༠༢༠ ཟླ་ ༡༡ ཚེས་ ༨ ཉིན་གྱི་སྔ་དྲོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་སྐུ་ཞབས་ཇོ་བཱཡི་ཌེན་ (Joe Biden) མཆོག་ཨ་རིའི་སྲིད་འཛིན་ཐེངས་ ༤༦ པར་བདམས་ཐོན་བྱུང་བར་འཚམས་འདྲིའི་གསུང་འཕྲིན་ཞིག་སྩལ་བའི་ནང་འཁོད་དོན། གཅིག་བྱས་ན་སྐུ་ཉིད་མཆོག་གིས་མཁྱེན་བཞིན་ཡོད་ཀྱི་རེད། ཨ་རི་ནི་རང་དབང་དང་། མང་གཙོ། ཆོས་དད་རང་དབང་། ཁྲིམས་ཀྱི་དབང་སྒྱུར་བཅས་ལ་རྒྱབ་སྐྱོར་བྱེད་མཁན་ཞིག་ཡིན་པའི་ཆ་ནས་ངོས་རང་ཨ་རི་ལ་ཡུན་རིང་ཡིད་སྨོན་བྱེད་མཁན་ཞིག་ཡིན།
ཨ་རི་ནི་འཛམ་གླིང་རང་དབང་གི་འགོ་ཁྲིད་ཅིག་ཡིན་པའི་ཆ་ནས་འཛམ་གླིང་མི་མང་གིས་ཨ་རིའི་མང་གཙོའི་ཕུགས་འདུན་དང་འགོ་ཁྲིད་ལ་རེ་བ་ཆེན་པོ་རྒྱག་གི་ཡོད། ལྷག་པར་དུས་ཚོད་གཉན་འཕྲང་ཅན་གྱི་སྐབས་འདིར་སྐུ་ཉིད་མཆོག་གིས་འཛམ་གླིང་ནང་དབུལ་ཕོངས་དང་དྲང་བདེན་མེད་པའི་དཀའ་ངལ་མྱོང་བཞིན་པ་དག་སེལ་ནས་འཛམ་གླིང་འདི་བཞིན་ཞི་བདེ་ལྡན་པ་ཞིག་བསྐྲུན་ཐུབ་པའི་རེ་བ་ཡོད། དཀའ་ངལ་དེ་དག་གིས་གཙོས་གོ་ལའི་གནམ་གཤིས་འགྱུར་ལྡོག་གི་དཀའ་ངལ་རྣམས་སེལ་དགོས་པ་དངོས་གནས་དྲང་གནས་ཛ་དྲག་རང་བཞིན་ཅན་ཞིག་ཆགས་ཡོད། སྐུ་ཉིད་མཆོག་གིས་ལྕམ་སྐུ་ཀ་མ་ལཱ་ཧཻ་རིས་ (Kamala Harris) མཆོག་ཨ་རིའི་སྲིད་འཛིན་གཞོན་པ་བདམས་པར་རྗེས་སུ་ཡི་རང་ཞུ་གི་ཡོད།
ངོས་ཀྱིས་ཆབ་སྲིད་དང་འཛིན་སྐྱོང་གི་འགན་དབང་ཡོངས་རྫོགས་མི་མང་གིས་ཐད་ཀར་འོས་འདེམས་ཞུས་པའི་འགོ་ཁྲིད་ཚོར་རྩིས་སྤྲོད་བྱས་པ་ནས་བཟུང་། ངོས་ཀྱིས་འགྲོ་བ་མིའི་རྒྱུད་ཀྱི་བཟང་པོའི་རིན་ཐང་དང་། ཆོས་ལུགས་ནང་ཁུལ་མཐུན་སྒྲིལ། དེ་བཞིན་འཚེ་བ་མེད་པའི་ལྟ་གྲུབ་དང་བྱམས་བརྩེ་གོང་མཐོར་གཏོང་རྒྱུའི་ལས་འགན་སྒྲུབ་བཞིན་ཡོད། དེ་དག་ནི་དེ་རིང་ཁ་སང་གི་འགྲོ་བ་མིའི་སྤྱི་ཚོགས་ནང་ཧ་ཅང་དགོས་མཁོ་ཅན་ཞིག་ཆགས་ཡོད་པ་ངོས་ཀྱིས་ཡིད་ཆེས་བྱེད་ཀྱི་ཡོད། སྐུ་ཉིད་མཆོག་གིས་ཨ་རིའི་གྲོས་ཚོགས་འཐུས་མི་དང་སྲིད་འཛིན་གཞོན་པ་གནང་བའི་སྐབས་བོད་པ་ཚོར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་འདི་ལོའི་ཕྱི་ཟླ་ ༩ ནང་སྐུ་ཉིད་མཆོག་གིས་གསུང་བཤད་ཅིག་གནང་བ་དེར་ཐུགས་རྗེ་ཆེ་ཞུ་རྒྱུ་ཡིན།
ང་ཚོས་བོད་གནའ་རབས་ཀྱི་ནང་པའི་རིག་གཞུང་ཞི་བདེ་དང་། འཚེ་བ་མེད་པ། བྱམས་བརྩེ་བཅས་སྲུང་སྐྱོབ་དང་ཉར་ཚགས་བྱེད་བཞིན་པར་ཨ་རིའི་སྲིད་འཛིན་རིམ་བྱོན་དང་ཨ་རིའི་མི་མང་བཅས་ནས་ཐུགས་ཁུར་དང་རྒྱབ་སྐྱོར་གནང་དང་གནང་བཞིན་པ་ནི་བོད་མི་ཚོར་མཚོན་ན་བསོད་བདེ་ཆེན་པོ་རེད། བོད་གནའ་རབས་ཀྱི་ནང་པའི་རིག་གཞུང་ཞི་བདེ་དང་། འཚེ་བ་མེད་པ། བྱམས་བརྩེ་བཅས་ཀྱིས་འགྲོ་བ་མི་རིགས་ཡོངས་ལའང་ཕན་ཐོགས་ཆེན་པོ་བསྒྲུབ་ཐུབ་པའི་ནུས་པ་ཡོད། བོད་པ་ཚོའི་ཚབ་ཞུས་ཏེ་ངོས་ཀྱིས་སྐུ་ཉིད་མཆོག་ལ་སླར་ཡང་ཐུགས་རྗེ་ཆེ་ཞུ་རྒྱུ་ཡིན།
སྐུ་ཉིད་མཆོག་གིས་འབྱུང་འགྱུར་གྱི་དཀའ་ངལ་ཁག་ལ་གདོང་ལེན་གནང་སྟེ་ཨ་རིའི་མི་མང་གི་རེ་བ་དང་མངོན་འདོད་བསྒྲུབ་ཐུབ་པ་དང་། འཛམ་གླིང་འདི་བཞིན་ཞི་བདེ་དང་འཆམ་མཐུན་ལྡན་པ་ཞིག་བསྐྲུན་པར་བྱ་གཞག་ཁག་ལམ་ལྷོངས་ཡོང་བའི་ཐུགས་སྨོན་དང་བཅས། ཞེས་གསུང་འཕྲིན་བསྩལ།།
གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས། ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།
