ཕྱི་ལོ་ ༢༠༢༠ ཟླ་ ༡༡ ཚེས་ ༦ རེས་གཟའ་པ་སངས། 

༄༅། །ཕྱི་ལོ་ ༢༠༢༠ ཟླ་ ༡༡ ཚེས་ ༦ རེས་གཟའ་པ་སངས་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲ་ལམ་བརྒྱུད་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་ཆོས་ཉིན་གཉིས་པ་དབུ་འཛུགས་མཛད་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཙམ་ལ་མགོན་པོ་གང་ཉིད་མཆོག་༸རྒྱལ་བའི་གཟིམ་ཆུང་ཕོ་བྲང་ནས་བཀའ་ཆོས་གནང་ཡུལ་དུ་ཆིབས་སྒྱུར་གྱིས་བཞུགས་ཁྲིར་འཁོད་མཚམས་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་གསུང་དོན། ཕྱི་ལོ་ ༡༩༩༢ ལོར་མགོན་པོ་གང་ཉིད་མཆོག་ཐུ་སྦར་ཆིབས་སྒྱུར་བཀའ་དྲིན་མཛད་ཡོད་པ་དང་། འདི་ལོ་ཐུ་སྦའི་མཁན་རིན་པོ་ཆེ་འཇམ་དཔལ་བློ་གྲོས་མཆོག་ཏོག་དབྱིབས་གཉན་རིམས་ཀྱི་རྐྱེན་པས་དགོངས་པ་རྫོགས་པར་ཐུ་སྦ་མི་མང་ཡོངས་ལ་གདུང་སེམས་མཉམ་སྐྱེ་ཞུ་རྒྱུ་དང་། མཁན་པོ་བླ་མ་གསར་པ་ཞིག་འདེམས་ཐོན་གནང་ཡོད་པ་དང་། ཁོང་གི་མཚན་ལ་དགེ་ལེགས་རྡོ་རྗེ་ཡིན།  ཨུ་རུ་སུའི་ནང་པ་སྤྱི་ཡོངས་ཀྱི་ཚབ་ཞུས་ཏེ་མཁན་པོ་དགེ་ལེགས་རྡོ་རྗེ་མཆོག་ལ་འཚམས་འདྲི་གྲངས་མེད་ཞུ་རྒྱུ་ཡིན། མ་འོངས་མཛད་འཕྲིན་ཁག་ལམ་ལྷོངས་ཡོང་བའི་སྨོན་འདུན་ཞུ་ཡི་ཡོད། དེ་རིང་བཀའ་ཆོས་ཉིན་གཉིས་པའི་ཐོག་ཐུ་སྦའི་སྲིད་འཛིན་ཆེད་ཕེབས་གནང་ཡོད། ཅེས་གསུང་རྗེས་ཐུ་སྦ་སྐད་ཐོག་ཤེས་རབས་སྙིང་པོ་གསུང་འདོན་གནང་གྲུབ་མཚམས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། དེ་རིང་ཆོས་འགྲེལ་ཉིན་གཉིས་པ་རེད། སང་ཉིན་དགུ་པ་ལྷ་བབས་དུས་ཆེན་རེད། ང་ཚོས་ལྷ་བབས་དུས་ཆེན་ནི་དུས་ཆེན་གལ་ཆེན་པོ་ཞིག་ལ་རྩིས་སྲོལ་ཡོད། སང་ཉིན་སེམས་བསྐྱེད་ཞིག་འདོན་དགོས་དྲན་སོང་། སེམས་བསྐྱེད་ཀྱི་ཆོ་ག་མང་པོ་མི་དགོས་པར་བྱང་ཆུབ་སེམས་སྐར་མ་གཅིག་རིང་སྒོམ་པ་དང་ཆབས་ཅིག་སྟོང་ཉིད་ཀྱི་ལྟ་བ་ཡང་སྒོམ་རྗེས་སེམས་བསྐྱེད་ཞིག་བྱེད་རྒྱུ་ཡིན། གང་ལྟར་བོད་ལ་འཆར་ཅན་ལྷ་བབས་དུས་ཆེན་ཞེས་ཤོད་ཀྱི་ཡོད། རྒྱལ་བ་ལྷ་ལས་བབས་པ། དགོན་པ་ཁ་ཤས་ནང་ལྷ་བབས་ཞེས་པ་སྐས་འཛེག་བཙུགས་ཀྱི་ཡོད། དེ་ནི་ཀླད་པ་ལྗང་ཁུའི་སྐད་ཆ་རེད། བཅོམ་ལྡན་འདས་རང་ཉིད་ཀྱི་ཡུམ་ལྷ་ཡུལ་དུ་འཁྲུངས་པར་བརྟེན་ཡར་ལྷ་ཡུལ་དུ་ཕེབས་ཏེ་ཡུམ་གྱི་དོན་དག་མཛད་དེ་མར་འཛམ་བུ་གླིང་དུ་ཕེབས་པར་བརྟེན་ལྷ་བབས་དུས་ཆེན་ཞེས་ཟེར། སྐས་འཛེག་དེ་འདྲ་བཙུགས་ཏེ་སྙོབ་མི་ཐུབ་པ་དང་དགོས་རྒྱུ་ཁྱོན་ནས་མེད། གང་ལྟར་བཅོམ་ལྡན་འདས་རྫུ་འཕྲུལ་གྱི་ཐོག་ནས་ལྷ་ཡུལ་དུ་ཕེབས་པ་རེད། དེ་ནས་མར་ཕེབས་པ་རེད། སྐས་འཛེག་དགོས་རྒྱུ་མེད། སངས་རྒྱས་བཅོམ་ལྡན་འདས་ཀྱི་རྫུ་འཕྲུལ་ཡ་མཚན་པོའི་ཐོག་ནས་བཅོམ་ལྡན་འདས་ཀྱི་ཁྱད་ཆོས་བསྟན་དགོས་ཀྱི་མེད། སྟོན་པ་བཅོམ་ལྡན་འདས་ཀྱི་གསུངས་པ་ཁག་ལ་ང་ཚོས་བརྟག་དཔྱད་བྱེད་དགོས། ཁ་སང་ངོས་ཀྱི་དེའི་ཐོག་ལ་ཞུས་པ་ཡིན། བཅོམ་ལྡན་འདས་རང་ཉིད་ཀྱིས། ངའི་རྗེས་འབྲང་ཚོས་ང་ལ་དད་པ་བྱས་ནས་ངའི་ཆོས་ལ་ཉམས་སུ་ལེན་མི་དགོས། ངས་བསྟན་པ་འདི་ལ་ཁྱེད་རང་ཚོས་ཞིབ་འཇུག་དང་བརྟག་དཔྱད་བྱས་ནས་རྒྱུ་མཚན་ལྡན་པ་ཞིག་མཐོང་བའི་སྐབས་སུ་ཉམས་ལེན་བྱོས། དད་པ་ཁོ་ནའི་ཐོག་ནས་ཆོས་ཉམས་ལེན་བྱེད་མི་དགོས། ཞེས་བཅོམ་ལྡན་ལྡན་རང་ཀྱིས་འདི་ལྟར་གསུངས་ཡོད།

རིམ་པའི་པཱ་ལིའི་ཆོས་བརྒྱུད་ནས་དཔལ་ནཱ་ལེནྡྲ་ཆོས་བརྒྱུད་དར་བ་རེད། ནཱ་ལེནྡྲའི་ཆོས་བརྒྱུད་འཛིན་མཁན་དག་ནི་འཛམ་གླིང་ནང་རིག་པ་ཡག་ཤོས་ཡོད་མཁན་གྱི་མི་རེད་ཅེས་ང་ཚོས་ཤོད་ཐུབ། འདས་པ་ལོ་སྟོང་ཕྲག་གཉིས་ལྷག་ཙམ་རིང་ནཱ་ལེནྡྲའི་མཁས་པའི་དབང་པོ་དེ་དག་གིས་བསམ་བློ་བཏང་སྟེ་བཅོམ་ལྡན་འདས་ཀྱི་བཀའ་རྣམས་གཞི་ལ་བཞག་ནས་དཔྱད་པ་བྱས་ནས་གསུངས་པ་རྣམས་ཧ་ལས་པ་རེད་འདུག ཧོར་གྱི་ཡུལ་ཁག་དང་བོད་གངས་ཅན་གྱི་ཡུལ་ཁག་རྣམས་གཅིག་གྱུར་ཆགས་ཀྱི་ཡོད། དེང་སྐབས་སེམས་མ་འདུལ་བའི་དབང་གིས་དཀའ་ངལ་མང་པོ་འཕྲད་ཀྱི་ཡོད། སེམས་འདུལ་བ་ཞིག་དགོས་ཀྱི་ཡོད། རྩ་བའི་ཆོས་ལུགས་ཚང་མས་བྱམས་པ་དང་བརྩེ་བ། བཟོད་པ། ཆོག་ཤེས་སྐོར་གསུང་གི་ཡོད། སེམས་འདུལ་རྒྱུའི་ཆ་རྐྱེན་གཙོ་བོ་དེ་དག་རེད། སངས་རྒྱས་པའི་ཆོས་དང་དེའི་ནང་ནས་ནཱ་ལེནྡྲའི་མཁས་པའི་དབང་པོའི་གསུང་སྟངས་རྣམས་རིག་པ་རང་གི་ཐོག་ནས་དཔྱད་པ་བྱེད་ཡོད། དང་ཐོག་སེམས་ཁམས་རིག་པར་ཞིབ་འཇུག་གིས་སེམས་དཀྲུག་མཁན་གྱི་བློ་གང་ཡིན་པ་དང་། དེའི་འགལ་ཟླ་བླ་ོགང་འདྲ་ཞིག་ཡིན་སྐོར་རྩད་གཅོད་བྱས་ནས་དེའི་འགལ་ཟླའི་བློ་དེ་ཡར་ཤུགས་ཆེན་པོ་ཕྱིན་ཚེ་སེམས་འཁྲུག་པར་བློ་ཁོག་རང་བཞིན་གྱིས་ཤུགས་ཆུང་དུ་འགྲོ་རྒྱུ་ཡིན་པ་རེད། དེའི་རྩ་བར་རྟོག་ཡོང་དུས་རྩ་བའི་སེམས་འདི་སེམས་རང་བཞིན་གྱི་འོད་གསལ་བ་ཞེས་ཤོད་ཀྱི་ཡོད། དྲི་མ་རྣམས་ནི་གློ་བུར་བ། ཞེས་གསུང་གི་ཡོད། སེམས་ཀྱི་སྐྱོན་རྣམས་གློ་བུར་གྱི་རྐྱེན་ལ་བརྟེན་ནས་ཡོང་བ་རེད་མ་གཏོགས་སེམས་རང་བཞིན་འོད་གསལ་བ་དེའི་རང་བཞིན་ལ་མེད། བསྟན་པ་འདི་ལ་སྟོན་པ་གཉིས་པ་ལྟ་བུར་གྲགས། ཞེས་དཔལ་མགོན་འཕགས་པ་ཀླུ་སྒྲུབ་གསུང་བྱང་ཆུབ་སེམས་འགྲེལ་ནང་གསུངས་ཡོད། ཆེས་བཀའ་སློབ་སྩལ་རྗེས་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་ཆོས་འཕྲོ་སྐྱོང་མཛད་ཡོད། །