ཕྱི་ལོ་ ༢༠༢༠ ཟླ་ ༡༡ ཚེས་ ༥ རེས་གཟའ་ཕུར་བུ།
༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་ནི་འཛམ་གླིང་གི་མི་མང་ས་ཡ་མང་པོའི་མཆོད་གནས་སུ་གྱུར་ཡོད་པ་མ་ཟད། འཛམ་གླིང་གི་མི་ས་ཡ་མང་པོས་རང་དབང་གི་སྒོ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་རང་གི་ཁྱིམ་དང་། ལས་ཁུངས། ལྷ་ཁང་། ཚོང་ཁང་། དངུལ་ཁུག ཁ་པར་སོགས་ཀྱི་ནང་མཆོད་གནས་སུ་གཤོམ་གི་ཡོད།
འོན་ཀྱང་གཞིས་ལུས་བོད་རིགས་སྤུན་ཟླ་ཚོས་རང་དབང་ལུང་པར་ཡོད་པའི་མི་རྣམས་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་རང་གི་ཁྱིམ་དང་། ལས་ཁུངས། ལྷ་ཁང་། ཚོང་ཁང་། དངུལ་ཁུག ཁ་པར་སོགས་ཀྱི་ནང་མཆོད་གནས་སུ་གཤོམ་འདོད་ཀྱི་འདུན་པ་སྐོམ་པ་ཆུ་འདོད་ལྟར་ཡོད་ཀྱང་རྒྱ་ནག་གཞུང་གིས་བཀག་འགོག་བྱས་ཡོད།
རྒྱལ་སྤྱིའི་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་དང་བོད་དོན་ལ་གདུང་སེམས་མཉམ་སྐྱེ་ཞུ་སླད་ཕྱི་དྲིལ་བོད་ཀྱི་འགྲེམས་སྟོན་ཁང་གི་ངོས་ནས་དད་ལྡན་མང་ཚོགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་དང་ལྷན་བསྒྲོན་པའི་རང་པར་ (selfie) རེ་བསྐུར་བ་རྣམས་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་སུ་རྟེན་གཞི་བྱས་པའི་བོད་ཀྱི་འགྲེམས་སྟོན་ཁང་གསར་པའི་ནང་འགྲེམས་སྟོན་ཞུ་རྒྱུ་ཡིན།
བོད་ཀྱི་འགྲེམས་སྟོན་ཁང་གསར་པ་དེ་བཞིན་ཕྱི་ལོ་ ༢༠༢༡ ལོར་དབུ་འབྱེད་གནང་གཏན་འཁེལ་ཡོད། དེར་བརྟེན་འཛམ་གླིང་གི་ས་ཕྱོགས་གང་སར་གནས་པའི་བོད་མི་དང་ཕྱི་རྒྱལ་བ་སོགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་དང་ལྷན་བསྒྲོན་པའི་རང་པར་རེ་བསྐུར་གནང་ཡོང་བ་ཞུ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་དང་ལྷན་རང་པར་བསྒྲོན་པའི་ལས་འགུལ་ནང་བོད་པ་དང་ཕྱི་རྒྱལ་མི་རིགས་ཡོངས་ནས་ཆ་ཤས་ལེན་ཆོག རང་པར་ཚོན་མདོག་གང་ཡིན་ཡང་ཆོག རང་པར་གྱི་ཆེ་ཆུང་ངེས་པར་ ༣༠༠ dpi དང་ ༣༠༠༠ pixels high ཡིན་དགོས།
རང་པར་དང་། མིང་། སྡོད་གནས་བཅས་ཕྱི་ལོ་ ༢༠༢༠ ཟླ་ ༡༢ ཚེས་ ༣༡ གོང་གཤམ་གསལ་གློག་འཕྲིན་ཁ་བྱང་ཐོག་བསྐུར་གནང་ཡོང་བ་ཞུ། །
[email protected]
