ཕྱི་ལོ་ ༢༠༢༠ ཟླ་ ༡༡ ཚེས་ ༡༢ རེས་གཟའ་ཕུར་བུ།

༄༅། །ཕྱི་ལོ་ ༢༠༢༠ ཟླ་ ༡༡ ཚེས་ ༩ རེས་གཟའ་ཟླ་བའི་ཉིན་སུད་སི་ཕྱི་སྲིད་དྲུང་ཆེ་ལྕམ་སྐུ་ཀི་རི་སི་ཊི་ན་མར་ཌི་ (Krystyna Marty) མཆོག་གིས་རྒྱ་ནག་ཕྱི་སྲིད་བློན་ཆེན་གཞོན་པ་ཆིང་གང་ (Qin Gang) དང་ལྷན་དྲ་ཐོག་བརྒྱུད་ཚོགས་འདུ་ཞིག་ཚོགས་ཡོད། གསར་འགོད་གསལ་བསྒྲགས་སྤེལ་བར་གཞིག་ན། ཚོགས་འདུའི་སྐབས་རྒྱལ་ཁབ་གཉིས་དབར་དཔལ་འབྱོར་གྱི་འབྲེལ་་ལམ་གོང་མཐོར་དང་། རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས། དེ་བཞིན་ཏོག་དབྱིབས་གཉན་རིམས་ཀྱི་གནས་སྟངས་སོགས་ཀྱི་ཐོག་གྲོས་བསྡུར་གནང་སྟེ་རྒྱལ་ཁབ་གཉིས་དབར་འབྲེལ་བ་ཡུན་གནས་ཐུབ་པར་དམིགས་ཡོད། 

དེ་ཡང་ཕྱི་ལོ་ ༢༠༢༠ ཟླ་ ༩ ཚེས་ ༧ ནས་ ༡༡ བར་རྒྱ་ནག་ནང་རྟེན་གཞི་བྱས་པའི་སུད་སིའི་གཞུང་ཚབ་པ་སྐུ་ཞབས་བྷར་ནར་ཌི་ནོ་ (Bernardino Regazzoni)  ལགས་ཀྱིས་བོད་ནང་གཟིགས་སྐོར་ཕེབས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཞན་པོ་ཡོད་པ་དང་། རྒྱ་ནག་གཞུང་གིས་རྒྱ་ནག་ནང་འགྲོ་བ་མིའི་ཐོབ་ཐང་ལ་རྩི་སྲུང་བྱེད་ཀྱི་མེད་པའི་སྐོར་དང། ལྷག་པར་རྒྱ་ནག་གི་དབང་འཛིན་པ་ཚོས་བོད་མིར་ལྟ་ཚུལ་ངན་པ་ཡོད་སྐོར་སོགས་གསུངས་ཏེ་བོད་ནང་གི་གནས་སྟངས་ཐོག་ཐུགས་འཚབ་ཤུགས་ཆེ་ཡོད་སྐོར་གསུངས་ཡོད།

གཟིགས་སྐོར་དེ་ནི་ཕྱི་ལོ་ ༢༠༡༧ ནས་བཟུང་བོད་ནང་སུད་སི་གཞུང་འབྲེལ་གཟིགས་སྐོར་ཐེངས་དང་པོ་དེ་ཆགས་ཡོད་པ་དང་། གཟིགས་སྐོར་དེའི་སྐབས་པེ་ཅིང་དུ་རྟེན་གཞི་བྱས་པའི་སུད་སིའི་གཞུང་ཚབ་སྐུ་ཞབས་ཞབས་བྷར་ནར་ཌི་ནོ་ (Bernardino Regazzoni) མཆོག་དང་། གཞན་ཡང་གཞུང་ཚབ་ལས་བྱེད་མི་སྣ་གྲངས་ ༡༠ ལྷག་གིས་བོད་ཀྱི་རྒྱལ་ས་ལྷ་ས་དང་གཞི་ཀ་རྩེ་ས་ཁུལ་སོགས་ལ་གཟིགས་སྐོར་ཕེབས་ཏེ་ས་གནས་སྲིད་གཞུང་རྣམས་ལ་འགྲོ་བ་མིའི་ཐོབ་ཐང་གི་གནས་སྟངས་སོགས་ཀྱི་གལ་ཆེའི་གནད་དོན་སྐོར་གླེང་རྒྱུའི་གོ་སྐབས་བྱུང་ཡོད་པ་མ་ཟད། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནང་བོད་ཀྱི་འགྲོ་བ་མིའི་གནས་སྟངས་སྐོར་རང་དབང་ངང་གླེང་ཆོག་པའི་འགན་ལེན་བྱས་ཡོད་པ་དང་། བོད་ནང་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ནི་སུད་སི་རྒྱལ་ཁབ་ཀྱི་དགོས་འདུན་གཙོ་བོ་ཞིག་ཡིན་སྐོར་གསུངས་ཡོད།

སྤྱིར་རྒྱ་ནག་ནི་སུད་སི་གཞུང་གི་ཚོང་འབྲེལ་མཉམ་ལས་པ་ཆེ་ཤོས་གསུམ་པ་དེ་ཡིན་པ་དང་། སུད་སི་དང་རྒྱ་ནག་གཉིས་དབར་ཚོང་དང་འབྲེལ་བའི་ལས་གཞི་མང་པོ་ཞིག་ལ་མཉམ་རུབ་བྱེད་རྒྱུའི་གྲོས་ཆོད་བཞག་ཡོད། ཉེ་དུས་རྒྱལ་ཁབ་གཉིས་དབར་ཆབ་སྲིད་སྐོར་གྲོས་མོལ་བྱེད་སྐབས་འབྱུང་འགྱུར་ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་ལིམ་པིག་རྩེད་འགྲན་གོ་སྒྲིག་ལས་དོན་ཐོག་སུད་སིའི་གཞུང་ནས་མཐུན་འགྱུར་རྒྱབ་སྐྱོར་གང་ཐུབ་གནང་རྒྱུ་ཡིན་པ་མོས་མཐུན་གནང་ཡོད་ཀྱང་། ཉེ་ཆར་སུད་སིའི་གཞུང་གིས་རྒྱལ་ཁབ་གཞན་ ༢༡ དང་མཉམ་རུབ་ཐོག་རྒྱལ་ཚོགས་ལ་རྒྱ་གཞུང་གི་ཤར་ཏུར་ཀི་སིའི་ཐན་ནང་གི་ངལ་རྩོལ་སྒྱུར་བཀོད་ཁང་དང་འབྲེལ་བའི་སྐྱོན་བརྗོད་ཀྱི་ཞུ་ཡིག་ཅིག་ཕུལ་བར་བརྟེན། རྒྱ་ནག་གཞུང་ནས་སུད་སི་དང་མཉམ་དུ་འགྲོ་བ་མིའི་ཐོབ་ཐང་དང་འབྲེལ་བའི་རྒྱལ་ཁབ་གཉིས་དབར་གྱི་ཚོགས་འདུ་དེ་ཡང་གཏན་འཁེལ་མ་བྱས་པར་དུས་ཚོད་ངེས་མེད་རིང་ཕར་འགྱངས་བྱས་ཡོད། 

བོད་མིའི་སྒྲིག་འཛུགས་ཀྱི་སུད་སིའི་སྐུ་ཚབ་དོན་ཁང་ནས་སུད་སིའི་གཞུང་གིས་རྒྱ་ནག་དང་ལྷན་འགྲོ་བ་མིའི་ཐོབ་ཐང་གི་གནད་དོན་གལ་འགངས་ཆེན་པོ་ཡིན་པ་ངོས་འཛིན་གྱིས་གླེང་སློང་གནང་བ་མ་ཟད། བོད་ནང་གི་ཡ་ང་བའི་འགྲོ་བ་མིའི་ཐོབ་ཐང་གི་གནས་སྟངས་སོགས་ཀྱི་སྐོར་གླེང་སློང་གནང་བར་ཐུགས་རྗེ་ཆེ་ཞུས་ཡོད། སུད་སི་རྒྱལ་ཁབ་ནི་རྒྱ་ནག་གིས་བོད་ནང་དྲག་པོའི་བཙན་འཛུལ་བྱས་རྗེས་བོད་མིར་སྐྱབས་བཅོལ་གནང་མཁན་ཐོག་མ་དེ་ཡིན་པ་མ་ཟད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་རྒྱ་ནག་དབར་གྲོས་མོལ་ཡོང་སླད་རྒྱབ་སྐྱོར་ཤུགས་ཆེ་གནང་མཁན་ཞིག་ཀྱང་ཡིན།།