ཕྱི་ལོ་ ༢༠༢༠ ཟླ་ ༡༡ ཚེས་ ༢༤ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༦ ཚེས་ ༢ ཉིན་མཉམ་འབྲེལ་རྒྱལ་ཚོགས་ཀྱི་རང་དབང་གི་ཆེད་མཁས་པ་ལྔ་ཡིས་མཉམ་འབྲེལ་གྱིས་ཉེས་འཛུགས་ཡི་གེ་ (Joint Allegation Letter) ཞིག་རྒྱ་ནག་གཞུང་ལ་ཕུལ་ཡོད་པ་དང་། ཡི་གེའི་ནང་འཁོད་པ་ལྟར་ན། རྒྱལ་ཚོགས་ཀྱི་ཆེད་མཁས་པ་ལྔ་ཡིས་རྒྱ་ནག་གཞུང་ལ་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་དཔལ་བཟང་པོ་མཆོག་གི་གནས་བབ་དང་། གང་དུ་ཡོད་མེད་སྐོར་གྱི་གནས་ཚུལ་ཁ་གསལ་དགོས་པའི་དགོས་འདུན་བཏོན་གནང་ཡོད་པ་མ་ཟད། རྒྱ་ནག་གཞུང་གིས་བོད་མིའི་ཆོས་ཕྱོགས་ཀྱི་བྱེད་སྒོ་ཁག་དང་། ལྷག་པར་བོད་ཀྱི་ཐུན་མོང་མིན་པའི་བླ་སྤྲུལ་ངོས་འཛིན་ལམ་ལུགས་བཅས་ཀྱི་ཐོག་ཐེ་བྱུས་བྱེད་བཞིན་པར་ཐུགས་འཚབ་གནང་གི་ཡོད་པའི་སྐོར་འཁོད་ཡོད།
དེ་བཞིན་རྒྱ་ནག་གཞུང་གིས་བོད་མིའི་བླ་སྤྲུལ་ངོས་འཛིན་ལམ་ལུགས་ལ་རྩིས་མེད་རྡོག་རོལ་བཏང་སྟེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་བསྐོ་བཞག་བྱ་འཆར་ཡོད་པའི་སྐོར་བོད་མི་ཚོས་དངོས་གནས་དྲང་གནས་ཐུགས་འཚབ་གནང་བཞིན་ཡོད་པ་དང་། དེའི་ཐད་རྒྱ་ནག་གཞུང་གིས་འགྲེལ་བཤད་ཁ་གསལ་ཞིག་སྤྲད་དགོས་པའི་དགོས་འདུན་བཏོན་ཡོད། ཕྱི་ལོ་ ༢༠༢༠ ཟླ་ ༧ ཚེས་ ༨ ཉིན་རྒྱ་ནག་གཞུང་གིས་བརྡ་ལན་ཞིག་ཕུལ་ཡོད་ཀྱང་རྒྱལ་ཚོགས་ཀྱིས་ཉེ་ཆར་རྒྱ་ནག་གི་བརྡ་ལན་ཡི་གེ་ཡོངས་གྲགས་གནང་ཡོད། ད་བར་རྒྱལ་ཚོགས་ཀྱིས་ཡོངས་གྲགས་མ་གནང་བ་དེ་ཡིག་སྒྱུར་གྱི་བརྒྱུད་རིམ་བརྒྱུད་དགོས་སྟབས་ཡོངས་གྲགས་གནང་ཐུབ་མེད།
༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་དཔལ་བཟང་པོ་མཆོག་གང་དུ་ཡོད་མེད་སྐོར་རྒྱ་ནག་གཞུང་གིས་བརྡ་ལན་ཕུལ་བ་ལྟར་ན། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་ནི་མི་སེར་དཀྱུས་མ་ཞིག་ཡིན་ཞིང་། སློབ་སྦྱོང་ཐོན་རྗེས་ད་ལྟ་ཕྱག་ལས་གནང་གི་ཡོད། ཅེས་དང་། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་དང་ནང་མི་ལྷན་རྒྱས་ནས་བསུན་པོ་བཟོ་རྒྱུར་མཉེས་པོ་གནང་གི་མ་རེད། ཅེས་རྒྱུན་ལྡན་གྱི་བརྡ་ལན་ཞིག་ཕུལ་ཡོད།
གཞན་ཡང་རྒྱ་ནག་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་༸ཀུན་གཟིགས་པཎ་ཆེན་སྐུ་ཕྲེང་བཅུ་པའི་ཡང་སྲིད་ངོས་འཛིན་གནང་རྒྱུའི་དབང་ཆ་མེད། ཅེས་དང་། རྒྱ་ནག་གཞུང་གིས་བོད་ཀྱི་ཆོས་ལུགས་ཀྱི་གནས་བབས་དང་བླ་སྤྲུལ་རྒྱུད་པའི་མཚན་གནས། དེ་བཞིན་ཏཱ་ལའི་བླ་མ་སྐུ་ཕྲེང་རིམ་བྱོན་དང་༸ཀུན་གཟིགས་པཎ་ཆེན་སྐུ་ཕྲེང་རིམ་བྱོན་གྱི་སྒྲིག་འཛུགས་རྒྱ་ནག་རང་གིས་བསྐྲུན་པ་ཡིན་པས་དེའི་བདག་དབང་རྒྱ་ནག་ལ་ཡོད་པའི་འཁྱོག་བཤད་ཀྱིས་བརྡ་ལན་ཕུལ་འདུག
སུད་སིའི་སྐུ་ཚབ་དོན་གཅོད་ཁང་གིས། རྒྱ་ནག་གི་འཁྱོག་བཤད་ལ་མཐའ་གཅིག་ཏུ་ངོ་རྒོལ་གནང་བ་དང་འབྲེལ་བླ་སྤྲུལ་ངོས་འཛིན་ལམ་ལུགས་ནི་བོད་བརྒྱུད་ནང་བསྟན་གྱི་ཐུན་མོང་མིན་པའི་ཁྱད་ཆོས་ཤིག་ཡིན་ཞིང་། རྒྱ་ནག་གཞུང་ལ་དེའི་ཐད་ཐེ་བྱུས་བྱེད་རྒྱུའི་ཐོབ་ཐང་མེད། ཅེས་དང་། རྒྱ་ནག་གཞུང་གིས་རྒྱལ་ཚོགས་ལ་ཏཱ་ལའི་བླ་མ་སྐུ་ཕྲེང་རིམ་བྱོན་དང་༸ཀུན་གཟིགས་པཎ་ཆེན་སྐུ་ཕྲེང་རིམ་བྱོན་གྱི་སྒྲིག་འཛུགས་ཀྱི་བདག་དབང་རྒྱ་ནག་ལ་ཡོད་པའི་འཁྱོག་བཤད་ཀྱི་བརྡ་ལན་ཕུལ་བ་དེའི་དམིགས་ཡུལ་གཙོ་བོ་ནི་མཐར་ཐུག་ན་བོད་ནང་གི་བོད་མི་རྣམས་གཙོ་བོར་གྱུར་པའི་སོག་པོ་དང་། འབྲུག ཧི་མ་ལ་ཡའི་རི་རྒྱུད་ཀྱི་བོད་བརྒྱུད་ནང་བསྟན་གྱི་རྗེས་འབྲང་བ་ཡོངས་རྫོགས་དབང་སྒྱུར་བྱེད་བཞིན་ཡོད་པས་མཐའ་གཅིག་ཏུ་ངོ་རྒོལ་ཡོད། ཅེས་གསུངས།།
