ཕྱི་ལོ་ ༢༠༢༠ ཟླ་ ༡༡ ཚེས་ ༡༣ རེས་གཟའ་པ་སངས།
༄༅། །ཕྱི་ལོ་ ༢༠༢༠ ཟླ་ ༡༡ ཚེས་ ༡༡ ཉིན་ཨིན་ཡུལ་གྱི་ (Channel 4 News) ཞེས་པའི་གསར་འགྱུར་ལས་ཁང་གི་གསར་འགོད་པ་ཀྲི་ཤི་ནན་གུ་རུ་མུར་ཏི་ (Krishnan Guru-Murthy) ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་སྤྱིའི་གོ་ལའི་ཚ་དྲོད་ཀྱི་རྐྱེན་པས་གནམ་གཤིས་འགྱུར་ལྡོག་འགྲོ་བཞིན་པའི་སྐོར་བཀའ་འདྲི་ཞུས་ཡོད།
སྐབས་དེར་མགོན་པོ་གང་ཉིད་མཆོག་གིས་གསར་འགོད་པའི་དྲི་བ་ཁག་ལ་བཀའ་ལན་སྩལ་དོན། འཛམ་གླིང་སྤྱིའི་གོ་ལའི་ཚ་དྲོད་ཀྱི་འགྱུར་ལྡོག་གི་གནད་དོན་འདི་ནི་ཧ་ཅང་ཉེན་འཚབ་ཆེན་པོ་ཞིག་ཡིན། དུས་ཤིག་གོ་ལའི་ཚ་དྲོད་རྒྱས་པར་བརྟེན་གཙང་ཆུ་རྣམས་རིམ་པར་སྐམ་ངེས་རེད། བོད་ནི་འཛམ་གླིང་གི་མཐོ་སྒང་ཡིན་པར་ངོས་འཛིན་བྱེད་ཀྱི་ཡོད་པ་དང་། རྒྱུག་ཆུ་ཆེ་ཁག་གི་ཆུ་སྒོ་ཡང་བོད་མཐོ་སྒང་ཡིན། རིམ་བཞིན་བོད་ནི་ཨབ་གྷ་ནི་སི་ཐན་གྱི་ཡུལ་ལྟ་བུར་འགྱུར་གྱི་ཡོད། གོ་ལའི་ཚ་དྲོད་ཀྱི་རྐྱེན་པས་གནམ་གཤིས་འགྱུར་ལྡོག་གི་གནད་དོན་ཁ་གསལ་བཟོ་རྒྱུར་ང་ཚོའི་ལས་འགན་ཡིན། འཛམ་གླིང་གི་རྒྱལ་ཁབ་ཆེན་པོ་ཚོས་ཀྱང་གནམ་གཤིས་འགྱུར་ལྡོག་འགྲོ་བཞིན་པའི་གནད་དོན་ཐོག་དོ་སྣང་ཤུགས་ཆེ་བྱེད་དགོས། དམག་འཁྲུག་དང་གོ་མཚོན་ལ་སོགས་ཀྱི་ཐོག་འགྲོ་གྲོན་ཕོན་ཆེན་པོ་གཏོང་བཞིན་པའི་རྒྱལ་ཁབ་རྣམས་ནས་དེའི་ཚབ་ལ་སོ་སོའི་རྒྱལ་ཁབ་ཀྱི་དངུལ་རྣམས་གནམ་གཤིས་འགྱུར་ལྡོག་དང་ཁོར་ཡུག་སྲུང་སྐྱོབ་ཐོག་འགྲོ་སོང་གཏོང་བར་ངོས་ཀྱིས་རེ་བ་བྱེད་ཀྱི་ཡོད།
རྒྱུ་དཔལ་འབྱོར་ཚད་མེད་ཡོད་མཁན་རྣམས་ལ་བཟའ་འཐུང་འབོལ་པོ་ཡོད་ནའང་། གལ་ཏེ་སྡོད་སའི་ཁང་པ་ནང་འཚོ་རླུང་མེད་ཚེ་འཚོ་ཐུབ་རྒྱུ་ཁག་པོ་རེད། ཆེས་ཐོག་མར་འཛམ་གླིང་མཉམ་འབྲེལ་རྒྱལ་ཚོགས་ངོས་ནས་གོ་ལའི་ཚ་དྲོད་རྐྱེན་པས་གནམ་གཤིས་འགྱུར་ལྡོག་དང་འབྲེལ་བའི་ལས་དོན་ཐོག་ལས་འགུལ་ཤུགས་ཆེ་སྤེལ་དགོས་པ་དང་། དེང་སྐབས་སྔར་དང་མི་འདྲ་བ་ང་ཚོ་ཕན་ཚུན་དབར་གཅིག་ལ་གཅིག་བརྟེན་གྱི་གནས་སྟངས་ཀྱི་དུས་སྐབས་ཤིག་ཡིན། གལ་ཏེ་ངོས་རང་ཆབ་སྲིད་ཚོགས་པར་འཛུལ་ཞུགས་བྱེད་དགོས་བྱུང་ཚེ་ཆབ་སྲིད་ཚོགས་པ་ལྗང་ཁུ་ནང་འཛུལ་འདོད་ཡོད། ཁོང་ཚོའི་བསམ་བློ་ནི་ཧ་ཅང་ཡག་པོ་འདུག སློབ་གསོའི་ལམ་ནས་ཕྲུ་གུར་ཁོར་ཡུག་ལ་དོ་སྣང་དང་སྲུང་སྐྱོང་བྱེད་པ་ནི་རང་ཉིད་ལ་དོ་སྣང་དང་སྲུང་སྐྱོབ་བྱེད་པ་ལྟར་ཡིན་སྐོར་འགྲེལ་བརྗོད་བྱེད་དགོས། རང་གཅེས་འཛིན་གྱི་བློ་དེ་དོར་ནས་གཞན་གཅེས་འཛིན་གྱི་བློ་འཛིན་དགོས་རྒྱུ་ཧ་ཅང་གལ་ཆེན་པོ་རེད། དེ་གསལ་པོ་རེད། གཞིའི་རྩའི་འགྲོ་བ་མི་ཚང་མ་གཅིག་མཚུངས་ཡིན། འོན་ཀྱང་རང་ཉིད་གཙོ་བཟུང་གི་ལས་དོན་རྐྱང་རྐྱང་བྱེད་ཚེ་ཞེད་སྣང་དང་ཁོང་ཁྲོ། དོགས་པ་སོགས་མང་པོ་ཡོང་གི་ཡོད།
ད་ཆ་འཛམ་གླིང་ཁྱོན་ཡོངས་སུ་ཏོག་དབྱིབས་གཉན་རིམས་ཁྱབ་བརྡལ་ཇེ་ཆེར་འགྲོ་བཞིན་པའི་རྐྱེན་གྱིས་ཛ་དྲག་གི་གནས་སྟངས་ཤིག་ཏུ་གྱུར་ཡོད། དེར་སྨན་པ་དང་སྨན་ཞབས་ཚོས་ནད་པ་གསོ་སྐྱོང་སླད་སོ་སོ་རང་ཉིད་ཀྱི་ཚེ་སྲོག་བློས་གཏོང་གི་ཡོད། ངོས་ཀྱིས་བསྔགས་བརྗོད་བྱེད་ཀྱི་ཡོད། ངོས་ཀྱིས་ངོས་ནས་ཏོག་དབྱིབས་གཉན་རིམས་འདི་ཞི་ཐབས་སུ་གཟུངས་སྔགས་བགྲང་གི་ཡོད། འོན་ཀྱང་སྨོན་ལམ་ཁོ་ནའི་འདང་ངེས་མེད།
དུས་རབས་བརྒྱད་པའི་ནང་བྱོན་པའི་རྒྱ་གར་གྱི་སློབ་དཔོན་ཆེན་པོ་ཞི་བའི་ལྷས། གལ་ཏེ་བཅོས་སུ་ཡོད་ན་ནི། །དེ་ལ་མི་དགར་ཅི་ཞིག་ཡོད། །གལ་ཏེ་བཅོས་སུ་མེད་ན་ནི། །དེ་ལ་མི་དགའ་བྱས་ཅི་ཕན། །ཞེས་གསུངས་པ་ལྟར། མིའི་མི་ཚེར་འགོ་ཡོད་སྟབས་མཇུག་ཞིག་ཡོང་ངེས་ཡིན། ང་ཚོའི་ངོས་ནས་འགྲོ་བ་མི་དུང་ཕྱུར་བདུན་ཅུ་ཚང་མ་གཅིག་མཚུངས་ཀྱི་འདུ་ཤེས་འཛིན་དགོས། ངའི་རྒྱལ་ཁབ་དང་ཁོང་ཚོའི་རྒྱལ་ཁབ། ངའི་ཆོས་དང་ཁོང་ཚོའི་ཆོས། ཞེས་དབྱེ་བ་ཕྱེ་ཡི་ཡོད་པར་བརྟེན་ད་ཆ་དཀའ་ངལ་འཕྲད་ཀྱི་ཡོད།
ངོས་རང་རྒྱ་ནག་དང་ལྷན་དུ་གནས་ཐུབ་ངེས་ཡིན། ད་ཆ་རྒྱ་ནག་ནི་འཛམ་གླིང་ནང་པའི་མི་འབོར་མང་ཤོས་ཀྱི་རྒྱལ་ཁབ་ཅིག་ཡིན། ཏཱ་ལའི་བླ་མའི་སྒྲིག་འཛུགས་མུ་མཐུད་གནས་མ་གནས་ཟེར་བ་དེ་བོད་རྒྱ་ཆེ་མི་མང་ལ་རག་ལུས་ཡོད། ངོས་རང་ཇི་ཙམ་འཚོ་གནས་བྱེད་པའི་རིང་གཞན་ལ་ཕན་ཐོགས་བྱ་རྒྱུའི་འབད་བརྩོན་བྱེད་ཀྱི་ཡོད། ཚེ་ཕྱི་མ་ནི་ངོས་ཀྱི་ལས་དོན་མ་རེད། ངོས་རང་ཚེ་ཕྱི་མ་ཟླ་བའམ་གཟའ་སྐར་མིག་དམར་ནང་སྐྱེ་སྲིད་པ་རེད། ༼ ཞལ་ཤོབ་མཛད། ༽ ཅེས་བཀའ་སློབ་སྩལ།
སྤྱིར་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འཇར་མན་ནིའི་གསར་འགོད་པ་ཧྥི་རན་ཛི་ཨལ་ཊི་ (Franz Alt) ལགས་ཀྱིས་ལྗགས་རྩོམ་གནང་བའི་ང་ཚོའི་ཁྱིམ་གཞིས་ཁོ་ན་ཉིད། གོ་ལའི་གནམ་གཤིས་འགྱུར་ལྡོག་དང་འབྲེལ་བའི་འཛམ་གླིང་ཡོངས་ལ་གཞེན་སྐུལ་ (Our Only Home: A Climate Appeal to the World) ཞེས་པའི་དཔེ་དེབ་དེ་ཉིད་ཕྱི་ཚེས་ ༡༢ ཉིན་འདོན་སྤེལ་གནང་ཡོད་པ་དང་། དཔེ་དེབ་དེའི་ནང་མི་རབས་རྗེས་མའི་མདུན་ལམ་ལ་དམིགས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་གི་སྲིད་དོན་གྱི་ཐག་གཅོད་གནང་མཁན་ཡོངས་ལ་གོ་ལའི་གནམ་གཤིས་འགྱུར་ལྡོག་དང་ཁོར་ཡུག་སྲུང་སྐྱོབ་ཀྱི་གནད་དོན་ཐད་འཛིན་པའི་འགལ་ཟླའི་ལྟ་ཚུལ་རྣམས་སྤངས་ཏེ་གོ་ལའི་གནམ་གཤིས་འགྱུར་ལྡོག་དང་ཁོར་ཡུག་སྲུང་སྐྱོབ་སླད་ཐུན་མོང་གིས་འབད་བརྩོན་བྱེད་དགོས་པའི་རེ་སྐུལ་མཛད་པ་སོགས་འཁོད་ཡོད་འདུག་པ་བཅས། །
