ཕྱི་ལོ་ ༢༠༢༠ ཟླ་ ༡༡ ཚེས་ ༡༣ རེས་གཟའ་པ་སངས།
༄༅། །ཕྱི་ལོ་ ༢༠༢༠ ཟླ་ ༡༡ ཚེས་ ༡༢ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༣༣ སྤེལ་ཡོད་པ་དང་། གསལ་བསྒྲགས་ཞུ་མཁན་བོད་ལུགས་སྨན་པ་ཚེ་རིང་མཚམས་གཅོད་ལགས་དང་ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་ཡིན།
དང་པོ། ལས་དོན་ཚོགས་ཆུང་གི་གསར་འགོད་འབྲེལ་མཐུད་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་གྲུབ་ཐོན་མདོར་བསྡུས་ཞུས་དོན། འདས་པའི་བདུན་ཕྲག་ནང་ཁྱོན་བོད་མི་གྲངས་༡༣༤༠ ༼རང་ཁྱིམ། ༦༤༡ སྒྲིག་འཛུགས་ནས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༦༩༩ ༽ ཙམ་འགོག་དབྱེ་ཟུར་བཀག་ཐོག་བཞུགས་ཡོད་པ་དང་། གསོ་རིག་ལུས་སེམས་ནུས་གསོའི་སྨན་དེ་ད་བར་ཁྱོན་བོད་མི་སྐུ་ན་བགྲེས་པ་རྣམས་དང་། དེ་བཞིན་འགོག་དབྱེ་ཟུར་འཇོག་ཁང་དུ་བཞུགས་མཁན། སྨན་པ་དང་འཕྲོད་ལས་པ་སོགས་ཉེན་ཚབས་ཆེ་བའི་མི་གྲངས་བཅས་བསྡོམས་བོད་མི་གྲངས་ ༢༡༩༥༥ ལ་གསོ་རིག་ལུས་སེམས་ནུས་གསོའི་སྨན་བགོ་འགྲེམས་གནང་ཟིན། སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་ནང་ནད་གཞི་ཕོག་པའི་མི་གྲངས་ ༡༣༠ ལ་ཁ་པར་ཐོག་འབྲེལ་བ་གནང་བ་བརྒྱུད་སེམས་ཁམས་འཕྲོད་བསྟེན་ཐོག་སློབ་གསོ་ལམ་སྟོན་གནང་བ་དང་། ནད་ཡམས་ཁྱབ་གདལ་བཀག་འགོག་ཆེད་ས་གནས་སུ་ནད་གཞི་ཕོག་ཡོད་མེད་བརྟག་དཔྱད་བྱེད་བཞིན་ཡོད་པས་འདས་པའི་བདུན་ཕྲག་གཅིག་གི་ནང་རྒྱ་གར་ནང་གི་ས་གནས་གྲངས་ ༡༨ ནང་ཁྱོན་མི་གྲངས་ ༡༢༩༠ ལ་བརྟག་དཔྱད་གནང་ཡོད་པ་དང་། བལ་ཡུལ་ནང་གི་ས་གནས་གྲངས་ ༣ ནང་ཁྱོན་མི་གྲངས་ ༢༡ ལ་བརྟག་དཔྱད་གནང་ཡོད། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ལམ་སྟོན་གནང་བ་བཞིན་བོད་མིའི་འདུ་སྡོད་ས་གནས་གཞིས་ཆགས་ཁག་ལ་ནད་ཡམས་ཁྱབ་གདལ་བཀག་འགོག་ཆེད་ས་གནས་སྨན་ཁང་གིས་གཙོས་མི་མང་འདུ་འཛོམས་ཆེ་སར་དུག་སེལ་གནང་རྒྱུ་མཚོན་ཛ་དྲག་ཚོགས་ཆུང་གི་ཚོགས་འདུ་དུས་ཐོག་བསྐོང་ཚོགས་ཐོག་ལས་དོན་མུ་མཐུད་འགྲོ་བཞིན་པའི་གནས་ཚུལ་ཞུ།
གཉིས་པ། བཙན་བྱོལ་བོད་མིའི་སྤྱི་ཚོགས་ཁྲོད་གནས་སྟངས་ཇི་ཆགས་ཐད་འདས་པའི་བདུན་ཕྲག་གཅིག་གི་ནང་རྒྱ་གར་དང་བལ་ཡུལ་ནང་གི་བོད་མིའི་གཞིས་ཆགས་ཁག་ཏུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༡༣༤ བྱུང་ཡོད། ཞིབ་ཕྲ་ནི། ལ་དྭགས་ཁུལ་ནས་མི་གྲངས། ༢༧ ལྡི་ལི་ཁུལ་ནས་མི་གྲངས། ༥ རཱ་ཇི་པུར་གཞིས་ཆགས་ནས་མི་གྲངས། ༡ མོན་གྷོ་འདོད་རྒུ་གླིང་བོད་མིའི་གཞིས་ཆགས་ནས་མི་གྲངས། ༡༠ ཅོན་ཏཱ་རཱ་ཁུལ་ནས་མི་གྲངས། ༣ ཧོན་སུར་རབ་རྒྱས་གླིང་བོད་མིའི་གཞིས་ཆགས་ནས་མི་གྲངས། ༡ རྡ་ས་ནས་མི་གྲངས། ༡ མེའོ་ཆོས་འཕེལ་གླིང་བོད་མིའི་གཞིས་ཆགས་ནས་མི་གྲངས། ༡ ཌལ་ཧོར་ཕུན་ཚོགས་གླིང་བོད་མིའི་གཞིས་ཆགས་ནས་མི་གྲངས། ༢ བདེ་སྐྱིད་གླིང་གཞིས་ཆགས་ནས་མི་གྲངས། ༢ ཀེལ་མན་ཊོན་གཞིས་ཆགས་ནས་མི་གྲངས། ༡ སུ་ཇཱ་ཁུལ་ནས་བོད་རིགས་གྲངས། ༦༦ རྡོ་རྗེ་གླིང་གཞིས་ཆགས་ནས་མི་གྲངས། ༢ ཨོ་ཌི་ཤ་ཕུན་ཚོགས་གླིང་བོད་མིའི་གཞིས་ཆགས་ནས་མི་གྲངས། ༣ བཅས་རྒྱ་གར་ནང་མི་གྲངས་ ༡༢༥ བྱུང་ཡོད་པ་དང་། བལ་ཡུལ་ཀཐ་མན་ཌུ་ཁུལ་ནས་མི་གྲངས་ ༩ བཅས་ཁྱོན་མི་གྲངས་ ༡༣༤ བྱུང་བ་ནང་ནས་སྐྱེས་པ་གྲངས་ ༦༨ དང་བུད་མེད་གྲངས་ ༦༦ དགུང་ན་མཐོ་ཤོས་དེ་ ༩༦ དང་ཆུང་ཤོས་དེ་བྱིས་པ་མ་འབྱར་ཟླ་བ་ ༣ ཡིན་པ་རེད། དེའི་ནང་ནས་ནད་རྟགས་ཅུང་མངོན་པ་མི་གྲངས། ༣༧ དང་ནད་རྟགས་མེད་པ་མི་གྲངས། ༩༧ ཡིད་སྐྱོའི་གནས་ཚུལ་ཞིག་ལ་འདས་པའི་བདུན་ཕྲག་ནང་སྦེལ་ཀོབ་ཁུལ་ནས་སྐྱེས་པ་རང་ལོ་༨༥ སོན་པ་གཅིག་དང་། ལ་དྭགས་ཁུལ་ནས་སྐྱེས་པ་རང་ལོ་ ༧༨ དང་རང་ལོ་ ༦༨ སོན་པ་གཉིས་བཅས་མི་གསུམ་འདས་གྲོངས་སོང་ཡོད།
ད་བར་རྒྱ་གར་དང་བལ་ཡུལ་ནང་ཁྱོན་བོད་མི་ནད་གཞི་ཕོག་པ་གྲངས་ ༡༡༦༥ དྲག་སྐྱེད་བྱུང་བ་མི་གྲངས། ༧༧༢ འདས་གྲོངས་སོང་བ་མི་གྲངས། ༢༦ ད་ལྟ་ནད་མནར་བཞིན་པ་མི་གྲངས། ༣༦༧ བཅས་བྱུང་བའི་གནས་ཚུལ་ཞུ། ནད་གཞི་ཕོག་པ་རྣམས་ས་གནས་ཛ་དྲག་ཚོགས་ཆུང་དང་དེ་བཞིན་ཚོགས་པ་གྲྭ་ཚང་དང་སློབ་གྲྭའི་འཛིན་སྐྱོང་ནས་ལམ་སྟོན་དང་ཟུར་བཀག་ནན་པོ་བྱེད་ནས་བཞུགས་ཡོད་ཅིང་ནད་གཞི་ཕོག་པ་རྣམས་དམིགས་བསལ་ཛ་དྲག་མེད་པའི་གནས་སྟངས་ཡིན་འདུག་པ་བཅས།
གསུམ་པ། མི་མང་ལ་ཐུགས་སྣང་ལམ་སྟོན་ཞུ་རྒྱུ་གཙོ་བོ་ད་ཆ་རྒྱ་གར་ནང་ཕྱི་ཟླ་ ༡༡ ཤར་སྒོ་ཚུགས་ནས་ནད་གཞི་ཕོག་པའི་གྲངས་ཉིན་རེ་ནས་ཇེ་མང་དུ་ཕྱིན་ནས་འདས་པའི་ཆུ་ཚོད་ ༢༤ ནང་ཁྱོན་མི་གྲངས་ ༤༤༢༨༡ ཙམ་ལ་ནད་གཞི་ཕོག་པ་བྱུང་ཡོད། རྩ་བའི་རྒྱ་གར་ནང་དྲག་སྐྱེད་འབྱུང་བཞིན་པའི་བརྒྱ་ཆ་དེ་ ༩༢་༧༩ ཙམ་ཡིན་པས་ནད་མནར་བཞིན་པ་མང་པོ་དྲག་བསྐྱེད་ཕྱིན་ནས་ནད་གཞི་ཕོག་པའི་གྲངས་འབུམ་ལྔ་ནས་ད་ཆ་ ༤༩༤༦༥༧ བར་ཆག་ཡོད། འོན་ཀྱང་ནམ་དུས་འགྱུར་ལྡོག་དང་རྒྱ་གར་ནང་ཆོས་ཕྱོགས་དུས་ཆེན་མང་པོ་སླེབ་ལ་ཉེ་བས་ནད་ཡམས་ཀྱི་རྦ་རླབས་གཉིས་པ་ཡོང་མི་སྲིད་པ་མིན་པ་ཁྱད་ལས་པ་རྣམས་ཀྱི་གསུང་བཞིན་ཡོད་ན། རང་རིགས་བོད་མི་རྣམས་ཀྱིས་གཟབ་གཟབ་གནང་གལ་ཆེ་བ་ཡིན།
དེ་རྗེས་ད་ཉིན་ཟླ་ ༡༡ ཚེས་ ༡༢ ཉིན་མོ་དེ་འཛམ་གླིང་ Pneumonia ཉིན་མོ་ཞེས་སྲུང་རྩི་ཞུ་བཞིན་ཡོད་ན་གློ་ནད་འདིའི་རྐྱེན་གྱིས་སྔ་ལོ་ ༢༠༡༩ ལོར་མི་ས་ཡ་ཕྱེད་དང་གཉིས་ཙམ་འདས་གྲོངས་ཕྱིན་ཡོད་པ་དང་། འདི་ལོའི་ནད་ཡམས་རྐྱེན་པས་གློ་ནད་འདི་མནར་བའི་མི་གྲངས་ས་ཡ་ ༡་༩ སྟེ་བརྒྱ་ཆ་ ༧༥ ཙམ་གྱི་ཚེ་སྲོག་འགྲོ་སྲིད་པའི་ཉེན་ཁ་ཡོད་པ་དང་། འཛམ་གླིང་ནང་ལྷོ་ཨ་ཕི་རི་ཀ་དང་ཨེ་ཤ་ཡ། ལེ་ཊིན་ཨ་མི་རི་ཀའི་རྒྱལ་ཁབ་ནང་དམིགས་བསལ་བྱིས་པ་དང་ཕྲུག་གུ་གཞོན་ནུ། ལོ་ན་ ༦༥ ཡན་གྱི་རྒན་བགྲེས་རྣམས་ལ་གློ་ནད་འདིའི་ཉེན་ཁ་ཆེ་བ་ཡོད་ན་འབྲེལ་ཡོད་ཚང་མས་གཟབ་གཟབ་གནང་དགོས་གལ་ཆེ་བ་ཡིན།
བོད་ཀྱི་གསོ་བ་རིག་པ་ལས་གློ་བའི་ནད་གཞིར་རིགས་བརྒྱད་བསྟན་ཡོད་པས་ནད་རིགས་འདི་ཚོའི་རྒྱུ་རྐྱེན་གཙོ་བོ་ཟས་རུལ་སུངས། རོ་སྐྱུར་བ། ཤ་དང་མར་སོགས་རྙིང་པ། དུ་བ་དང་མཁའ་རླུང་འབག་བཙོག ཆམ་པ་འགྲམས་པ། ཤུགས་ལས་མང་པོ་བྱེད་པ་སོགས་ལས་གློ་བའི་ནད་ཀྱི་རྒྱུ་རྐྱེན་བྱེད་ཀྱི་ཡོད་པས་རྒྱུ་རྐྱེན་འདི་རིགས་སྤངས་པ་དང་རྒྱུན་དུ་ཆུ་གྲང་མོ་འཁྱག་ཆུ་དང་སྣུམ་སྲེག་ཟས་སོགས་ངེས་པར་སྤོང་དགོས་པ་ཡིན། གློ་ནད་འདི་རིགས་ལ་ཆུ་སྐོལ་འཐུང་བ་དང། སྦྲང་རྩི་དང་རྟ་སོ་མ། རྒུན་འབྲུམ་དང་། བ་ཡི་བཞོས་ཐོག་འོ་མ་དྲོན་མོ། མར་གསར་རིགས་བསྟེན་ན་ཕན་ངེས་ཡིན་པས་ད་ལན་གློ་ནད་ཉི་མོ་འདི་དང་འབྲེལ་ནས་ཟས་སྤྱོད་སྤང་བླང་དེ་ལྟར་ཤེས་དགོས་པའི་ལམ་སྟོན་གནང་བ་དང་ཆབས་ཅིག་ད་ལན་ཏོག་དབྱིབས་གཉན་རིམས་ ༡༩ འདི་གློ་བར་བབ་ན་ཚེ་སྲོག་ལ་ཉེན་ཁ་ཆེ་བ་ཡོད་པས་གློ་གཅོང་དང་གློ་བའི་གཉན་ཚད་ཡོད་པའི་མི་རྣམས་ནས་དམིགས་བསལ་ནད་ཡམས་ཁྱབ་གདལ་གྱི་དུས་སུ་གཟབ་གཟབ་གནང་དགོས་པ་དང་། གལ་ཏེ་གློ་ནད་དེས་མནར་བཞིན་པའི་མི་རྣམས་ཡིན་ན་སྨན་བཅོས་དུས་ཐོག་དང་མུ་མཐུད་བསྟེན་གལ་ཆེ་བའི་ལམ་སྟོན་ནན་སྐུལ་གནང་།
དེ་རྗེས་སྨན་པ་བསྟན་འཛིན་བརྩོན་འགྲུས་ལགས་ཀྱིས་དོགས་སེལ་ལམ་སྟོན་གནང་དོན། ཉེ་ཆར་གཞུང་འབྲེལ་མ་ཡིན་པའི་ཚོགས་པ་དང་གསར་འགོད་པ་ཁག་གཅིག་ལ་གློག་འཕྲིན་གཅིག་འབྱོར་ཡོད་པ་དང་། ད་ཐེངས་གཉིས་པ་དེ་ཆགས་ཀྱི་འདུག གློག་འཕྲིན་ཁ་བྱང་དེ་ <[email protected]> རེད་འདུག་པས་འདི་ནི་བདེ་ལེགས་སྨན་ཁང་གི་གློག་འཕྲིན་ཁ་བྱང་མིན་པ་གསལ་ནན་གསུངས། ཁ་སྔོན་ཕྱི་ཟླ་༨ ཚེས་ ༡༨ ཉིན་ཐོག་མར་གློག་འཕྲིན་འབྱོར་བའི་ནང་ (Handbook for public protection against Covid-19.rar ) ཞེས་པའི་ཡིག་ཆ་འདི་འདྲ་ཞིག་ཡིག་འཁྱམ་འགྲོ་བཞིན་པ་དེ་བདེ་ལེགས་སྨན་ཁང་ནས་མིན་པ་དང་། མང་ཚོགས་ནས་འདི་ལྟ་བུའི་གློག་འཕྲིན་འབྱོར་ཚེ་གློག་འཕྲིན་དང་མཉམ་སྦྱར་ཡིག་ཆ་དེ་རྩིས་མེད་དང་ཕབ་ལེན་མ་གནང་རོགས་ཅེས་འབོད་སྐུལ་ཞུས།
བདེ་ལེགས་སྨན་ཁང་ནས་ད་བར་གཞུང་འབྲེལ་གསལ་བསྒྲགས་རིགས་བོད་ཀྱི་བརྙན་འཕྲིན་བརྒྱུད་གནང་ཡོད་ལ་འབྱུང་འགྱུར་ཡང་བརྒྱུད་ལམ་འདི་ནས་གནང་རྒྱུ་ཡིན། དེ་ནས་མང་ཚོགས་ལ་དེ་སྔོན་ནས་རེ་སྐུལ་ཞུས་པ་བཞིན་ད་ལན་སླར་ཡང་ནན་སྐུལ་ཞུ་རྒྱུར། གལ་ཆེ་དོན་ཆེན་ཡིན་ན་མ་གཏོགས་ཕྱིར་འགྲུལ་བཞུད་མ་གནང་རོགས། ལྷག་པར་རྡ་ས་ཁུལ་དུ་མི་མང་པོ་ཞིག་ཡུལ་སྐོར་སྤྲོ་འཆམ་དང་གནས་མཇལ་སོགས་ལ་འགྲོ་བསྐྱོད་བྱེད་བཞིན་འདུག ཉེ་བའི་ཆར་དེ་འདྲའི་འགྲུལ་བཞུད་ལས་ནད་གཞི་ཕོག་པ་མང་པོ་བྱུང་ཡོད་ན། ཚང་མས་གལ་ཆེ་དོན་ཆེན་ཡིན་ན་མ་གཏོགས་གནས་སྐབས་འགྲུལ་བཞུད་མ་གནང་རོགས། ད་ལྟ་ནམ་དུས་དགུན་ཁ་སླེབ་ལ་ཉེ་བས་དགུན་ཁ་མི་མང་པོ་ནང་དུ་ཚ་གློག་བཏང་ནས་མཉམ་སྡོད་གནང་གི་ཡོད་སྟབས། ཁང་པའི་རླུང་འགྲོ་ཡག་པོ་མེད་པའི་རྐྱེན་གྱིས་ནད་གཞི་འགོས་ཉེན་ཆེ་བས་ཚང་མས་གང་གཟབ་གནང་གལ་ཆེ་བ་དང་། ནང་དུ་སོ་སོའི་ནང་མི་སྤུན་ཉེ་ཡིན་ན་ཁ་རས་གྱོན་ནས་སྡོད་ན་རང་གཞན་ཚང་མའི་སྲུང་སྐྱོབ་ལ་ཕན་ཐོགས་ཡོང་ངེས་ཡིན་པས་ཁ་རས་གྱོན་རྒྱུ་དང་། དེ་བཞིན་མིའི་དབར་འགྱངས་ཐག་འཇོག་རྒྱུ། ལག་པ་ཡང་སེ་འཁྲུ་བ་སོགས་སྔོན་འགོག་ཐབས་ལམ་མུ་མཐུད་བསྟེན་གནང་ཡོང་བའི་ནན་སྐུལ་སླར་ཞུས་གནང་བ་དང་།
དེ་ནས་བདུན་ཕྲག་སྔ་མར་ཞུས་པ་བཞིན་རྡ་ས་ཁུལ་དུ་ཡར་མར་རླང་འཁོར་ཆུང་བའི་ནང་འགྲུལ་བཞུད་བྱེད་པ་ལས་གཉན་སྲིན་འགོ་ཉེན་ཧ་ཅང་ཆེ་བ་དང་། ལྷག་པར་ནད་གཞི་འདིར་ནད་རྟགས་མེད་པ་མང་པོ་ཡོད་པས་མི་སུ་ལ་གཉན་སྲིན་ཡོད་མེད་ཤེས་རྟོགས་དཀའ་བས་ཚང་མས་རླང་འཁོར་ཆུང་བའི་ནང་འགྲོ་མི་དགོས་པ་གཙོ་འདོན་གནང་རོགས་ཞུ་བ་དང་ཆབས་ཅིག་མངའ་སྡེ་ནང་ཁུལ་འགྲུལ་བཞུད་བྱེད་དགོས་བྱུང་ཚེ་རླང་འཁོར་ཆེ་བ་རླུང་འགྲོ་བཀག་པ་Volvo Bus ནང་ཕེབས་མ་དགོས་པ་གཙོ་འདོན་གནང་རོགས། འགྲུལ་བཞུད་དུས་ཡུན་ཆུ་ཚོད་ ༦་་་་༨ བར་གནང་བ་དང་། རླང་འཁོར་ནང་རླུང་འགྲོ་མེད་པས་ནད་གཞི་འགོས་ཉེན་ཤིན་ཏུ་ཆེ་བ་ཡོད་ན་ཚང་མས་གཟབ་གཟབ་གནང་དགོས་པའི་ལམ་སྟོན་གནང་བ་དང་སྦྲགས་གསར་འགོད་གསལ་བསྒྲགས་ཐེངས་༣༣ པ་དེ་མཇུག་སྒྲིལ། །
