ཕྱི་ལོ་ ༢༠༢༠ ཟླ་ ༡༡ ཚེས་ ༡༣ རེས་གཟའ་པ་སངས།
༄༅ ། །ཕྱི་ལོ་ ༢༠༢༠ ཟླ་ ༡༡ ཚེས་ ༡༢ ཉིན་སུད་སིའི་སྐུ་ཚབ་དོན་གཅོད་ཁང་གི་གོ་སྒྲིག་འོག་ཇི་ནི་ཝའི་གླེང་སྟེགས་ཐེངས་གསུམ་པའི་བརྗོད་གཞི་གསུམ་པ་བོད་མིའི་བླ་སྤྲུལ་ངོས་འཛིན་ལམ་ལུགས་དང་། རྒྱ་ནག་དམར་ཤོག་གཞུང་གིས་དེར་ཅིའི་ཕྱིར་སྟངས་འཛིན་བྱེད་དགོས་སམ་ (Tibetan Buddhist System of Reincarnation and Why China wants to control it?) ཞེས་པའི་སྐོར་དྲ་རྒྱ་བརྒྱུད་བགྲོ་གླེང་ཚོགས་ཡོད།
དེ་ཡང་ཐོག་མར་ཕྱི་འབྲེལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་ཚོགས་འདུ་གཙོ་སྐྱོང་གནང་སྟེ་གསུང་དོན། བླ་སྤྲུལ་ངོས་འཛིན་ལམ་ལུགས་ནི་བོད་མིའི་ཐུན་མོང་མ་ཡིན་པའི་ཁྱད་ཆོས་ཤིག་ཡིན་པས་རྒྱ་ནག་དམར་ཤོག་གཞུང་ལ་སྟངས་འཛིན་བྱེད་རྒྱུ་ཐོབ་ཐང་རྩ་བ་ཉིད་ནས་མེད། ཅེས་སོགས་གསུངས།
དེ་ནས་བཞུགས་སྒར་རྡ་སར་རྟེན་གཞི་བྱས་པའི་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། བོད་ཀྱི་བླ་སྤྲུལ་ལམ་ལུགས་ནི་ཐོག་མར་དུས་རབས་ ༡༢ ནང་བོད་དུ་བྱུང་བ་དང་། དེ་ནས་རིམ་པས་སོག་པོ་དང་འབྲུག་ཡུལ་སོགས་ལ་དར་ཁྱབ་བྱུང་བའི་སྐོར་དང་། རྒྱ་ནག་གི་དམག་བྱུས་ལ་མཁས་པ་སུན་ཙི་ (Sun Tzu) ཟེར་བའི་སློབ་གསོའི་ཤུགས་རྐྱེན་ལ་བརྟེན་ནས་རྒྱ་ནག་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ལ་ཐེ་བྱུས་བྱེད་བཞིན་ཡོད། ཅེས་དང་། རྒྱལ་སྤྱིའི་ཚོགས་སྡེ་ཁག་དང་འགོ་ཁྲིད་ཚོས་རྒྱ་ནག་གཞུང་གི་བཤད་སྟངས་ལ་ཡིད་ཆེས་གནང་གི་མེད། ཅེས་གསུངས།
དེ་རྗེས་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་སོག་ཡུལ་ནང་བླ་སྤྲུལ་ངོས་འཛིན་ལམ་ལུགས་དུས་རབས་ ༡༧ ནང་བྱུང་བ་དང་། སོག་ཡུལ་ནང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་དང་ངོས་འཛིན་ལ་བསྟུན་ནས་བླ་སྤྲུལ་ངོས་འཛིན་ཞུ་གི་ཡོད། འོན་ཀྱང་རྒྱ་ནག་གིས་གནོན་ཤུགས་སྤྲད་པར་བརྟེན་སོག་པོའི་སྐྱབས་རྗེ་རྗེ་བཙུན་དམ་པ་སྐུ་ཕྲེང་ ༡༠ པའི་ཡང་སྲིད་ངོས་འཛིན་ཞུ་ཐུབ་མེད་པའི་སྐོར་དང་། རྒྱ་ནག་གཞུང་གིས་བོད་དང་སོག་པོའི་བླ་སྤྲུལ་ངོས་འཛིན་ལམ་ལུགས་ལ་ཐེ་བྱུས་བྱེད་བཞིན་པ་ནི་ཁུངས་ལུང་གང་ཡང་མེད་པ་མ་ཟད། སོག་པོས་བོད་མིའི་བླ་སྤྲུལ་ངོས་འཛིན་ལམ་ལུགས་ལ་རྒྱབ་སྐྱོར་ཞུ་རྒྱུ་ལས་རྒྱ་ནག་གི་ཐུབ་ཚོད་ལ་མགོ་སྒུར་གནང་གི་མ་རེད། ཅེས་སོགས་གསུངས།
དེ་ནས་ཉི་ཧོང་སྐུ་ཚབ་དོན་ཨརྱ་ཚེ་དབང་རྒྱལ་པོ་ལགས་ཀྱིས། གུ་རུ་རིན་པོ་ཆེ་དང་མཁན་ཆེན་ཞི་བ་འཚོས་བོད་ནང་ནང་ཆོས་ངོ་སྤྲོད་གནང་རྗེས་ནང་ཆོས་བོད་ཀྱི་གཞུང་འབྲེལ་གྱི་ཆོས་ལུགས་ཆགས་པའི་སྐོར་དང་། ཀརྨ་པ་དུས་གསུམ་མཁྱེན་པ་སྐུ་ཕྲེང་དང་པོ་རབ་བྱུང་གསུམ་པའི་ཆུ་གླང་ཕྱི་ལོ་ ༡༡༩༣ ལོར་དགུང་ལོ་བརྒྱད་ཅུ་རྩ་བཞིའི་ཐོག་སྐུ་མྱ་ངན་ལས་ལ་འདས་རྗེས་ཀརྨ་པ་སྐུ་ཕྲེང་གཉིས་པ་ཀརྨ་པཀྵི་ཆོས་ཀྱི་བླ་མ་རབ་བྱུང་གསུམ་པའི་ཤིང་བྱི་ ༡༢༠༤ ལོར་འཁྲུངས་ཤིང་། ཀརྨ་དུས་གསུམ་མཁྱེན་པ་སྐུ་ཕྲེང་དང་པོའི་ཡང་སྲིད་དུ་དངོས་འཛིན་ཞུས་ཡོད། དེ་ནས་བཟུང་བོད་ནང་བླ་སྤྲུལ་ངོས་འཛིན་ལམ་ལུགས་དར་འགོ་བཙུགས། རྒྱ་ནག་གཞུང་གིས་ཁུངས་ལུང་རྒྱུ་མཚན་གང་ཡང་མེད་པའི་ཐོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་ལ་ཐེ་བྱུས་བྱེད་བཞིན་པར་མཐའ་གཅིག་ཏུ་ངོ་རྒོལ་ཡོད། ཅེས་སོགས་གསུངས།
དེ་རྗེས་རྩོམ་པ་པོ་པེར་ནོ་ཝར་ནི་ Pierno Verni ལགས་ཀྱིས། བོད་ཀྱི་བླ་སྤྲུལ་ངོས་འཛིན་ལམ་ལུགས་སྤྱི་དང་། ལྷག་པར་བོད་ཀྱི་བླ་སྤྲུལ་ངོས་འཛིན་ལམ་ལུགས་ནི་རྒྱ་ནག་དམར་ཤོག་གཞུང་གིས་བོད་དབང་སྒྱུར་མ་བྱས་གོང་ནས་བོད་ནང་དར་ཡོད་པ་སོགས་ཀྱི་སྐོར་གསུངས།།
