ཕྱི་ལོ་ ༢༠༢༠ ཟླ་ ༡༡ ཚེས་ ༢༣ རེས་གཟའ་ཟླ་བ།

༄༅། །ཕྱི་ལོ་ ༢༠༢༠ ཟླ་ ༡༡  ཚེས་ ༢༠ ཉིན་གྱི་ཕྱི་དྲོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཨ་རིའི་ཕོ་བྲང་དཀར་པོའི་ནང་གཞུང་འབྲེལ་མགྲོན་འབོད་གནང་བ་ཆེས་ཐོག་མ་དེ་ཆགས་ཀྱི་ཡོད་སྟབས། ཕྱི་དྲིལ་བོད་ཀྱི་བརྙན་འཕྲིན་ཚན་པའི་མདོ་འཛིན་པ་བསྟན་འཛིན་འཆི་མེད་ལགས་ཀྱིས་དཔལ་ལྡན་སྲིད་སྐྱོང་མཆོག་ལ་ཐེངས་འདིའི་མཇལ་འཕྲད་ཀྱི་གལ་གནད་དང་། མི་སྣ་སུ་དང་སུ་མཇལ་འཕྲད་གནང་བ་སོགས་ཀྱི་སྐོར་བཅར་འདྲི་ཞུས་པ་ཁག་གཤམ་གསལ།

བསྟན་འཛིན་འཆི་མེད་ལགས། བོད་མི་མང་ཚོགས་ཀྱིས་འོས་འདེམས་བྱས་པའི་འགོ་ཁྲིད་ཅིག་ཨ་རིའི་ཕོ་བྲང་དཀར་པོའི་ནང་ཆེས་ཐོག་མར་ཕེབས་ཏེ་གཞུང་འབྲེལ་ཐོག་གནད་ཡོད་མི་སྣ་མཇལ་འཕྲད་གནང་བར་འཚམས་འདྲི་དང་འབྲེལ་ཨ་རིའི་ཕོ་བྲང་དཀར་པོའི་ནང་མི་སྣ་སུ་དང་སུ་མཇལ་འཕྲད་གནང་ཡོད་སྐོར་དང་བཀའ་མོལ་ཇི་བྱུང་སྐོར་ངོ་སྤྲོད་གནང་རོགས། 

དཔལ་ལྡན་སྲིད་སྐྱོང་མཆོག  གཞི་རྩའི་ཨ་རིའི་སྲིད་འཛིན་དང་སྲིད་འཛིན་གཞོན་པའི་ལས་ཁུངས་ཀྱི་སྐུ་ཚབ་རྣམ་པ་དང་། དེ་བཞིན་ཨེ་ཤི་ཡ་དང་རྒྱ་ནག་ཐོག་ཕྱག་ལས་གནང་མཁན་གཙོ་བོར་གྱུར་པའི་ཨ་རིའི་ཕོ་བྲང་དཀར་པོའི་གནད་ཡོད་མི་སྣ་ཁག་གཅིག་དང་ལྷན་མཇལ་འཕྲད་ཀྱིས་བོད་ནང་གི་ཛ་དྲག་གནས་སྟངས་དང་། རྒྱ་ནག་གཞུག་གིས་བོད་ས་བཙན་བཟུང་བྱས་ནས་བོད་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་དང་། དཔལ་འབྱོར་དབྱེ་འབྱེད། ཆོས་དད་རང་དབང་མེད་པ། ཁོར་ཡུག་གཏོར་བཤིག་བཏང་དང་གཏོང་བཞིན་པ་སོགས་ཀྱི་གནད་དོན་སྤྱི་དང་། ལྷག་པར་ཉེ་ཆར་བོད་དང་ཤར་ཏུར་ཀི་སི་ཐན་སྐོར་རང་དབང་གི་ཉམས་ཞིབ་པ་ཨེ་ཌི་རི་ཨན་ཛན་ཛི་ (Adrian Zenz) ལགས་ཀྱིས་བརྗོད་པ་ལྟར་ན། བོད་རང་སྐྱོང་ལྗོངས་དབུལ་སྐྱོར་གསར་སྤེལ་ལས་དོན་ཞེས་པའི་སྲིད་བྱུས་འོག་རྒྱ་ནག་གཞུང་གིས་བོད་ནང་ངལ་རྩོལ་བསྒྱུར་བཀོད་ཁང་ཞེས་པ་གསར་འཛུགས་བྱས་ཏེ་ཕྱི་ལོ་ ༢༠༢༠ ལོའི་ལོ་འགོ་ནས་བཟུང་ཕྱི་ཟླ་ ༧ བར་ཁྱོན་བོད་མི་འབུམ་ལྔ་ལྷག་བཙན་དབང་གིས་ངལ་རྩོལ་བསྒྱུར་བཀོད་ཁང་དུ་བཅུག་ནས་ངལ་རྩོལ་བྱེད་དུ་འཇུག་གི་ཡོད་པ་མ་ཟད། བོད་མི་རྣམས་ལ་བཙན་གྱིས་ལྟ་བ་བསྒྱུར་ཐབས་བྱས་པ་དང་།  སོ་ལྟའི་པར་ཆས་བཙུགས་པ། ཉེས་ཆད་ལྕི་མོ་བཅད་པ། རིག་གཞུང་རྩ་མེད་བཏང་བ། དམག་མི་ལྟ་བུའི་སྦྱོང་བརྡར་སྤྲད་ཀྱི་ཡོད་སྐོར་དང་། དབུ་མའི་ལམ་གྱི་སྲིད་བྱུས་གཞིར་བཞག་ཐོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཐོབ་ཐབས་སྐོར་ཞུས་པ་ཡིན། 

བསྟན་འཛིན་འཆི་མེད་ལགས། ཐེངས་འདིར་ཨ་རིའི་གཞུང་གིས་བོད་མིའི་སྒྲིག་འཛིགས་ཀྱི་སྲིད་སྐྱོང་མཆོག་ཨ་རིའི་ཕོ་བྲང་དཀར་པོའི་ནང་གདན་ཞུ་གནང་ཡོད་པ་དེའི་གང་མཚོན་གྱི་ཡོད་པ་དང་། ད་བར་བོད་མི་མང་ཚོགས་ཀྱི་འོས་འདེམས་བྱས་པའི་འགོ་ཁྲིད་ཨ་རིའི་གཞུང་གིས་ཕོ་བྲང་དཀར་པོའི་ནང་གདན་ཞུ་གནང་མི་ཐུབ་པའི་རྒྱུ་མཚན་གང་ཡིན་ནམ། 

དཔལ་ལྡན་སྲིད་སྐྱོང་མཆོག ལོ་དྲུག་ཅུའི་རིང་འབད་བརྩོན་གནང་བ་ཞིག་ལ་ངོས་འཛིན་གྱི་ཡོད། ལྷག་པར་འདས་པའི་ལོ་ངོ་དགུའི་ནང་འབད་བརྩོན་གནང་ཡོད། ཨ་རིའི་ཕྱི་སྲིད་ལས་ཁུངས་དང་ཕོ་བྲང་དཀར་པོའི་ངོས་ནས་ཁྱེད་རང་བཙན་བྱོལ་བོད་མིའི་སྒྲིག་འཛུགས་ཀྱི་ཆབ་སྲིད་ཀྱི་འགོ་ཁྲིད་ཡིན་སྟབས། གལ་ཏེ་ཁྱེད་རང་ཨ་རིའི་ཕྱི་སྲིད་ལས་ཁུངས་དང་ཕོ་བྲང་དཀར་པོའི་ནང་སླེབ་པ་ཡིན་ན། བཙན་བྱོལ་བོད་མིའི་སྒྲིག་འཛུགས་ལ་ཨ་རིའི་གཞུང་ནས་ངོས་འཛིན་བྱེད་པ་ཆགས་ཀྱི་ཡོད་པར་བརྟེན་རྒྱ་ནག་གཞུང་གིས་གནོན་ཤུགས་ཡོང་གི་རེད་ཅེས་དུས་རྒྱུན་དུ་བཤད་ཀྱི་ཡོད། ངས་ཁོང་རྣམས་ལ་གལ་ཏེ་དེ་ལྟར་ཡིན་ན་ཁྱེད་རྣམས་ཀྱིས་སི་རི་ཡ་ (Syria) དང་ཝེ་ནི་ཛུ་ལའི་ (Venezuela) བཙན་བྱོལ་གཞུང་གདན་འདྲེན་ཞུས་ཡོད་པ་དང་། ང་ཚོ་བོད་མི་རྣམས་ད་བར་སྒུག་སྟེ་ལོ་དྲུག་ཅུ་ཕྱིན་ཡོད་སྐོར་ཞུས་ཡོད། 

ཟླ་བ་སྔོན་མའི་ནང་ཨ་རིའི་ཕྱི་སྲིད་ལས་ཁུངས་སུ་གཞུང་འབྲེལ་ཐོག་མགྲོན་འབོད་དང་། ད་ལམ་ཨ་རིའི་ཕོ་བྲང་དཀར་པོའི་ནང་བཅར་རྒྱུའི་གོ་སྐབས་བྱུང་བ་ནི་བོད་མིའི་སྒྲིག་འཛུགས་དང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསོལ་རས་སྩལ་བའི་མང་གཙོའི་ལམ་ལུགས། དེ་བཞིན་བོད་མི་མང་ཚོགས་ཀྱིས་འོས་འདེམས་བྱས་པའི་སྲིད་སྐྱོང་བཅས་ལ་ངོས་ལེན་གནང་བ་ཙམ་དུ་མ་ཟད། ཆབ་སྲིད་ཀྱི་ཐོག་ནས་ཧ་ཅང་གནད་འགག་ཆེན་པོ་རེད། ཅེས་ཞུ་རྒྱུ་ཡིན། བོད་མིའི་སྒྲིག་འཛུགས་ལ་ངོས་ལེན་བྱེད་པ་ཆགས་སྟབས་ལོ་རྒྱུས་དང་ཆབ་སྲིད་གཉིས་ཀའི་ཐོག་ནས་གལ་ཆེན་པོ་རེད། 

བསྟན་འཛིན་འཆི་མེད་ལགས། བདུན་ཕྲག་སྔོན་མའི་ནང་ཨ་རིའི་གྲོས་ཚོགས་འོག་མའི་ནང་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གནས་བབ་ཀྱི་གལ་ཆེ་རང་བཞིན་ལ་ངོས་འཛིན་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞེ་བདེ་དང་འཚེ་མེད་ཞི་བའི་ལྟ་གྲུབ་ཉམས་ལེན་བཅས་རླབས་ཆེན་གྱི་མཛད་འཕྲིན་བསྐྱངས་དང་སྐྱོང་བཞིན་པར་ཡི་རང་ཞུས་པའི་ཁྲིམས་འཆར་ཞིག་གཏན་འབེབས་གནང་ཡོད། ཁྲིམས་འཆར་དེའི་གལ་གནད་རང་བཞིན་དང་། ལྷག་པར་དབུ་མའི་ལམ་གྱི་སྲིད་བྱུས་སྐོར་ཁྲིམས་འཆར་ཐོག་མར་བྱུང་སྟངས། ཁྲིམས་འཆར་དེའི་ནང་ནས་དོན་ཚན་གཅིག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་གྲོས་ཚོགས་ནང་གདན་ཞུ་གནང་རྒྱུའི་སྐོར་འཁོད་འདུག དེའི་སྐོར་ལ་ངོ་སྤྲོད་རོབ་ཙམ་ཞིག་གནང་རོགས། 

དཔལ་ལྡན་སྲིད་སྐྱོང་མཆོག དེ་ནི་ལོ་གཅིག་ཙམ་གྱི་གོང་ལ་རེད། ཨ་རིའི་གྲོས་ཚོགས་འཐུས་མི་སྐུ་ཞབས་ཊེཌ་ཡོ་ཧོ་ (Ted Yoho) མཆོག་ནི་རྒྱ་ནག་གུང་བྲན་ཏང་ལ་མཐའ་གཅིག་ཏུ་ངོ་རྒོལ་བྱེད་མཁན་ཞིག་རེད་འདུག ཁོང་གིས་མཇལ་འཕྲད་བྱུང་བར་དགའ་པོ་བྱུང་མུ་མཐུད་འབྲེལ་བ་བཞག་དགོས་སྐོར་གསུངས་སོང་། མཇལ་འཕྲད་ཐེངས་གཉིས་པའི་སྐབས་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་གྲོས་ཚོགས་སུ་གདན་འདྲེན་ཞུ་རྒྱུ་ཡིན་སྐོར་གསུངས་བྱུང་། སྐབས་དེར་ངས་༸རྒྱལ་བའི་གཟིམ་ཆུང་དུ་སྙན་སེང་ཞུ་ཆོག ཅེས་ཞུས་པ་ཡིན། གཟིམ་ཆུང་དུ་སྙན་སེང་ཞུས་ཏེ་ཞལ་བཞེས་བཟང་པོ་ཐོབ་སྐོར་ཁོང་ལ་ཞུས་པར་ཁོང་གིས་ཨ་རིའི་གྲོས་ཚོགས་ནང་གྲོས་ཆོད་བཞག་སྟེ་གཞུང་འབྲེལ་རང་གི་ཐོག་ནས་གདན་འདྲེན་ཞུ་རྒྱུ་ཡིན། ཞེས་གསུངས་བྱུང་། ད་རེས་གྲོས་ཆོད་བཞག་གནང་བ་རེད། གྲོས་ཆོད་དེར་སྤྱི་མཐུན་ཚོགས་པ་དང་མང་གཙོ་ཚོགས་པའི་ཚོགས་མི་ཡོངས་ཀྱིས་སྤྱི་མོས་ཐོག་བཞག་གནང་བ་དེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་འཕྲིན་ཁག་ལ་ངོས་འཛིན་དང་། དབུ་མའི་ལམ་གྱི་སྲིད་བྱུས་ལ་ཨ་རིིའི་གྲོས་ཆོགས་ཀྱི་གྲོས་ཆོད་བཞག་པ་ཕལ་ཆེར་ད་རེས་ཐེངས་དང་པོ་ཆགས་ཀྱི་ཡོད། བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་དགོས་ཞེས་པ་དེ་རེད།

དེ་སྔ་ཡིན་ན་ང་ཚོས་བོད་རྒྱ་གྲོས་མོལ་དགོས་ཞེས་བརྗོད་ཀྱི་ཡོད། ད་རེས་ང་ཚོས་ཨ་རི་དང་། ཁེ་ན་ཌ། ཡོ་རོབ། ཉི་ཧོང་སོགས་ཀྱི་གཞུང་ལ་དང་ཐོག་དབུ་མའི་ལམ་གྱི་སྲིད་བྱུས་ལ་ངོས་འཛིན་གནང་རོགས་ཞེས་འབོད་སྐུལ་ཞུ་བཞིན་ཡོད། ཐེངས་འདིར་ཨ་རིའི་གྲོས་ཚོགས་ནང་དབུ་མའི་ལམ་གྱི་སྲིད་བྱུས་ལ་ངོས་ལེན་གནང་བ་དང་། བོད་མིའི་མངོན་འདོད་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་དགོས་ཞེས་པ་འདི་ངའི་བསམ་པར་འཐབ་བྱུས་ཐོག་ལ་གལ་ཆེན་པོ་ཞིག་རྩི་ཡི་ཡོད། གང་ཡིན་ཟེར་ན། སྲིད་བྱུས་གཏན་འབེབས་དང་ངོས་ལེན་གནང་བའི་རྗེས་མིང་དོན་མཚུངས་པའི་རང་སྐྱོང་ཇི་ལྟར་ཐོབ་ཀྱི་རེད་དམ། ཞེ་ན། བོད་རྒྱ་གྲོས་མོལ་གྱི་ལམ་ནས་ཡོང་གི་རེད། ཨ་རིའི་གཞུང་གི་གནོན་ཤུགས་བརྒྱུད་ནས་ཡོང་གི་རེད། དེ་བཞིན་རྒྱ་ནག་གཞུང་གི་དྭངས་བླངས་ཐོག་ནས་ཡོང་གི་རེད། བོད་མི་རྣམས་ལ་དགོས་རྒྱུ་ནི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་རེད། ཅེས་ཧ་ཅང་ཁ་གསལ་པོ་ཆགས་ཐུབ་པ་འདི་དབུ་མའི་ལམ་གྱི་སྲིད་བྱུས་གལ་ཆེན་པོ་རྩི་ཡི་ཡོད། དབུ་མའི་ལམ་གྱི་སྲིད་བྱུས་སྐོར་རྒྱལ་ཁབ་བཅུ་བཞི་ཙམ་གྱི་གྲོས་ཚོགས་ནང་གླེང་སློང་བྱུང་ཡོད། ད་རེས་ཨ་རིའི་གྲོས་ཚོགས་ནང་གྲོས་ཆོད་བཞག་ཐུབ་པ་དེ་ཆབ་སྲིད་ཐོག་ནས་གནད་འགག་ཆེན་པོ་ཞིག་ཡིན་པར་བརྟེན་ཨ་རིིའི་གྲོས་ཚོགས་འཐུས་མི་སྐུ་ཞབས་ཊི་ཌི་ཡོ་ཧོ་ (Ted Yoho) མཆོག་གིས་གཙོས་རྒྱབ་སྐྱོར་གནང་མཁན་གྲོས་ཚོགས་འཐུས་མི་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། བདུན་ཕྲག་གཉིས་རྗེས་ཕལ་ཆེར་ཁོང་མཇལ་གྱི་རེད། སྐབས་དེ་དུས་ཀྱང་ཞུ་ཆོག་གི་རེད།  ཅེས་གསུངས། །