ཕྱི་ལོ་ ༢༠༢༠ ཟླ་ ༡༡ ཚེས་ ༡༢ རེས་གཟའ་ཕུར་བུ། 

༄༅། །བི་ཧཱར་མངའ་སྡེའི་གྲོས་ཚོགས་ཀྱི་འོས་བསྡུ་གནང་བའི་སྐབས་ཞབས་སྟེགས་ ༢༤༣ ཁྲོད་ནས་ཞབས་སྟེགས་ ༡༢༥ བི་ཧཱར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏིཤ་ཀུ་མཱར་ Nitish Kumar མཆོག་གིས་དབུ་ཁྲིད་པའི་རྒྱལ་ཡོངས་མང་གཙོ་མནའ་འབྲེལ་ཚོགས་པར་ (National Democratic Alliance ) མང་མོས་ཀྱི་རྒྱལ་ཁ་ཐོབ་པར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དགའ་བསུའི་གསུང་འཕྲིན་ཞིག་གནང་བའི་ནང་འཁོད་དོན། སྐུ་ཉིད་མཆོག་སླར་ཡང་བི་ཧཱར་མངའ་སྡེའི་སྤྱི་ཁྱབ་བློན་ཆེན་དུ་བདམས་ཐོན་བྱུང་བར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་དགའ་བསུའི་འཚམས་འདྲི་ཞུ་རྒྱུ་ཡིན།

སྐུ་ཉིད་ཀྱིས་ཡང་དག་པའི་དབུ་ཁྲིད་དང་འཛིན་སྐྱོང་འོག་བི་ཧཱར་མི་མང་གི་ཤེས་ཡོན་དང་། སྤྱི་ཚོགས་ཡར་རྒྱས། བུད་མེད་ནུས་སྟོབས་གོང་འཕེལ་སོགས་ཀྱི་ཐད་ཞབས་འདེགས་རླབས་ཆེན་ཞུས་ཡོད་པ་ནི་དངོས་གནས་དྲང་གནས་ཡིད་སྨོན་བྱེད་འོས་པ་ཞིག་རེད། ཐེངས་འདིའི་འོས་བསྡུ་བརྒྱུད་བི་ཧཱར་མི་མང་གིས་སྐུ་ཉིད་མཆོག་ལ་སླར་ཡར་ཡིད་ཆེས་བློ་གཏད་བརྟན་པོ་ཞུས་ཡོད། ཅེས་དང་།
བི་ཧཱར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏིཤ་ཀུ་མཱར་མཆོག་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་རྣམས་ཀྱི་བློས་ཐུབ་ཀྱི་གྲོགས་པོ་ཞིག་ཡིན། བི་ཧཱར་མངའ་སྡེ་ནི་བོད་མི་དང་འཛམ་གླིང་གི་ནང་པ་ཡོངས་ཀྱི་ཆོས་ཕྱོགས་ཀྱི་གནས་མཆོག་ཅིག་ཆགས་ཡོད་པ་དང་། བི་ཧཱར་མངའ་སྡེ་དེ་བཞིན་གནས་མཇལ་བའི་བསྟི་གནས་ཤིག་ཏུ་བསྒྱུར་ཐབས་སུ་སྐུ་ཉིད་མཆོག་གིས་འཛུགས་སྐྲུན་ཡར་རྒྱས་གཏོང་བཞིན་པར་ཐུགས་རྗེ་ཆེ་ཞུ་རྒྱུ་ཡིན། ཕྱི་ལོ་ ༡༩༥༦ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་གྱིས་གཙོས་རྒྱ་གར་གྱི་གནས་ཆེན་ཁག་གཅིག་ལ་གནས་མཇལ་མཛད་སྐབས་ངོས་ཀྱི་ནང་ལ་སླེབས་པ་ལྟ་བུའི་ཚོར་སྣང་བྱུང་ཞེས་བྲིས་གནང་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་གསུང་ཆོས་དང་དུས་འཁོར་དབང་ཆེན་སྩལ་བའི་སྐབས་སྐུ་ཉིད་མཆོག་གིས་སྣེ་ལེན་དང་མཐུན་འགྱུར་གང་ལེགས་བསྐྲུན་གནང་བར་དུས་རྟུག་ཏུ་ཐུགས་རྗེ་ཆེ་ཞུ་རྒྱུ་ཡིན། སྤྱི་ཁྱབ་བློན་ཆེན་མཆོག་གིས་བི་ཧཱར་མངའ་སྡེ་དེ་བཞིན་གང་ཅིའི་ཐད་ནས་ཡར་རྒྱས་དང་འཆམ་མཐུན་གྱི་སྤྱི་ཚོགས་ཚད་མཐོ་ཤོས་ཤིག་བསྐྲུན་ཐུབ་པའི་ང་ཚོར་གདེང་ཚོད་ཡོད། སླར་ཡང་ཡང་སྐུ་ཉིད་མཆོག་ལ་སྙིང་ཐག་པ་ནས་དགའ་བསུའི་འཚམས་འདྲི་ཞུ་རྒྱུ་ཡིན། ཞེས་འཁོད།།