ཕྱི་ལོ་ ༢༠༢༠ ཟླ་ ༡༡ ཚེས་ ༤ རེས་གཟའ་ལྷག་པ།
༄༅། །ཕྱི་ལོ་ ༢༠༢༠ ཟླ་ ༡༠ ཚེས་ ༣༠ ཉིན་རྒྱབ་ཆུ་ཚོད་ ༣།༣༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་དང་འཕྲོད་བསྟེན་བཀའ་བློན་མཆོག་རྣམ་གཉིས་དབུ་བཞུགས་ཐོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་དང་སྦེལ་ཀོབ་ལུགས་བསམ་དང་བདེ་སླར་བཅས་ཀྱི་ས་གནས་འགོ་འཛིན་གྱིས་གཙོས་ས་གནས་ཛ་དྲག་ཚོགས་ཆུང་གི་ཚོགས་མི་དང་དགོན་སྡེ་གྲྭ་ཚང་ཁག་གི་མཁན་རིན་པོ་ཆེ། འཕྲོད་བསྟེན་དྲུང་ཆེ་དང་ལས་དོན་ཚོགས་ཆུང་གི་སློབ་སྟོན་སྨན་པ་དང་། འཕྲོད་བསྟེན་འབྲེལ་ཡོད་ལས་བྱེད་བཅས་ཚང་འཛོམས་ཀྱིས་ས་གནས་སུ་ཏོག་དབྱིབས་གཉན་རིམས་ ༡༩ ནད་ཡམས་ཁྱབ་གདལ་བཀག་འགོག་ཐོག་ཚོགས་འདུ་བསྐོང་ཚོགས་གནང་ཡོད།
དེ་ཡང་ཚོགས་འདུའི་ཐོག་མར་འཕྲོད་བསྟེན་དྲུང་ཆེ་དཔལ་ལྡན་དོན་འགྲུབ་ལགས་ཀྱིས་ད་ཆ་མོན་གྷོ་དང་སྦེལ་ཀོབ་གཞིས་ཆགས་སུ་ནད་ཡམས་ཁྱབ་གདལ་ཆེ་ཆེར་འགྲོ་བཞིན་པར་དབུས་ནས་ད་བར་ལམ་སྟོན་དང་ལས་དོན་ཇི་གནང་སྙིང་བསྡུས་ཞུས་རྗེས། དོན་དངོས་ད་ཆ་ས་གནས་ས་ཐོག་ཏུ་དཀའ་ངལ་ཇི་འཕྲད་དང་། དེར་གདོང་ལེན་གནང་ཕྱོགས་ཐད་ས་གནས་སོ་སོ་ནས་དགོངས་འཆར་ཇི་ཡོད་གྲོས་བསྡུར་གནང་རྒྱུ་ཡིན་པའི་ངོ་སྤྲོད་གནང་།
ཚོགས་བཅར་ཚོགས་མའི་ཁོངས་དགོན་སྡེ་གྲྭ་ཚང་ཁག་གི་མཁན་རིན་པོ་ཆེ་རྣམས་ནས་གཙོ་བོ་ལྷོ་ཕྱོགས་གཞིས་ཆགས་ནང་དགོན་སྡེ་གྲྭ་ཚང་མང་པོ་ཡོད་པས་དགོན་པའི་ཤག་ཚང་གཅིག་ནང་དགེ་འདུན་པ་གྲངས་ཉི་ཤུ་ཙམ་མཉམ་དུ་བཞུགས་པ་དང་། གསང་སྤྱོད་འཁྲུ་ཁང་ཡང་མཉམ་སྤྱོད་བྱེད་བཞིན་པ་དེའི་རྐྱེན་གྱིས་དགོན་སྡེ་གྲྭ་ཚང་ནས་ནད་གཞི་འདི་འགོས་ཉེན་ཆེ་བ་དང་ཁྱབ་གདལ་མྱུར་བའི་མྱོང་བྱང་དང་། དེ་བཞིན་ས་གནས་སུ་སྨན་ཞབས་འདང་ངེས་མེད་པའི་མི་ཆའི་དཀའ་ངལ་དང་། ནད་པ་ཛ་དྲག་སྨན་བཅོས་བྱེད་དགོས་པ་རྣམས་ལ་འཚོ་རླུང་ Oxygen Cylinder ཐོབ་དཀའ་བའི་དཀང་ངལ་རྣམས་སྙན་གསང་ཞུས།
གཞན་ཡང་བོད་སྨན་གྱིས་ཕན་བསྐྱེད་ཆེན་པོ་འབྱུང་བཞིན་པས་སྨན་རྩིས་ཁང་ནས་བོད་སྨན་མུ་མཐུད་སྐྱབས་འཇུག་ཡོང་བ་དང་གྲྭ་ཚང་ཁག་ནང་ཁྲག་ཤེད་དང་གཅིན་སྙིའི་ནད་གཞི་ཡོད་པ་རྣམས་ལ་ཟས་བཅུད་ཐོག་ཆེད་ལས་སློབ་སྟོན་དང་། གྲྭ་ཚང་གི་སློབ་གྲྭ་སླར་སྒོ་ཕྱེ་ཕྱོགས་དང་འབྲེལ་བའི་ཆེད་ལས་ལམ་སྟོན་མུ་མཐུད་གནང་གལ་ཆེ་བ་སོགས་ཀྱི་དགོངས་འཆར་གསུངས།
ལས་དོན་ཚོགས་ཆུང་གི་སློབ་སྟོན་པ་རྣམ་པ་གཉིས་ནས་ཀྱང་ནད་ཡམས་ཁྱབ་གདལ་ལ་གཙོ་བོ་སྔོན་འགོག་ཐབས་ལམ་མུ་མཐུད་དོ་ནན་བསྟེན་དགོས་པ་དང་། ས་གནས་སུ་ཁྲག་ཤེད་དང་གཅིན་སྙི་སོགས་གཅོང་ནད་ཡོད་པ་རྣམས་ངོ་འཕྲོད་པའི་ཐོག་སྲུང་སྐྱོབ་གནང་གལ་དང་། རྒྱལ་ཁབ་ནང་སྒོ་རྒྱ་ལྷོད་གཡེང་ཕྱེ་སྐབས་མང་ཚོགས་ནས་ལྷོད་གཡེང་ཤོར་བ་ལ་བརྟེན་ནས་ནད་པ་མང་དུ་འགྲོ་བཞིན་ཡོད་པས་ཚང་མས་གཟབ་གཟབ་གནང་དགོས་པའི་ལམ་སྟོན་གནང་།
དེ་བཞིན་ཆེད་ལས་མི་སྣ་འདང་ངེས་མེད་སར་བོད་མིའི་སྒྲིག་འཛུགས་ནས་མཐུན་འགྱུར་སྦྱར་གལ་ཆེ་བ་དང་། ས་གནས་ས་ཐོག་ཏུ་ནད་ཡམས་ཁྱབ་གདལ་བཀག་འགོག་ཆེད་ས་གནས་འགོ་འཛིན་དང་དགོན་སྡེ་གྲྭ་ཚང་གི་མཁན་པོ་ལས་སྣེ་རྣམས་ནས་སྟངས་འཛིན་དོ་དམ་ནན་པོ་གནང་དགོས་པའི་ལམ་སྟོན་གནང་དགོས་པ་དང་། དཔལ་འབྱོར་རོགས་རམ་ཆེད་ཕྱི་རྒྱལ་རོགས་ཚོགས་གཅིག་པུ་མིན་པ་བོད་པས་བོད་མིར་རོགས་ཕན་བྱེད་ཐབས་འབད་བརྩོན་གནང་དགོས་གལ་ཆེ་བའི་ལམ་སྟོན་གནང་།
དེ་རྗེས་དཔལ་ལྡན་སྲིད་སྐྱོང་མཆོག་གིས་གསུང་དོན། བོད་མིའི་སྒྲིག་འཛུགས་ནས་དེ་སྔ་ནད་ཡམས་ཁྱབ་གདལ་བྱུང་བ་ནས་བཟུང་བོད་མིའི་གཞིས་ཆགས་ཁག་དང་། ལྷག་པར་མོན་གྷོ་དང་སྦེལ་ཀོབ་ལྟ་བུ་གཞིས་ཆགས་ཆེ་ཁག་ལ་མི་མང་བས་ཉེན་ཚབས་དང་འགྲོ་སོང་ཡང་ཆེ་བས་ད་བར་ཁྱོན་འབུམ་ ༥༨ ཙམ་མོན་གྷོ་གཞིས་ཆགས་ཆེད་སོང་ཟིན་ཞིང་ཁྱོན་རྒྱ་གར་དང་བལ་ཡུལ་ནང་རོགས་དངུལ་ས་ཡ་ལྔ་ཙམ་འགྲོ་སོང་དང་།སྒྲིག་འཛུགས་ནས་དམིགས་བསལ་རོགས་དངུལ་ཧིན་སྒོར་འབུམ་ ༡༥༠ ཙམ་ནད་ཡམས་འདིའི་ཆེད་བཏང་ཟིན། ས་གནས་སུ་སྨན་ཞབས་པ་འདང་ངེས་མེད་པ་སོགས་ཀྱི་མཐུན་འགྱུར་ཐད་སྒྲིག་འཛུགས་ནས་ཞུ་ངེས་ཡིན། དེ་བཞིན་གསོ་བ་རིག་པའི་ཐོག་ནས་ལུས་སེམས་ནུས་གསོའི་སྨན་དེའང་སུམ་ཆ་གཉིས་བོད་མིའི་སྒྲིག་འཛུགས་དང་སུམ་ཆ་གཅིག་བོད་ཀྱི་སྨན་རྩིས་ཁང་ནས་གནང་བཞིན་པས་ད་བར་སྨན་རྩིས་ཁང་ལ་ཧིན་སྒོར་འབུམ་ ༤༦ ཙམ་ཕུལ་ཟིན། སློབ་གྲྭ་སྒོ་ཕྱེ་ཕྱོགས་དང་འབྲེལ་ཉེ་ཆར་ཤེས་རིག་བཀའ་བློན་མཆོག་གིས་ལམ་སྟོན་གནང་ཟིན་པ་དང་། ཟས་བཅུད་སློབ་སྟོན་པ་སོགས་བོད་ཀྱི་བརྙན་འཕྲིན་ནང་དེ་སྔ་ལས་རིམ་མང་པོ་གོ་སྒྲིག་ཞུས་པས་བོད་ཀྱི་བརྙན་འཕྲིན་ཐོག་གཟིགས་རྒྱུ་ཡོད་སྐོར་སོགས་གསུངས།
ཚོགས་འདུ་མཇུག་མ་སྒྲིལ་གོང་འཕྲོད་བསྟེན་བཀའ་བློན་མཆོག་གིས་ད་བར་དབུས་སའི་ལས་སྣེ་དང་། ས་གནས་སུ་དགོན་སྡེ་གྲྭ་ཚང་དང་དང་ཞབས་བཅས་ཚང་མས་ཐུགས་འགན་ཧ་ཅང་ཆེན་པོ་བཞེས་ཤིང་མཉམ་རུབ་ཐོག་ནས་ནད་ཡམས་འདིར་གདོང་ལེན་བྱེད་བཞིན་པར་ཡི་རང་བསྔགས་བརྗོད་དང་ས་གནས་སུ་འཕྲོད་བསྟེན་སྨན་ཁང་གི་སྨན་པ་དང་འཕྲོད་ལས་འགན་འཛིན་བཅས་ནས་མི་མང་གི་འཕྲོད་བསྟེན་བདེ་རྩར་ཞབས་འདེགས་ཧུར་བསྐྱེད་གནང་བར་དམིགས་བསལ་ཐུགས་རྗེ་ཆེ་ཞུས་གནང་། ད་དུང་ཡིན་ནའང་མུ་མཐུད་མཉམ་རུབ་དང་འདི་ནས་ལམ་སྟོན་མཐུན་འགྱུར་སྦྱར་དགོས་རིགས་གང་ཐུབ་ཞུ་རྒྱུ་དང་། ད་ལྟའི་ནད་ཡམས་འདི་ལས་སློབ་གསོ་ལེན་ནས་འབྱུང་འགྱུར་འདི་ལྟའི་ནད་ཡམས་འབྱུང་སྐབས་གདོང་ལེན་བྱེད་སྒོར་བསྒྱུར་བཅོས་ཡར་རྒྱས་གཏོང་གལ་ཆེ་བའི་ལམ་སྟོན་དང་སྦྲགས་ཐུགས་རྗེ་ཆེ་ཞུའི་གསུང་བཤད་གནང་ནས་ཚོགས་འདུ་མཇུག་སྒྲིལ་གནང་ཡོད།།
