ཕྱི་ལོ་ ༢༠༢༠ ཟླ་ ༡༡ ཚེས་ ༡༤ རེས་གཟའ་སྤེན་པ།

ཕྱི་ལོ་ ༢༠༡༨ ཟླ་ ༥ ནང་རྡ་སར་དཔལ་་ལྡན་སྲིད་སྐྱོང་མཆོག་དང་ལྡི་ལིའི་ཨ་རིའི་གཞུང་ཚབ་ཆེན་མོ་མཆོག་རྣམ་གཉིས་མཇལ་འཕྲད་སྐབས།

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་ལོ་ ༢༠༢༠ ཟླ་ ༡༡ ཚེས་ ༡༣ ཉིན་གྱི་ཉིན་རྒྱབ་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཨ་རིའི་གཞུང་ཚབ་ཁང་དུ་ཨ་རིའི་གཞུང་ཚབ་ཆེན་མོ་སྐུ་ཞབས་ཀེན་ནེ་ཐི་ཨི་ཨན་ཇ་སི་ཊར་ (Kenneth Ian Juster) མཆོག་དང་ཆུ་ཚོད་གཅིག་ཙམ་རིང་མཇལ་འཕྲད་ཀྱིས་གནད་དོན་ཁག་གཅིག་གི་སྐོར་བཀའ་མོལ་གནང་ཡོད།

དེ་ཡང་དཔལ་ལྡན་སྲིད་སྐྱོང་མཆོག་གིས། སྐུ་ཞབས་ཀེན་ནེ་ཐི་ཨི་ཨན་ཇ་སི་ཊར་མཆོག་ནི་ཡུན་རིང་བོད་དོན་ལ་རྒྱབ་སྐྱོར་གནང་མཁན་དང་། ངའི་གྲོགས་པོ་བཟང་པོ་ཞིག་ཡིན་པ་མ་ཟད། ངེད་གཉིས་ཨ་རིའི་ཧ་ཝར་ཌི་གཙུག་ལག་སློབ་ཐོན་པའི་མཆེད་གྲོགས་ཤིག་ཀྱང་ཡིན། ཞེས་གསུངས།

དཔལ་ལྡན་སྲིད་སྐྱོང་མཆོག་དང་ཨ་རིའི་གཞུང་ཚབ་ཆེན་མོ་སྐུ་ཞབས་ཀེན་ནེ་ཐི་ཨི་ཨན་ཇ་སི་ཊར་མཆོག་ད་བར་ཐེངས་དགུ་ཙམ་མཇལ་འཕྲད་གནང་ཡོད།

ཕྱོགས་མཚུངས་དཔལ་ལྡན་སྲིད་སྐྱོང་མཆོག་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཝི་ཝེ་ཀ་ནནྡཱ་རྒྱལ་སྤྱིའི་ཐེབས་རྩ་ཁང་ (Vivekananda International Foundation) གི་གོ་སྒྲིག་འོག་གསང་རྒྱའི་བོད་དོན་སྐོར་གྱི་བགྲོ་གླེང་ཚོགས་འདུའི་ཐོག་མཉམ་ཞུགས་དང་། དེ་བཞིན་རྒྱལ་སྤྱིའི་ཡུ་གུར་ལྷན་ཚོགས་ (World Uyghur Congress) ནས་དྲ་ལམ་བརྒྱུད་རྒྱལ་སྤྱིའི་ཚོགས་འདུའི་སྟེང་གསུང་བཤད་གནང་མཁན་གཙོ་བོར་མགྲོན་འབོད་ཞུས་པ་ལྟར་མཉམ་ཞུགས་གནང་བ་དང་། གཞན་ཡང་ཇི་ནི་ཝ་གླེང་སྟེགས་ཐེངས་གསུམ་པའི་མཇུག་སྡོམ་གསུང་བཤད་ཡང་གནང་ཡོད་པ་བཅས།།