ཕྱི་ལོ་ ༢༠༢༠ ཟླ་ ༡༡ ཚེས་ ༡༦ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༡༡ ཚེས་ ༡༤ རེས་གཟའ་སྤེན་པ་ཉིན་ཐེ་ཝན་རིག་གཞུང་ལྷན་ཁང་གིས་གཙོ་གཉེར་ཐོག་བོད་སོག་རིག་གཞུང་བཤམས་སྟོན་ཁང་ནང་༼བོད་ཀྱི་རིག་གཞུང་འཕེལ་རྒྱས་དང་གསར་སྐྲུན་བགྲོ་གླེང་།༽ཚོགས་འདུ་ཞིག་བསྐོང་ཚོགས་གནང་ཡོད་པ་རེད། ཉིན་གཅིག་གི་བགྲོ་གླེང་ཚོགས་འདུ་འདི་བཞིན་ཚོགས་ཐེངས་ཁག་གསུམ་ལ་ཆ་བགོས་ཀྱིས་བོད་ཀྱི་རིག་གཞུང་ཐོག་རྒྱུས་མངའ་ཆེ་བའི་མཁས་དབང་དང་ཆེད་ལས་མི་སྣས་གནའ་བོའི་བོད་ཀྱི་ཁྲིམས་ལུགས་དང་། བོད་ཀྱི་སྒྱུ་རྩལ་སོགས་ཀྱི་བརྗོད་གཞིའི་ཐོག་མི་གྲངས་ ༨ ཀྱིས་དཔྱད་རྩོམ་སྒྲོགས་སྦྱང་དང་། བརྗོད་གཞི་ཁག་སོ་སོའི་ཐོག་དབྱེ་ཞིབ་དཔྱད་གླེང་བ་མི་གྲངས་ ༨ ནས་རྩོམ་ཡིག་ནང་དོན་དང་འབྲེལ་བའི་ཐོག་དཔྱད་གཏམ་སྤེལ་རྗེས། ཚོགས་ཞུགས་པའི་དྲི་བར་ལན་འདེབས་བཅས་གོ་སྒྲིག་གནང་ཡོད་པ་རེད།
ཚོགས་ཐེངས་དང་པོའི་བརྗོད་གཞི་གཙོ་བོ་བོད་ཀྱི་གནའ་བོའི་ཁྲིམས་ལུགས་དང་། བོད་ཀྱི་འཁྲབ་གཞས། བོད་ཀྱི་སྲོལ་རྒྱུན་རི་མོའི་སྐོར་ཡིན་ཞིང་། ཐེ་ཝན་དོན་གཅོད་ཟླ་བ་ཚེ་རིང་ལགས་ཀྱིས་༼གནའ་བོའི་བོད་ཀྱི་ཁྲིམས་ལུགས་ནང་མི་སྟོང་འཇལ་བ་དང་། མནའ་སྐྱེལ་ལམ་སྲོལ་ལས་ནང་ཆོས་ཀྱི་ཤུགས་རྐྱེན་སྐོར།༽ ཞེས་པའི་བརྗོད་གཞིའི་ཐོག་ལོ་རྒྱུས་ཡིག་ཆ་དང་ཆོས་འབྱུང་ཁག་ལ་གཞི་བཅོལ་ཏེ་གནའ་བོའི་བོད་མིའི་ཐུན་མོང་མ་ཡིན་པའི་ཁྲིམས་ལུགས་ཐོག་ནས་ཉེས་ཁྲིམས་ཐག་གཅོད་བྱེད་སྟངས་ཐད་ནང་ཆོས་ཀྱི་ཤུགས་རྐྱེན་དང་འབྲེལ་ནས་ཐག་གཅོད་བྱེད་ཀྱི་ཡོད་སྐོར་དཔེ་མཚོན་དང་སྦྲགས་ངོ་སྤྲོད་གནང་བར། དབྱེ་ཞིབ་དཔྱད་གླེང་པས་བརྗོད་གཞི་འདི་བཞིན་ཐེ་ཝན་ནང་ཧ་ལམ་དཔྱད་རྩོམ་སྤེལ་མཁན་མེད་པ་ལྟ་བུ་ཡིན་པས་ཤེས་བྱ་གསར་པ་ཤེས་རྟོག་ཡོང་བར་ཕན་ཐོགས་ཆེན་པོ་ཡོད་སྐོར་སོགས་ངོ་སྤྲོད་གནང་རྗེས། ཚོགས་བཅར་བའི་དྲི་བར་ལན་འདེབས་བཅས་གནང་ཡོད་པ་རེད།
ཐེ་ཝན་རིག་གཞུང་ལྷན་ཁང་ནས་གཙོ་བོ་བོད་ཀྱི་རིག་གཞུང་དང་འབྲེལ་བའི་ལས་འགུལ་སྣ་མང་གོ་སྒྲིག་གནང་ཡོད་ཅིང་། ནང་དོན་ཐད་འགྲེམས་སྟོན་གྱི་ལམ་ནས་བོད་མིའི་རིག་གཞུང་ངོ་སྤྲོད་དང་། ལེགས་སྦྱར་ཁོངས་སློབ་འབྲིང་དང་མཐོ་སློབ་ཀྱི་གཞོན་སྐྱེས་ཚོའི་ཆུ་ཚད་ལ་གཞིགས་པའི་བགྲོ་གླེང་གོ་སྒྲིག་གནང་ཡོད་པ་མ་ཟད། ཐེངས་འདིའི་བགྲོ་གླེང་ནི་ཆེད་ལས་ཀྱི་རིག་གཞུང་བགྲོ་གླེང་ཞིག་ཡིན་པ་རེད། །
