ཕྱི་ལོ་ ༢༠༢༠ ཟླ་ ༡༡ ཚེས་ ༢༣ རེས་གཟའ་ཟླ་བ།
༄༅། །ཕྱི་ལོ་ ༢༠༢༠ ཟླ་ ༡༡ ཚེས་ ༢༢ ཉིན་ཉི་ཧོང་ནང་ཡོད་པའི་བོད་རིགས་སྤྱི་མཐུན་ཚོགས་པའི་སྐུ་ཚབ་རྣམ་པ་ཉི་ཧོང་སྐུ་ཚབ་དོན་གཅོད་ཁང་དུ་ཚོགས་འདུ་ཚོགས་པ་དང་འབྲེལ་ཉི་ཧོང་སྐུ་ཚབ་དོན་གཅོད་གསར་པ་ཨརྱ་ཚེ་དབང་རྒྱལ་པོ་ལགས་ལ་ཕེབས་བསུ་གནང་ཡོད། སྐབས་དེར་བོད་མི་ ༣༠ ཙམ་ཚོགས་འདུར་མཉམ་ཞུགས་གནང་ཡོད།
དེ་ཡང་ཚོགས་འདུའི་ཐོག་ཉི་ཧོང་སྐུ་ཚབ་དོན་གཅོད་གསར་པ་ཨརྱ་ཚེ་དབང་རྒྱལ་པོ་ལགས་ཀྱིས། ཉི་ཧོང་ནང་ཡོད་པའི་བོད་མི་ཚོས་མ་འོངས་པར་བོད་དོན་སླད་ལས་དོན་གནང་ཕྱོགས་སྐོར་གསུང་དོན། ད་ཆ་ཏོག་དབྱིབས་གཉན་རིམས་འཛམ་གླིང་ཡོངས་ལ་ཁྱབ་བརྡལ་འགྲོ་བཞིན་པའི་སྐབས་འདིར་ཉི་ཧོང་དབུས་གཞུང་དང་ས་གནས་གྲོང་སྡེ་ལས་ཁུངས་ཀྱིས་ཏོག་དབྱིབས་གཉན་རིམས་སྔོན་འགོག་ལམ་སྟོན་གནང་བ་ཁག་ལ་བོད་མི་ཚོས་བརྩི་སྲུང་ཞུས་ཏེ་ཏོག་དབྱིབས་གཉན་རིམས་སྔོན་འགོག་ཐད་གང་གཟབ་གནང་དགོས་པ་དང་། རྒྱ་ནག་གཞུང་གི་དྲག་གནོན་འོག་དཀའ་སྡུག་མྱོང་བཞིན་པའི་གཞིས་ལུས་བོད་རིགས་སྤུན་ཟླ་ཚོའི་མངོན་འདོད་བསྒྲུབ་དགོས་པ་ཡིད་ལ་བཅངས་ནས་ཉི་ཧོང་ནང་ས་གནས་ཁག་སོ་སོར་གནས་པའི་བོད་རིགས་སྤུན་ཚོས་རྡོག་རྩ་གཅིག་སྒྲིལ་གནང་དགོས་པའི་གལ་གནད་སྐོར་གསུང་བ་མ་ཟད། ཉི་ཧོང་ནང་ཡོད་པའི་བོད་མི་ཚོ་གཞིས་བྱེས་བོད་མིའི་སྐུ་ཚབ་མཚོན་གྱི་ཡོད་སྟབས། མི་རེ་ངོ་རེའི་ཕྲག་ཏུ་འགན་ཆེན་པོ་ཡོད་པ་སོགས་ཀྱི་སྐོར་གསུངས།
ཚོགས་འདུའི་ཐོག་བོད་རིགས་སྤྱི་མཐུན་ཚོགས་པའི་སྐུ་ཚབ་རྣམ་པས་ལས་དོན་མཐའ་དག་འཐུས་སྒོ་ཚང་བའི་ཐོག་བོད་མི་ནང་ཁུལ་རྡོག་རྩ་གཅིག་སྒྲིལ་གྱི་སྟོབས་ཤུགས་སྔར་ལས་ལྷག་གོང་འཕེལ་གཏོང་རྒྱུ་ཡིན་པའི་ཐག་གཅོད་གནང་ཡོད། ཕྱོགས་མཚུངས་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་སེམས་འགུལ་ཐེབས་པའི་གསུང་བཤད་གནང་བ་དང་། དེ་བཞིན་ཏོག་དབྱིབས་གཉན་རིམས་ཀྱི་ཉེན་ཁར་མ་འཛེམས་པར་ཉི་ཧོང་བོད་རིགས་སྤྱི་མཐུན་ཚོགས་པའི་སྐུ་ཚབ་རྣམ་པ་ཚོགས་འདུར་བཅར་བར་ཉི་ཧོང་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་ལྡན་ལགས་ཀྱིས་ཐུགས་རྗེ་ཞུས་ཡོད་པ་བཅས། །
