ཕྱི་ལོ་ ༢༠༢༠ ཟླ་ ༡༠ ཚེས་ ༨ རེས་གཟའ་ཕུར་བུ།
༄༅། །ཨོ་སི་ཀྲོ་ལི་ཡ་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་འོག་ཕྱི་ལོ་ ༢༠༢༠ ཟླ་ ༡༠ ཚེས་ ༡༠ རེས་གཟའ་སྤེན་པའི་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ཆ་ཤས་སུ་ཆབ་སྲིད་བཙོན་ཟུར་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་གླེང་བ་ཞེས་པའི་དྲ་རྒྱའི་ལམ་ནས་བགྲོ་གླེང་ཐེངས་གཉིས་པ་ཞིག་བསྐོང་ཚོགས་གནང་གཏན་འཁེལ་འདུག་པ་དང་། བགྲོ་གླེང་ཐོག་ཆབ་སྲིད་བཙོན་ཟུར་ཆུང་ཚེ་རིང་ལགས་ཀྱིས་མགོན་པོ་གང་ཉིད་མཆོག་གིས་ཤེས་རིག་ཐོག་བཀའ་དྲིན་ཇི་ལྟར་བསྐྱངས་པའི་སྐོར་དང་། ཆབ་སྲིད་བཙོན་ཟུར་གྲྭ་བག་གྲོ་ལགས་ཀྱིས་ཆབ་སྲིད་ཀྱི་བཀའ་དྲིན་ཇི་ལྟར་བསྐྱངས་པའི་སྐོར། ཆབ་སྲིད་བཙོན་ཟུར་ངག་དབང་སྟོབས་ཆེན་ལགས་ཀྱིས་ཆོས་དང་རིག་གཞུང་ཐོག་བཀའ་དྲིན་ཇི་ལྟར་བསྐྱངས་པའི་སྐོར། ཆབ་སྲིད་འབྲེལ་ཆགས་ཟུར་པ་འཇིགས་མེད་ནོར་བུ་ལགས་ཀྱིས་ཁོར་ཡུག་ཐོག་བཀའ་དྲིན་ཇི་ལྟར་བསྐྱངས་པ་བཅས་ཀྱི་སྐོར་ལ་བགྲོ་གླེང་གནང་རྒྱུ་ཡིན་ཞིང་།
དྲ་ཐོག་བགྲོ་གླེང་དེ་བཞིན་ཨོ་སི་ཀྲོ་ལི་ཡ་སྐུ་ཚབ་དོན་གཅོད་མཚོ་སྒོ་ལྷག་པ་ལགས་ཀྱིས་གཙོ་སྐྱོང་འོག་གོང་ཚེས་ཉིན་རྒྱ་གར་ནང་གི་སྔ་དྲོའི་ཆུ་ཚོད་ ༩ དང་། ཨོ་གླིང་ནང་གི་ཕྱེད་ཡོལ་ཆུ་ཚོད་ ༢།༣༠ ཐོག་ཕྱི་དྲིལ་བོད་ཀྱི་བརྙན་འཕྲིན་གྱི་ངོ་དེབ་བརྒྱུད་ཐད་སྲིང་གནང་རྒྱུ་ཡིན་འདུག་པ་བཅས། །
