ཕྱི་ལོ་ ༢༠༢༠ ཟླ་ ༡༠ ཚེས་ ༢༡ རེས་གཟའ་ལྷག་པ།
༄༅། །ཕྱི་ལོ་ ༢༠༢༠ ཟླ་ ༡༠ ཚེས་ ༡༥ ཉིན་ཨ་རིའི་ཕྱི་སྲིད་ལྷན་ཁང་ནས་གཞུང་འབྲེལ་ཐོག་ཐེངས་དང་པོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཨ་རིའི་ཕྱི་སྲིད་ལྷན་ཁང་གི་སྤྱི་ཁྱབ་ལས་ཁུངས་ཧར་རེ་ཊི་རུ་མན་ Harry S. Truman building ནང་གཞུང་འབྲེལ་མགྲོན་འབོད་གནང་སྟེ་བོད་མིའི་སྒྲིག་འཛུགས་དང་ཨ་རིའི་དབར་གྱི་འབྲེལ་ལམ་ཡར་རྒྱས་གོང་འཕེལ་ལོ་རྒྱུས་རང་བཞིན་ལྡན་པ་ཞིག་བསྐྲུན་ཡོད།
སྐབས་དེར་འོས་བསྡུའི་ལམ་ནས་བདམས་ཐོན་བྱུང་བའི་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཉེ་ཆར་ཨ་རི་གཞུང་གིས་བསྐོ་གཞག་གནང་བའི་ཨ་རིའི་བོད་དོན་དམིགས་བསལ་འབྲེལ་མཐུད་པ་གསར་པ་སྐུ་ཞབས་རོ་བྷར་ཊི་ཌེ་སི་ཊི་རོ་ Robert A. Destro མཆོག་དང་ཐུག་འཕྲད་གནང་ཡོད། དཔལ་ལྡན་སྲིད་སྐྱོང་མཆོག་དང་ཨ་རིའི་བོད་དོན་དམིགས་བསལ་འབྲེལ་མཐུད་པ་གསར་པ་སྐུ་ཞབས་རོ་བྷར་ཊི་ཌེ་སི་ཊི་རོ་ Robert A. Destro མཆོག་ལོ་རྒྱུས་རང་བཞིན་ལྡན་པའི་ཐུག་འཕྲད་གནང་བའི་གནས་ཚུལ་སྐོར་རྒྱལ་སྤྱིའི་གསར་འགྱུར་བརྒྱུད་ལམ་གྲགས་ཅན་ཁག་གི་ནང་ཐོན་མ་ཐག་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ཀྲའོ་ལི་ཇན་ Zhao Lijian གྱིས་ཨ་རི་གཞུང་གིས་བོད་དོན་དམིགས་བསལ་འབྲེལ་མཐུད་པ་སྐུ་ཞབས་རོ་བྷར་ཊི་ཌེ་སི་ཊི་རོ་མཆོག་བསྐོ་གཞག་གནང་བ་དེ་ཆབ་སྲིད་ཀྱི་གཡོ་བཀོལ་དང་རྒྱ་ནག་གི་ནང་སྲིད་ལ་ཐེ་ཇུས། བོད་ནང་བརྟན་ལྷིང་མེད་པར་གཏོང་ཆེད་བཟོས་པ་རེད་ཅེས་སྐྱོན་བརྗོད་བྱས་ཡོད་པ་མ་ཟད། ཕྱི་ཚེས་ ༢༠ ཉིན་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ཀྲའོ་ལི་ཇན་གྱིས་གཞུང་འབྲེལ་ཉིན་རེའི་གསར་འགོད་གསལ་བསྒྲགས་སྤེལ་སྐབས་སུའང་ཤེས་བཞིན་དུ་བཙན་བྱོལ་བོད་གཞུང་ནི་ཁ་བྲལ་གྱི་ཚོགས་པ་ཞིག་ཡིན་ཞིང་། ཚོགས་པ་དེས་རང་བཙན་རྩོད་ཀྱི་ཡོད་པ་རེད། ཅེས་དང་།
བཙན་བྱོལ་བོད་གཞུང་ཟེར་བ་དེ་བོད་རང་བཙན་རྩོད་ལེན་བྱེད་མཁན་གྱི་ཁ་བྲལ་ཆབ་སྲིད་ཚོགས་པ་ཞིག་རེད། ཚོགས་པ་དེས་རྒྱ་ནག་གི་རྩ་ཁྲིམས་ལ་རྩིས་མེད་རྡོག་རོལ་གཏོང་བཞིན་པ་དང་། རྒྱལ་ཁབ་སུ་ཞིག་གིས་བཙན་བྱོལ་བོད་གཞུང་ཟེར་བ་དེ་ངོས་འཛིན་བྱེད་ཀྱི་མེད། བཙན་བྱོལ་བོད་གཞུང་ཟེར་བ་དེའི་འགོ་ཁྲིད་བློ་བཟང་སེངྒེ་ཡིན་པ་དང་། ཁོང་ནི་རྒྱ་ནག་དང་ཁ་བྲལ་གྱི་ལས་འགུལ་སྤེལ་མཁན་ཞིག་རེད། བློ་བཟང་སེངྒེ་ཡིས་རྒྱ་ནག་ཁ་བྲལ་གྱི་ལས་འགུལ་སྤེལ་བཞིན་པར་ངོ་རྒོལ་དང་། དེ་བཞིན་རྒྱལ་ཁབ་གང་རུང་གི་དཔོན་རིགས་མི་སྣས་ཁོང་ལ་འབྲེལ་བ་བྱས་ན་རྒྱ་ནག་གིས་དེར་ངོ་རྒོལ་བྱེད་ཀྱི་ཡོད། ཅེས་སྐྱོན་བརྗོད་བྱས་ཡོད།
བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མི་རིགས་ས་གནས་རང་སྐྱོང་གི་བཅའ་ཁྲིམས་སུ་གསལ་བའི་རང་སྐྱོང་གི་ཆ་རྐྱེན་རྣམས་གཞིར་བཞག་ཐོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཐོབ་ཐབས་སུ་འབད་བརྩོན་གནང་བཞིན་པ་རྒྱལ་སྤྱིའི་ཐོག་ནས་ངོས་འཛིན་གནང་ཡོད།
ཀྲའོ་ལི་ཇན་གྱིས་དཔལ་ལྡན་སྲིད་སྐྱོང་མཆོག་ཁ་བྲལ་བ་དང་རང་བཙན་གཙང་མ་རྩོད་ཀྱི་ཡོད་པ་རེད་ཅེས་འཁྱོག་བཤད་ཀྱི་སྐྱོན་བརྗོད་བྱས་པ་དེས་དོན་དངོས་སུ་བོད་ཀྱི་རྩ་དོན་ལ་སྣང་མེད་དུ་གཏོང་གི་ཡོད་པ་མཚོན་གྱི་ཡོད། དཔལ་ལྡན་སྲིད་སྐྱོང་མཆོག་གིས་རྒྱ་ནག་གཅིག་གི་སྲིད་བྱུས་གཞིར་བཞག་ཐོག་དབུ་མའི་ལམ་གྱི་སྲིད་བྱུས་དགོངས་དོན་ལྟར་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་རྩོད་ཀྱི་ཡོད་ཀྱང་། རྒྱ་ནག་གི་མགྲིན་ཚབ་པས་ཨ་རིའི་གཞུང་ལའང་སྐྱོན་བརྗོད་བྱས་ཡོད།
གཞན་ཡང་ཀྲའོ་ལི་ཇན་གྱིས། ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་རོ་བྷར་ཊི་ཌེ་སི་ཊི་རོ་མཆོག་གིས་བློ་བཟང་སེངྒེ་མཆོག་དང་ཐུག་འཕྲད་གནང་བ་དེས་ཨ་རི་གཞུང་གིས་བོད་རང་བཙན་ཞེས་པར་རྒྱབ་སྐྱོར་བྱེད་ཀྱི་མེད་པ་དང་། བཙན་བྱོལ་བོད་གཞུང་ངོས་འཛིན་བྱེད་ཀྱི་མེད་པའི་སྲིད་བྱུས་ལངས་ཕྱོགས་ལ་གཏོར་བཤིག་བཏང་ཡོད་པ་མ་ཟད། ཐུག་འཕྲད་དེས་བོད་རང་བཙན་གྱི་ལས་འགུལ་སྤེལ་བའི་བརྡ་ལན་ནོར་འཁྲུལ་ཚབས་ཆེན་ཞིག་བཟོས་ཡོད། ཅེས་སྐྱོན་བརྗོད་བྱས་ཡོད།
དངོས་གནས་བྱས་ན་དཔལ་ལྡན་སྲིད་སྐྱོང་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་གསར་པ་སྐུ་ཞབས་རོ་བྷར་ཊི་ཌེ་སི་ཊི་རོ་མཆོག་ལ་ཐུག་འཕྲད་གནང་བ་དེས་རྒྱ་ནག་གཞུང་ལ་བརྡ་ལན་ཞིག་བཏང་ཡོད་པ་ལས་ནོར་འཁྲུལ་ཚབས་ཆེན་ཞིག་གཏན་ནས་བཟོས་མེད། བོད་མིའི་སྒྲིག་འཛུགས་ཀྱིས་བོད་མི་ས་ཡ་དྲུག་གི་མངོན་འདོད་བསྒྲུབ་ཆེད་བོད་རྒྱའི་གནད་དོན་གཉིས་སྨན་ཐོག་གསལ་ཐབས་གནང་བཞིན་པར། ཨ་རིའི་གཞུང་གིས་ཀྱང་འཛམ་གླིང་གི་རྒྱལ་ཁབ་གཞན་ལྟར་མུ་མཐུད་བོད་མིའི་སྒྲིག་འཛུགས་ལ་རྒྱབ་སྐྱོར་གནང་གི་ཡོད་པའི་བརྡ་ལན་གསལ་པོ་ཞིག་བསྟན་ཡོད།།
