ཕྱི་ལོ་ ༢༠༢༠ ཟླ་ ༡༠ ཚེས་ ༢༣ རེས་གཟའ་པ་སངས།

༄༅། །རྒྱ་ནག་དམར་ཤོག་གཞུང་གིས་བོད་ནང་ཆོས་དད་རང་དབང་གཏོར་གཤིག་གཏོང་ཆེད་དྲག་པོའི་སྲིད་བྱུས་ཁག་ལག་བསྟར་བྱེད་བཞིན་པ་མ་ཟད། བཙན་དབང་གིས་བོད་མི་ཚོ་ངལ་རྩོལ་བསྒྱུར་བཀོད་ཁང་དུ་བཅུག་སྟེ་ངལ་རྩོལ་བྱེད་འཇུག་གི་ཡོད་པ་བཅས་ལ་ཨ་རིའི་གྲོས་ཚོགས་གོང་མའི་གྲོས་ཚོགས་འཐུས་མི་སྐུ་ཞབས་ཇོ་ཤི་ཧོ་ལེ་ Josh Hawley མཆོག་གིས་མཐའ་གཅིག་ཏུ་ངོ་རྒོལ་གྱིས་གྲོས་འཆར་ཞིག་ཨ་རིའི་གྲོས་ཚོགས་གོང་མའི་ནང་ངོ་སྤྲོད་གནང་འདུག

དེ་ཡང་གྲོས་འཆར་དེས་རྒྱ་ནག་དམར་ཤོག་གཞུང་གིས་བོད་བརྒྱུད་ནང་བསྟན་གྱི་ལུགས་སྲོལ་ལ་ཐེ་ཇུས་དང་། ལྷག་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་༧སྐུའི་ཡང་སྲིད་ཐག་གཅོད་ཐད་ཐེ་ཇུས་བྱེད་བཞིན་པར་སྐྱོན་བརྗོད་ཤུགས་ཆེ་གནང་འདུག་པ་མ་ཟད། རྒྱ་ནག་གཞུང་གིས་བོད་མི་རྣམས་ལ་བཙན་ཤེད་ཐོག་ངལ་རྩོལ་བསྒྱུར་བཀོད་བྱེད་བཅུག་པར་བརྟེན། ཨ་རིའི་ནང་ཡོད་པའི་བཟོ་གྲྭ་ཁག་བོད་ནང་གི་ངལ་རྩོལ་བསྒྱུར་བཀོད་ཁང་གི་ལས་གཞི་དང་ཚོང་འབྲེལ་ཡོད་ཚེ་གང་མགྱོགས་ཕྱིར་འཐེན་བྱེད་དགོས་པའི་འབོད་སྐུལ་དང་། ཨ་རིའི་གཞུང་ནས་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ལ་མུ་མཐུད་རྒྱབ་སྐྱོར་གནང་དགོས་པ། དེ་བཞིན་འཛམ་གླིང་གི་རྒྱལ་ཁབ་ཚང་མས་རྒྱ་ནག་དམར་ཤོག་ཚོགས་པའི་དབང་སྒྱུར་གྱི་ཕུགས་འདུན་ལ་ཁ་གཏད་དུ་ལང་དགོས། ཅེས་གསུངས། 

གྲོས་གཞི་དེར་ཐོག་མར་ཨ་རིའི་གྲོས་ཚོགས་གོང་མའི་འཐུས་མི་ཊི་ལི་སི་ Tillis མཆོག་དང་། ཁུ་རོ་ཛི་ Cruz མཆོག   ཊི་སི་ཁོ་ཊི་ T. Scott མཆོག བྷི་ལེག་བྷུན་ Blackburn མཆོག བྷི་རོན་  Braun མཆོག  ཡོན་གྷི་ Young མཆོག  ལོཕ་ལར་ Loeffler མཆོག   ཁེ་སི་ཌེ་ Cassidy མཆོག  མེག་ས་ལེ་ McSally མཆོག ལན་ཀི་ཕོར་ཌི་  Lankford མཆོག་བཅས་ནས་རྒྱབ་སྐྱོར་གནང་ཡོད་པ་མ་ཟད། འབྱུང་འགྱུར་བདུན་ཕྲག་ཁ་ཤས་ནང་གྲོས་གཞི་དེར་ཨ་རིའི་གྲོས་ཚོགས་གོང་མའི་གྲོས་ཚོགས་འཐུས་མི་གང་མང་གིས་རྒྱབ་སྐྱོར་གནང་བའི་རེ་བ་གནང་བཞིན་འདུག

དེ་སྔ་ཕྱི་ལོ་ ༢༠༡༩ ལོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཇོ་ཤི་ཧོ་ལེ་མཆོག་དང་ཐུག་འཕྲད་གནང་ཡོད། སྐུ་ཞབས་ཇོ་ཤི་ཧོ་ལེ་ Josh Hawley མཆོག་ནི་དུས་རྒྱུན་རྒྱ་ནག་དམར་ཤོག་གཞུང་གིས་ཐེ་བྱུས་བྱེད་བཞིན་པར་ངོ་རྒོལ་སྐྱོན་བརྗོད་བྱེད་མཁན་གྱི་གྲས་ཤིག་ཡིན། །