ཕྱི་ལོ་ ༢༠༢༠ ཟླ་ ༡༠ ཚེས་ ༣ རེས་གཟའ་སྤེན་པ།

༄༅། །ཨ་རིའི་གྲོས་ཚོགས་ཀྱི་རྒྱ་ནག་ལས་དོན་འགན་འཛིན་ཚོགས་ཆུང་ Congressional Executive Commission on China ནས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་དང་རྒྱལ་སྤྱིའི་ཡ་ལན་ཞེས་པའི་བརྗོད་གཞིའི་ཐོག་ཉན་ཞིབ་ཀྱི་ཚོགས་འདུ་ཞིག་བསྐོང་ཚོགས་གནང་ཞིང་། ཨ་རིའི་གྲོས་ཚོགས་འཐུས་མི་དང་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་འགན་འཛིན་ཚོགས་ཆུང་གི་ཚོགས་གཙོ་སྐུ་ཞབས་ཇིམ་མེག་གྷོ་ཝན་ Jim McGovern མཆོག་གིས་ཚོགས་འདུ་གཙོ་སྐྱོང་གནང་ཡོད།

དེ་ཡང་ཉན་ཞིབ་ཀྱི་ཆེད་དུ་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་འགན་འཛིན་ཚོགས་ཆུང་གིས་བྱེས་ཀྱི་གདན་ས་བཀྲ་ཤིས་ལྷུན་པོའི་མཁན་ཐོག་ལྔ་པ་གཟིག་རྒྱབ་རིན་པོ་ཆེ་མཆོག་དང་། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་ Matteo Mecacci ལགས། ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ Human Rights Watch འགན་འཛིན་སོ་ཕི་རི་ཆ་ཌི་སན་ Sophie Richardson ལགས། བོད་དོན་ལས་འགུལ་བསྟི་གནས་ཁང་གི་ཉམས་ཞིབ་པ་བསྟན་འཛིན་རྡོ་རྗེ་ལགས། དེ་བཞིན་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཨེན་ཌི་ལི་ཝེན་ Andy Levin མཆོག  ཨ་རི་མོན་ཊ་ན་མངའ་སྡེའི་སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་སྐུ་ཞབས་སི་ཊེ་ཧྥི་ཌེ་ནེ་སི་ Steve Daines མཆོག  ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཊོམ་སའོ་ཛི་ Tom Suozzi མཆོག  ཨ་རིའི་གྲོས་ཚོགས་གོང་མའི་གྲོས་ཚོགས་འཐུས་མི་ཀིངྒ་ King མཆོག     ཨ་རིའི་གྲོས་ཚོགས་འོག་མའི་གྲོས་ཚོགས་འཐུས་མི་ཁི་རི་སི་སི་མི་ཐི་ Chris Smith མཆོག་བཅས་མཉམ་ཞུགས་གནང་ཡོད།

སྐུ་ཞབས་ཇིམ་མེག་གྷོ་ཝན་མཆོག་གིས་གཙོས་ཉན་ཞིབ་གནང་མཁན་ཁག་གཅིག་གིས་ཁ་གཅིག་གྲག་གིས། རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། དེ་བཞིན་སྐད་ཡིག་དང་བཅས་པ་རྒྱ་ནག་ཅན་དུ་བསྒྱུར་བཞིན་པར་ཐུགས་འཚབ་གནང་གི་ཡོད་པའི་སྐོར་གསུངས། བསྟན་འཛིན་རྡོ་རྗེ་ལགས་ཀྱིས། ཉེ་ཆར་ཨ་རིའི་གཞུང་གིས་འཛིན་བཟུང་བྱས་པའི་རྒྱ་ནག་གི་སོ་མྱུལ་བ་པདྨ་དར་རྒྱས་ངག་དབང་ཟེར་བ་དེ་བོད་རིགས་ཡིན་མིན་ཐད་ནིའུ་ཡོག་དང་ནིའུ་ཇར་སིའི་ཁུལ་གྱི་བོད་མི་ཚོས་དོགས་པ་བྱེད་བཞིན་ཡོད། ཅེས་གསུངས།

ཕྱོགས་མཚུངས་སྐུ་ཞབས་ཇིམ་མེག་གྷོ་ཝན་མཆོག་གིས་ཕྱི་ལོ་ ༢༠༡༩ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ Tibetan Policy and Support Act 2019 དེ་གང་མགྱོགས་ཨ་རིའིི་གྲོས་ཚོགས་གོང་མའི་ནང་མང་མོས་ཀྱིས་རྒྱབ་སྐྱོར་གནང་བའི་རེ་བ་ཡོད། ཅེས་གསུངས།།