ཕྱི་ལོ་ ༢༠༢༠ ཟླ་ ༡༠ ཚེས་ ༢༠ རེས་གཟའ་མིག་དམར།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཡུ་ཀི་རིན་ནང་རྟེན་གཞི་བྱས་པའི་གཞུང་འབྲེལ་མ་ཡིན་པའི་ཤེས་ཡོན་ཚོགས་པ་ EdCamp Ukraine ཞེས་པས་ཇི་ལྟར་གསོལ་བ་བཏབ་པ་ལྟར། ཕྱི་ལོ་ ༢༠༢༠ ཟླ་ ༡༠ ཚེས་ ༢༠ ཉིན་གྱི་སྔ་དྲོ་ཆུ་ཚོད་ ༩ ཙམ་ལ་མགོན་པོ་གང་ཉིད་མཆོག་གིས་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་བརྒྱུད་འགྲོ་བ་མིའི་སེམས་རྒྱུད་བཟང་པོ་གོང་མཐོར་གཏོང་བའི་ཤེས་ཡོན་ Educating the Heart དང་འབྲེལ་བའི་སྐོར་ལ་བཀའ་སློབ་སྩལ་དོན། ཡུ་ཀི་རིན་མི་མང་ཚོར་སྐད་ཆ་བཤད་རྒྱུ་དེ་ཕལ་ཆེར་ད་རེས་ཐོག་མ་ཡིན་རྒྱུ་རེད། ངོས་ཀྱིས་ནམ་རྒྱུན་འཛམ་གླིང་སྟེང་མི་ཐེར་འབུམ་བདུན་ཡོད་པ་དེ་དག་ཚང་མ་ལུས་སེམས་དང་མྱོང་ཚོར་གྱི་ཆ་ནས་འགྲོ་བ་མི་གཅིག་གྱུར་ཡིན་པ་རྗོད་ཀྱི་ཡོད།
སྔོན་མ་ཡིན་ན་ཡུ་ཀི་རིན་ཨུ་རུ་སུའི་ཁོངས་གཏོགས་ཆགས་ཡོད། དེར་བརྟེན་ཁྱེད་རང་ཚོར་སྤྱི་ཚོགས་རིང་ལུགས་སྐོར་ཉམས་མྱོང་ཡོད་པ་རེད། ངོས་རང་ནང་པ་རེད། ང་ཚོས་ཀྱང་རྒྱ་ནག་དམར་ཤོག་གི་དབང་སྒྱུར་འོག་མར་ཁེ་སི་དང་ལེ་ཉིན་རིང་ལུགས། མའོ་ཙེ་ཏུང་གི་བསམ་བློ་བཅས་ཀྱི་སྐོར་སློབ་སྦྱོང་བྱས་ཡོད། གཞི་རྩའི་ཆ་ནས་ང་ཚོ་ཚང་མ་ཨ་མའི་འོ་མ་དང་བྱམས་བརྩེ་ལ་བརྟེན་ནས་འཚར་ལོངས་འབྱུང་གི་ཡོད་པ་གཅིག་མཚུངས་ཡིན་པ་ལས་ཁྱད་པར་མེད། ཚན་རིག་པ་ཁག་གཅིག་གིས་འགྲོ་བ་མིའི་ལྷན་སྐྱེས་རང་བཞིན་ནི་བྱམས་བརྩེ་རེད་ཅེས་བརྗོད་ཀྱི་འདུག རྒྱུ་མཚན་ནི་ང་ཚོ་སྤྱི་ཚོགས་ལ་བརྟེན་པའི་སྲོག་ཆགས་རེད། དེར་བརྟེན་ང་ཚོ་མི་རེ་ངོ་རེའི་བདེ་སྐྱིད་ནི་སྤྱི་ཚོགས་ལ་བརྟེན་ནས་ཡོང་གི་ཡོད།
ང་ཚོ་སྐྱེས་པའི་སྐབས་ནས་གཞན་ཕན་གྱི་བསམ་བློ་ཡོད། འདས་པའི་འགྲོ་བ་མིའི་ལོ་རྒྱུས་ལ་བལྟས་པ་ཡིན་ན་ང་ཚོས་ཕན་ཚུན་དམག་འཁྲུག་དང་མི་གསོད་ཁྲག་སྦྱོར་བྱས་པ་ལ་བརྟེན་ནས་དཀའ་ངལ་མང་དག་ཅིག་མྱངས་ཡོད། ང་ཚོས་འགྲོ་བ་མི་ཚང་མ་གཅིག་གྱུར་ཡིན་པ་དེ་འཐུས་ཤོར་བཏང་ཡོད། ང་ཚོ་བྱིས་པ་ཡིན་པའི་སྐབས་སུ་ང་ཚོ་དང་ཁོང་ཚོ། ངའི་རྒྱལ་ཁབ་དང་ཁོང་ཚོའི་རྒྱལ་ཁབ། ངའི་ཆོས་ལུགས་དང་ཁོང་ཚོའི་ཆོས་ལུགས་ཞེས་པའི་སྐོར་བསམ་བློ་གཏོང་གི་མེད། རིམ་པས་ཤེས་ཡོན་ལམ་ལུགས་ནང་ཞུགས་པར་བརྟེན་ང་ཚོ་དང་ཁོང་ཚོ་ཞེས་པའི་སྐོར་བསམ་བློ་ཤུགས་ཆེན་པོ་གཏོང་གི་ཡོད། ང་ཚོ་དང་ཁོང་ཚོ་ཟེར་བ་ལ་བརྟེན་ནས་རྙོག་དྲ་འབྱུང་གི་ཡོད། ད་བར་ངོས་ཀྱིས་དུས་རྟག་ཏུ་མི་རྣམས་ལ་ཡུ་རོབ་སྤྱི་མཐུན་ཚོགས་པར་མིག་དཔེ་ལྟ་དགོས་པའི་སྐོར་རྗོད་ཀྱི་ཡོད།
སྔ་མོ་ཡིན་ན་ཕ་རན་སི་དང་འཇར་མན་ནི་ཕན་ཚུན་དགྲ་ལྟ་བུ་གྱུར་ཡོད་པ་མ་ཟད། མི་གསོད་ཁྲག་སྦྱོར་བྱས་ཡོད། དེ་ནས་འཇར་མན་སྲིད་བློན་སྐུ་ཞབས་ཨ་ཌི་ནར་ Adenauer མཆོག་དང་ཕ་རན་སིའི་སྲིད་འཛིན་སྐུ་ཞབས་ཅར་ལེ་སི་ཌི་གོལ་ Charles de Gaulle མཆོག་གིས་རྒྱལ་ཁབ་ཕན་ཚུན་དབར་རོགས་རམ་དང་མཉམ་གནས་བྱེད་དགོས་པ་གལ་ཆེན་པོ་གཟིགས་ཏེ་ཡུ་རོབ་སྤྱི་མཐུན་ཚོགས་པ་གསར་འཛུགས་གནང་ཡོད། ངོས་ཀྱིས་ཡུ་རོབ་སྤྱི་མཐུན་ཚོགས་པར་ཡིད་སྨོན་བྱེད་ཀྱི་ཡོད། སྔོན་མ་ངོས་ལ་འཇར་མན་གྲོགས་པོ་ཞིག་གིས་ཁོ་རང་གཞོན་སྐྱེས་ཡིན་པའི་སྐབས་སུ་ཕ་རན་སི་ནི་དགྲ་བོ་ཡིན་པར་ངོས་འཛིན་བྱས་ཡོད། ད་ཆ་དེ་ལྟ་བུའི་བསམ་བློ་གཏོང་སྟངས་འགྱུར་བ་ཕྱིན་ཟིན་པ་རེད། ཅེས་བརྗོད་བྱུང་།
ཡུ་རོབ་སྤྱི་མཐུན་ཚོགས་པ་བཙུགས་པར་བརྟེན་ཚོགས་མི་རྒྱལ་ཁབ་དབར་དམག་འཁྲུག་བྱུང་མེད་པར་མ་ཟད། ཕན་ཚུན་ཞི་བདེའི་ངང་གནས་ཡོད། གལ་ཏེ་ཡུ་རོབ་སྤྱི་མཐུན་ཚོགས་པ་ཚུགས་མེད་ན་ཡུ་རོབ་ནང་ཁུལ་ལ་དམག་འཁྲུག་བྱུང་ཡོད་སྲིད། ཡུ་རོབ་སྤྱི་མཐུན་ཚོགས་པ་རྒྱ་ཆེ་རུ་བཏང་སྟེ་ཤར་ཡུ་རོབ་ཁུལ་གྱི་ནང་དུའང་འཛུགས་དགོས་ཀྱི་འདུག ངོས་ཀྱིས་བྱང་ཨེ་ཊི་ལན་ཊིག་ཆིངས་ཡིག་ཚོགས་པའི་ North Atlantic Treaty Organization སྤྱི་ཁྱབ་ལས་ཁུངས་ཨུ་རུ་སུའི་རྒྱལ་ས་མོ་སི་ཁོར་གནས་སྤོ་བྱེད་དགོས་པ་རྗོད་ཀྱི་ཡོད། ཨུ་རུ་སུ་རྒྱལ་ཁབ་ཆེན་པོ་རེད། ཨུ་རུ་སུ་ཡུ་རོབ་སྤྱི་མཐུན་ཚོགས་པའི་ཆ་ཤས་སུ་ཆགས་ཐུབ་པ་བྱེད་དགོས། ཞེས་སོགས་ཀྱི་བཀའ་སློབ་སྩལ་རྗེས་བཀའ་འདྲི་ཁག་ལ་བཀའ་ལན་བསྩལ་ཡོད།
སྤྱིར་ཡུ་ཀི་རིན་ནང་རྟེན་གཞི་བྱས་པའི་གཞུང་འབྲེལ་མ་ཡིན་པའི་ཤེས་ཡོན་ཚོགས་པ་ EdCamp Ukraine ཞེས་པ་ནི། ཨ་རིའི་ཨེ་མོ་རིའི་གཙུག་ལག་སློབ་གཉེར་ཁང་གི་སཱི་ཤེས་ཡོན་ལམ་ལུགས་སྦྱོང་བརྡར་གྱི་མཉམ་འབྲེལ་ཚོགས་པ་ཞིག་ཡིན།།
