ཕྱི་ལོ་ ༢༠༢༠ ཟླ་ ༡༠ ཚེས་ ༣ རེས་གཟའ་སྤེན་པ།

༄༅། །ནང་པའི་མ་དགོན་ The Golden Abode of Buddha Shakyamuni ཞེས་པ་ཕྱག་བཏབ་ནས་ལོ་ངོ་ ༡༥ ཧྲིལ་པོ་འཁོར་བའི་དུས་དྲན་དང་བསྟུན། རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་ཕྱི་ལོ་ ༢༠༢༠ ཟླ་ ༡༠ ཚེས་ ༢  ཉིན་ཁལ་མུཀ་སྤྱི་མཐུན་རྒྱལ་ཁབ་ཀྱི་རྒྱལ་ས་ཨི་ལི་སི་ཏའི་ Elista  ནང་རྟེན་གཞི་བྱས་པའི་ནང་པའི་མ་དགོན་ The Golden Abode of Buddha Shakyamuni ཞེས་པའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༡༩༩༡ དང་། ཕྱི་ལོ་ ༡༩༩༢། ཕྱི་ལོ་ ༢༠༠༤ ལོ་བཅས་ལ་ཁལ་མུཀ་སྤྱི་མཐུན་རྒྱལ་ཁབ་ནང་ཆིབས་བསྒྱུར་ཐེངས་གསུམ་བསྐྱངས་པའི་སྐོར་པར་རིས་འགྲེམས་སྟོན་དབུ་འབྱེད་གནང་ཡོད།

དེ་ཡང་ནང་པའི་མ་དགོན་དེ་ནི་ཡུ་རོབ་དང་ཨུ་རུ་སུ་ཁུལ་གྱི་དགོན་པ་ཆེས་ཆེ་ཤོས་ཤིག་ཆགས་ཡོད། པར་རིས་དེ་དག་ཁལ་མུཀ་སྤྱི་མཐུན་རྒྱལ་ཁབ་ཀྱི་པར་པ་ནི་ཀོ་ལེ་བྷོ་ཤེབ་ Nikolay Boshev ལགས་ཀྱིས་ཕྱོགས་བསྒྲིགས་ཞུས་པ་ཞིག་ཡིན། པར་རིས་དབུ་འབྱེད་སྐབས་ཏེ་ལོ་རིན་པོ་ཆེ་མཆོག་གིས། ཕྱི་ལོ་ ༢༠༢༠ ལོ་ནི་འཛམ་གླིང་གི་ནང་པ་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུའི་གསལ་བསྒྲགས་གནང་ཡོད་པ་ལྟར། པར་པ་ནི་ཀོ་ལེ་བྷོ་ཤེབ་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐོར་པར་རིས་ཕྱོགས་བསྒྲིགས་ཀྱིས་འགྲེམས་སྟོན་གནང་བར་ཐུགས་རྗེ་ཆེ་ཞུས་ཡོད།

ཕྱོགས་མཚུངས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་པར་རིས་ཕྱོགས་བསྒྲིགས་ཞུས་པའི་དཔེ་དེབ་གཅིག་དང་། ཕྱི་ལོ་ ༡༩༢༠ ནས་ ༡༩༣༠ བར་ཁལ་མུཀ་ཁུལ་དུ་ནང་པའི་ཆོས་སྡེ་ཁག་ལ་དྲག་གནོན་བྱས་པའི་སྐོར་གྱི་དཔེ་དེབ་གཅིག  ཁལ་མུཀ་སྤྱི་མཐུན་རྒྱལ་ཁབ་ཀྱི་དགེ་འདུན་པ་ཚོའི་མཚན་ཐོའི་དཔེ་དེབ་གཅིག   ཁལ་མུཀ་སྐད་ཡིག་ཏུ་ཉིན་རེའི་ཞལ་འདོན་ཕྱོགས་བསྒྲིགས་ཞུས་པའི་དཔེ་དེབ་གཅིག་བཅས་དབུ་འབྱེད་གནང་ཡོད།།