ཕྱི་ལོ་ ༢༠༢༠ ཟླ་ ༡༠ ཚེས་ ༣༠ རེས་གཟའ་པ་སངས།
༄༅། །ཕྱི་ལོ་ ༢༠༢༠ ཟླ་ ༡༠ ཚེས་ ༢༩ རེས་གཟའ་ཕུར་བུའི་ཉིན་བོད་དོན་རྒྱབ་སྐྱོར་བ་དང་། བོད་ཀྱི་གནས་བབ་ཅེས་པའི་དཔེ་དེབ་རྩོམ་པ་པོ། རྒྱལ་སྤྱིའི་རྩོད་རྙོག་འདུམ་འགྲིག་ཚོགས་པ་ཀིརི་དཱ་ Kreddha ཞེས་པའི་འཛིན་སྐྱོང་ཚོགས་གཙོ་སློབ་དཔོན་སྐུ་ཞབས་མེ་ཀལ་ཝན་ལྦལ་ཊ་པཱ་རག་ Dr. Michael van Walt van Praag མཆོག་ལ་ནི་ཐར་ལན་ཌི་གཞུང་གིས་ཡུལ་དེའི་མི་སེར་ཆེ་བསྟོད་གཟེངས་རྟགས་འབུལ་བའི་མཛད་སྒོའི་ཐོག་ཨ་རིའི་གྲོང་ཁྱེར་སན་ཕ་རན་སི་སི་ཀོ་ནང་ཡོད་པའི་ནི་ཐར་ལན་ཌི་གཞུང་ཚབ་ཀྱིས་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་མགྲོན་འབོད་གནང་བ་ལྟར་མཉམ་ཞུགས་གནང་ཡོད།
སྐབས་དེར་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་གསུང་དོན། ཡུན་རིང་བོད་དོན་ཐད་རྒྱབ་སྐྱོར་གནང་མཁན་སྐུ་ཞབས་མེ་ཀལ་ཝན་ཝལ་ཊ་ཝན་པཱ་རག་མཆོག་ལ་ནི་ཐར་ལན་ཌི་གཞུང་གིས་ཡུལ་དེའི་མི་སེར་ཆེ་བསྟོད་གཟེངས་རྟགས་འབུལ་བའི་མཛད་སྒོར་བཅར་རྒྱུ་བྱུང་བ་ཧ་ཅང་དགའ་ཚོར་ཆེན་པོ་བྱུང་། ཕྱི་ལོ་ ༡༩༧༠ འགོ་སྟོད་སྐབས་རྒྱལ་སྤྱིའི་ཁྱོན་ཡོངས་ནང་བོད་དོན་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐོར་དེ་ཙམ་མཁྱེན་མཁན་ཉུང་ཉུང་ཡིན་པའི་དུས་དེར་སྐུ་ཞབས་ཁོང་ནི་བོད་ཀྱི་གནད་དོན་ཐད་གོ་རྟོགས་རྒྱ་ཆེ་ཡོད་པ་དང་བོད་དོན་ཐོག་རྒྱབ་སྐྱོར་གནང་མཁན་གྲས་ཤིག་ཡིན། ཁོང་གིས་ད་བར་བོད་དོན་ལ་རྒྱབ་སྐྱོར་གཡོ་བ་མེད་པར་གནང་དང་གནང་མུས་ཡིན་པར་ངས་གོ་སྐབས་འདི་བརྒྱུད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་གཉིས་ཀྱི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཁོང་གིས་བརྩམས་གནང་བའི་བོད་ཀྱི་གནས་བབ་ཅེས་པའི་དཔེ་དེབ་འདི་ནི་ད་ཆ་བོད་ཀྱི་ལོ་རྒྱུས་དང་ཆབ་སྲིད་གནས་བབ་ཐོག་དཔྱད་གཞིའི་དཔེ་དེབ་ཚད་ལྡན་ཞིག་ངོས་འཛིན་གནང་གི་ཡོད། ཅེས་གསུངས།
དེ་ནས་ནི་ཐར་ལན་ཌི་གཞུང་ཚབ་ཀྱིས་ནི་ཐར་ལན་ཌི་གཞུང་གིས་ཡུལ་དེའི་མི་སེར་ཆེ་བསྟོད་གཟེངས་རྟགས་འབུལ་རྒྱུའི་ཐད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མེ་ཀལ་ཝན་ཝལ་ཊ་ཝན་པཱ་རག་མཆོག་འོས་མིར་དམིགས་འཛུགས་མཛད་པར་བརྟེན་ནི་ཐར་ལན་ཌི་གཞུང་ལ་ཐག་གཅོད་བྱེད་རྒྱུར་ཕན་ཐོགས་ཆེན་པོ་བྱུང་ཡོད་སྐོར་སོགས་ཀྱི་གསུང་བཤད་གནང་རྗེས་སྐུ་ཞབས་མེ་ཀལ་ཝན་ཝལ་ཊ་ཝན་པཱ་རག་མཆོག་ལ་ནི་ཐར་ལན་ཌི་གཞུང་གིས་མི་སེར་ཆེ་བསྟོད་གཟེངས་རྟགས་འབུལ་ཡོད།
དེ་རྗེས་མེ་ཀལ་ཝན་ཝལ་ཊ་ཝན་པཱ་རག་མཆོག་གིས་མཛད་སྒོར་ཕེབས་མི་ཡོངས་ལ་ཐུགས་རྗེ་ཆེ་ཞུས་པ་དང་སྦྲགས། ཁོང་གིས་ལོ་ ༡༡ ལྷག་རིང་བོད་དོན་དང་བོད་མིར་རྒྱབ་སྐྱོར་གནང་ཡོད་པ་དང་ལས་དོན་ཐད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་བཀའ་སློབ་སྩལ་ཡོད་སྐོར་སོགས་གསུངས། །
