ཕྱི་ལོ་ ༢༠༢༠ ཟླ་ ༡༠ ཚེས་ ༥ རེས་གཟའ་ཟླ་བ། 

༄༅། །རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ཀྱི་རྐྱེན་པས་འཛམ་གླིང་མི་མང་གི་འཚོ་བའི་གནས་སྟངས་ལ་འགྱུར་ལྡོག་ཆེན་པོ་བྱུང་ཡོད།  ནད་ཡམས་ཀྱི་རྐྱེན་པས་མི་འབོར་ས་ཡ་གཅིག་ལྷག་ཙམ་འདས་གྲོངས་སུ་ཕྱིན་ཡོད། རྒྱལ་ཁབ་དང་རྒྱལ་སྤྱིའི་ཚོགས་སྡེ་ཁག་ནས་རྡོག་རྩ་གཅིག་སྒྲིལ་བྱས་ཏེ་རྒྱ་ནག་གི་ཁྲོམ་ར་བཀག་སྡོམ་གྱིས་རྒྱ་ནག་དམར་ཤོག་ཚོགས་པའི་བཙན་རྒྱལ་རིང་ལུགས་ཀྱི་སྲིད་བྱུས་ལ་ངོ་རྒོལ་བྱེད་བཞིན་ཡོད།  རྒྱ་ནག་དམར་ཤོག་ཚོགས་པ་བཙུགས་ནས་ལོ་ངོ་ ༧༡ འཁོར་བའི་ཉིན་མོ་དང་བསྟུན། གཞུང་འབྲེལ་མ་ཡིན་པའི་ཁ་ཆེའི་ཚོགས་པ་ (MUSLIM FOR HUMANITY) ཞེས་པའི་འགོ་ཁྲིད་སྐུ་ཞབས་ཨར་ཇུན་སིངྒ་Arjun Singh ལགས་དང་། ཚོགས་མི་ཚོས་ལྡི་ལིའི་ཇན་ཏར་མན་ཏར་དུ་ངོ་རྒོལ་གྱི་ལས་འགུལ་ཞིག་གོ་སྒྲིག་ཞུས་ཡོད་པ་དང་། སྐབས་དེར་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་དང་འཕགས་བོད་མཛའ་འབྲེལ་ཚོགས་པའི་སྐུ་ཚབ་ཀྱང་ལས་འགུལ་ནང་མཉམ་ཞུགས་གནང་ཡོད།

འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས། རྒྱ་ནག་གཞུང་གིས་ལོ་ངོ་ ༦༠ རིང་བོད་མིའི་ཐོག་མནར་གཅོད་བཏང་བ་དང་། ད་ཆ་རྒྱ་ནག་གཞུང་གིས་མནར་གཅོད་དེ་བསྐྱར་ཟློས་བྱེད་བཞིན་ཡོད་པ་སོགས་ཀྱི་སྐོར་གསུང་བ་མ་ཟད། ཉེ་ཆར་འཕགས་བོད་གཉིས་ཀྱི་ས་མཚམས་སུ་རྩོད་རྙོག་བྱུང་སྟེ་རྒྱ་གར་དམག་མིའི་ཚེ་སྲོག་ཤོར་ཡོད་པ་སོགས་ཀྱི་སྐོར་གསུངས།  

སྐབས་དེར་སྐུ་ཞབས་ཨར་ཇུན་སིངྒ་ལགས་ཀྱིས་གསུང་དོན། རྒྱ་ནག་གིས་ཤར་ཏུར་ཀི་སི་ཐན་ནང་ལྷ་ཁང་གཏོར་བཤིག་བཏང་བ་མ་ཟད། ཡུ་གུར་བ་ཚོ་ངལ་རྩོལ་བསྒྱུར་བཀོད་ཁང་ལ་བཅུག་ཡོད།  བོད་པ་དང་ཁ་ཆེ་ཚོ་མཐུན་སྒྲིལ་བྱས་ཏེ་རྒྱ་ནག་གཞུང་ལ་ངོ་རྒོལ་བྱེད་དགོས་པ་སོགས་ཀྱི་སྐོར་གསུངས། རྒྱལ་ས་ལྡི་ལི་ཁུལ་གྱི་བོད་མིའི་ཚོགས་པ་ཁག་གི་སྐུ་ཚབ་སོགས་ཀྱང་ལས་འགུལ་ནང་མཉམ་ཞུགས་གནང་ཡོད་པ་བཅས།།