ཕྱི་ལོ་ ༢༠༢༠ ཟླ་ ༡༠ ཚེས་ ༡ རེས་གཟའ་ཕུར་བུ།
༄༅། །ཕྱི་ལོ་ ༢༠༢༠ ཟླ་ ༩ ཚེས་ ༣༠ ཉིན་སུད་སིའི་ཇི་ནི་ཝ་གྲོང་ཁྱེར་ནང་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཚོགས་པ་ཁག་གི་ཨ་རིའི་གཏན་འཇགས་གཞུང་ཚབ་ཆེན་མོ་སྐུ་ཞབས་ཨན་ཌི་རེའོ་བྷི་རམ་བྷེར་གྷི་ Andrew Bremberg མཆོག་གིས་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་འཕྲིན་ལས་ཆོས་སྐྱིད་ལགས་རྣམ་གཉིས་ཨ་རིའི་གཞུང་ཚབ་ཁང་དུ་ཆུ་ཚོད་གཅིག་ལྷག་རིང་ཐུག་འཕྲད་གནང་ཡོད།
སྐབས་དེར་འཆི་མེད་རིག་འཛིན་ལགས་དང་འཕྲིན་ལས་ཆོས་སྐྱིད་ལགས་རྣམ་གཉིས་ཀྱིས་སྐུ་ཞབས་ཨན་ཌི་རེའོ་བྷི་རམ་བྷེར་གྷི་མཆོག་ལ་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་སྐོར་དང་། ངལ་རྩོལ་བསྒྱུར་བཀོད་ཁང་དུ་བོད་མི་འབུམ་གཅིག་ལྷག་བཅུག་དང་འཇུག་བཞིན་པ། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ཡབ་ཡུམ་བཅས་རྒྱ་ནག་གཞུང་གིས་ཕྱི་ལོ་ ༡༩༩༥ ཟླ་ ༥ ཟླ་ ༡༧ ཉིན་བཙན་ཁྲིད་གསང་ཉར་བྱས་པ་ནས་བཟུང་ད་བར་གར་སོང་ཆ་མེད་དུ་གྱུར་ཏེ་ལོ་ངོ་ ༢༥ འཁོར་བཞིན་པ། དེ་བཞིན་རྒྱ་ནག་གཞུང་གིས་ད་ལྟ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ཐད་རྩོད་བཞིན་ཡོད་པ་མ་ཟད། རྒྱ་ནག་དམར་ཤོག་གཞུང་ནི་འཛམ་གླིང་ཞི་བདེ་ལ་ཉེན་ཁ་ཆེན་པོ་ཆགས་ཡོད་པ་སོགས་ཀྱི་སྐོར་གསུངས། ཨ་རིའི་གཞུང་ཚབ་ཆེན་མོ་སྐུ་ཞབས་ཨན་ཌི་རེའོ་བྷི་རམ་བྷེར་གྷི་མཆོག་གིས་བོད་མིའི་རང་དབང་འཐབ་རྩོད་ལ་རྒྱབ་སྐྱོར་ཤུགས་ཆེ་གནང་རྒྱུ་ཡིན། ཞེས་གསུངས་ཡོད།
སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་ཨ་རིའི་གཞུང་ཚབ་མཆོག་ལ་ཨ་རིའི་གཞུང་མང་གཉིས་ནས་བོད་དོན་ཐད་རྒྱབ་སྐྱོར་ཤུགས་ཆེ་གནང་དང་གནང་བཞིན་པར་ཐུགས་རྗེ་ཆེ་ཞུས་ཡོད། དེ་བཞིན་འཆི་མེད་རིག་འཛིན་ལགས་ཀྱིས་བོད་ནང་གི་གནས་སྟངས་སྤྱིའི་སྐོར་ཨ་རིའི་གཞུང་ཚབ་ཆེན་མོ་མཆོག་ལ་ཞུ་སྐབས། ཨ་རིའི་གཞུང་ཚབ་ཆེན་མོ་མཆོག་གིས་དོ་སྣང་ཆེན་པོ་སྒོ་ནས་གསན་གནང་བར་ཐུགས་རྗེ་ཆེ་ཞུས་ཡོད།
འཕྲིན་ལས་ཆོས་སྐྱིད་ལགས་ཀྱིས། ཨ་རི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ནས་ཕྱིར་ཐོན་པ་དེ་བོད་མི་ཚོར་མཚོན་ན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་དུ་བོད་ནང་གི་བོད་མི་ཚོར་རྒྱབ་སྐྱོར་ཤུགས་ཆེ་ཤོས་གནང་མཁན་ཞིག་མེད་པ་ཆགས་ཡོད་ནའང་། རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་ཐད་ལ། ཨ་རིའི་གཞུང་གི་ངོས་ནས་དེར་ངོ་རྒོལ་ཤུགས་ཆེ་གནང་བཞིན་ཡོད། ཅེས་གསུངས།།
