ཕྱི་ལོ་ ༢༠༢༠ ཟླ་ ༡༠ ཚེས་ ༢༧ རེས་གཟའ་མིག་དམར།

༄༅། །རྒྱ་གར་བོད་དོན་རྒྱབ་སྐྱོར་ཚོགས་པ་ནས་བོད་དོན་རྒྱབ་སྐྱོར་བ་ཧ་རིཤ་ཨཏ་ཡལ་ཀར་ Sh. Harish Adyalkar ལགས་འདས་གྲོངས་སུ་གྱུར་བར་ཐུགས་གསོའི་ཆེད་ཁོང་གི་ནང་མི་རྣམས་དང་ཐུགས་འཕྲད་གནང་ཡོད། 

དེ་ཡང་ཕྱི་ལོ་ ༢༠༢༠ ཟླ་ ༩ ཚེས་ ༣ ཉིན་རྒྱ་གར་བོད་དོན་རྒྱབ་སྐྱོར་བ་སྐུ་ཞབས་ཧ་རིཤ་ཨཏ་ཡལ་ཀར་ལགས་དགུང་གྲངས་ ༨༣ ཐོག་འདས་གྲོངས་སུ་གྱུར་བ་ཡིད་སྐྱོའི་གནས་ཚུལ་ཐོན་ཡོད་པ་དང་། ཉིན་གཉིས་ཀྱི་རྗེས་དགུང་ལོ་ ༥༣ ཡིན་པ་ཁོང་གི་བུ་ནི་རིན་ཨཏ་ཡལ་ཀར་ Sh. Nitin Adyalkar ལགས་རྒྱ་ནག་ཝུ་ཧན་གྲོང་ཁྱེར་ནས་ཁྱབ་གདལ་བྱུང་བའི་ཏོག་དབྱིབས་གཉན་རིམས་ཀྱི་རྐྱེན་པས་འདས་གྲོངས་སུ་ཕྱིན་འདུག  ནང་གི་ཀ་བ་ལྟ་བུ་གཉིས་གློ་བུར་དུ་འདས་གྲོངས་སུ་ཕྱིན་པར་བརྟེན། ཤུལ་ལུས་ཧ་རིཤ་ཨཏ་ཡལ་ཀར་ལགས་ཀྱི་བཟའ་ཟླ་དང་ཕྲུ་གུ་གཉིས་ལ་སྡུག་བསྔལ་དྲག་པོ་བྱུང་ཡོད།

རྒྱ་གར་མངའ་སྡེ་མ་ཧཱ་རཱཤ་ཀྲའི་ནང་ཏོག་དབྱིབས་གཉན་རིམས་ཀྱི་གནས་སྟངས་ཛ་དྲག་ཡིན་པ་ལ་མ་ལྟོས་པར་རྒྱ་གར་བོད་དོན་རྒྱབ་སྐྱོར་བ་ཨར་ཝིནྟ་ནི་ཀོ་སི་ Sh. Arvind Nikose ལགས་དང་། སུ་ནིལ་པ་ཌེལ་ལགས། སྦན་ད་ར་ནོར་རྒྱས་གླིང་བོད་མིའི་ས་གནས་འགོ་འཛིན་དོན་གྲུབ་རྒྱལ་པོ་ལགས། བོད་དོན་རྒྱབ་སྐྱོར་བ་སན་དེ་ཤི་མི་ཤི་རམ་ Sh. Sandesh Meshramལགས།  ཧིན་བོད་མཛའ་འབྲེལ་ཚོགས་པའི་ཚོགས་མི་ས་ཅིན་རཱམ་ཊེ་ཀེ་ Sh. Sachin Ramteke ལགས། འཕགས་བོད་འབྲེལ་མཐུད་ལས་ཁུངས་ཀྱི་འགན་འཛིན་བཅས་ལས་དམ་པ་ཁོང་གི་ནང་དུ་ཆེད་བཅར་གྱིས་ཤུལ་ལུས་ནང་མི་སྤུན་མཆེད་རྣམས་ལ་སེམས་གསོ་གནང་འདུག

ཨར་ཝིནྟ་ནི་ཀོ་སི་ལགས་ཀྱིས་རྒྱ་གར་བོད་དོན་རྒྱབ་སྐྱོར་ཚོགས་པའི་ཚབ་ཞུས་ཏེ་དམ་པ་ཁོང་གིནང་མི་རྣམས་ལ་སེམས་གསོ་དང་མྱ་ངན་གུས་འདུད་ཞུས་ཡོད་པ་དང་། སྦན་ད་ར་ནོར་རྒྱས་གླིང་བོད་མིའི་ས་གནས་འགོ་འཛིན་དོན་གྲུབ་རྒྱལ་པོ་ལགས་ཀྱིས་དམ་པ་ཁོང་རྣམ་གཉིས་ཀྱི་ཆེད་སྟོན་པའི་སྐུ་ཐང་ཞིག་ཕུལ་ཏེ། ཧ་རིཤ་ཨཏ་ཡལ་ཀར་ལགས་ཀྱིས་ད་བར་བོད་དོན་ལ་རྒྱབ་སྐྱོར་དང་། ས་གནས་ཀྱི་བོད་མི་རྣམས་ལ་དགོས་གལ་ནམ་བྱུང་སྐབས་མཐུན་འགྱུར་རོགས་རམ་གནང་ཡོད་པར་བཀའ་དྲིན་དྲན་ཤེས་དང་། དམ་པ་ཁོང་སྐྱེ་བ་ཕྱི་མར་སླར་ཡང་མི་ལུས་རིན་པོ་ཆེ་བླངས་ནས་འགྲོ་བ་མིའི་བདེ་དོན་ཆེད་ཞབས་འདེགས་སྒྲུབ་མཁན་ཞིག་ཆགས་པའི་སྨོན་ལམ་ཞུ་ཡོད་པ་བཅས། །