ཕྱི་ལོ་ ༢༠༢༠ ཟླ་ ༡༠ ཚེས་ ༡༣ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༡༠ ཚེས་ ༧ ཉིན་ཡུ་རོབ་སྤྱི་མཐུན་ཚོགས་པའི་དཔལ་འབྱོར་དང་སྤྱི་ཚོགས་བདེ་དོན་ཚོགས་ཆུང་གི་འགན་འཛིན་ཟུར་པ་སྐུ་ཞབས་ཧན་རི་མ་ལོ་སེ་ Mr Henri Malosse ལགས་ཀྱིས་དྲ་ལམ་བརྒྱུད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་རང་དབང་དང་སྣོད་བཅུད་རིག་པའི་སྐོར་གྱི་དགོངས་གཞི་དང་། དེ་བཞིན་མགོན་པོ་གང་ཉིད་མཆོག་གིས་ཡུ་རོབ་སྤྱི་མཐུན་ཚོགས་པར་ཡིད་སྨོན་མཛད་པ་ཞེས་པའི་བརྗོད་གཞིའི་ཐོག་ཟབ་སྦྱོང་ཞིག་བསྐོང་ཚོགས་གནང་ཡོད།
དེ་ཡང་སྐུ་ཞབས་ཧན་རི་མ་ལོ་སེ་ལགས་ཀྱིས་ཟབ་སྦྱོང་གི་སྐོར་ངོ་སྤྲོད་སྙིང་བསྡུས་ཤིག་གནང་རྗེས། བོད་མིའི་སྒྲིག་འཛུགས་ཀྱི་ཕྱི་སྲིལ་ལས་ཁུངས་དང་སྦར་སེལ་སྐུ་ཚབ་དོན་གཅོད་ལས་ཁུངས་གཉིས་ཟུང་འབྲེལ་ཐོག་སྒྲིག་སྦྱོར་གནང་བའི་བརྙན་འཕྲིན་ངོས་ཀྱིས་ཡུ་རོབ་སྤྱི་མཐུན་ཚོགས་པའི་མཉམ་རུབ་ཀྱི་འདུ་ཤེས་ལ་ཡིད་སྨོན་བྱེད་ཀྱི་ཡོད། ཅེས་པའི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་སྩལ་བའི་དུས་ཡུན་སྐར་མ་བཅུ་བདུན་ཅན་གྱི་བཀའ་སློབ་བརྙན་འཕྲིན་ཞིག་གཟིགས་འབུལ་ཞུས་ཡོད། བརྙན་འཕྲིན་དེའི་ནང་༧གོང་ས་མཆོག་གིས་ཡུ་རོབ་སྤྱི་མཐུན་ཚོགས་པའི་མཉམ་རུབ་ཀྱི་འདུ་ཤེས་ལ་ཡིད་སྨོན་མཛད་ཀྱི་ཡོད་པ་དང་། ལོ་ངོ་སུམ་ཅུའི་རིང་མགོན་པོ་གང་ཉིད་མཆོག་གིས་ཡུ་རོབ་སྤྱི་མཐུན་ཚོགས་པ་དང་ལྷན་འབྲེལ་ལམ་ཇི་བྱུང་སོགས་གསལ་འདོན་བྱས་ཡོད།
སྦར་སེལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་གསུང་བཤད་གནང་མཁན་གཙོ་བོ་ཡིན་ཞིང་། ཁོང་གིས་འཛམ་གླིང་གཅིག་དང་འགྲོ་བ་མི་གཅིག་གྱུར་གྱི་འདུ་ཤེས་ཞེས་པའི་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་ཐོག་ཞིབ་ཕྲ་འགྲེལ་བརྗོད་གནང་བ་མ་ཟད། དེ་སྔ་བྱུང་མ་མྱོང་བའི་ཏོག་དབྱིབས་གཉན་རིམས་ཀྱི་རྐྱེན་པས་འཛམ་གླིང་གཅིག་དང་འགྲོ་བ་མི་གཅིག་གྱུར་གྱི་འདུ་ཤེས་དེ་དོན་དངོས་གསལ་སྟོན་བྱས་ཡོད་པའི་སྐོར། དེ་བཞིན་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གིས་སྣོད་བཅུད་རིག་པའི་ཐོག་ཐུགས་སྣང་དང་རྒྱབ་སྐྱོར་མཛད་པ་སོགས་ཀྱི་སྐོར་གསུང་།
དེ་བཞིན་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགསཀྱིས་གོ་ལའི་ཚ་དྲོད་དང་། བོད་ནི་གླིང་ཆེན་ཨེ་ཤི་ཡའི་ཆུ་མཛོད་ལྟ་བུ་ཆགས་ཡོད་པའི་གལ་གནད། ཡུ་རོབ་སྤྱི་མཐུན་ཚོགས་པའི་གཞི་རྩའི་རང་དབང་དང་། ཁྲིམས་ཀྱི་དབང་སྒྱུར། མང་གཙོའི་ལམ་ལུགས་སོགས་ཀྱི་སྐོར་གསུང་བཤད་གནང་ཡོད་པ་མ་ཟད། འདས་ཟིན་པའི་དམག་འཐབ་དང་འཁྲུག་འཛིང་གི་རྐྱེན་པས་ཡུ་རོབ་རྒྱལ་ཁབ་ཁག་ནང་སྡུག་བསྔལ་ཚད་མེད་བྱུང་ཡོད་པ་དང་། དེ་ལས་སློབ་སྦྱོང་བླངས་ཏེ། མི་སེར་ས་ཡ་ལྔ་བརྒྱ་ལྷག་གི་ཆེད་གྲོས་མོལ་དང་། བགྲོ་གླེང་། ཕན་ཚུན་དབར་གྲོས་སྡུར་གྱི་ལམ་ནས་མཛའ་མཐུན་གྱི་ཐག་གཅོད་བྱས་ཡོད་པ་སོགས་ཀྱི་སྐོར་གསུངས།
ཐེངས་འདིའི་དྲ་ཐོག་གི་ཟབ་སྦྱོང་ཕ་རན་སིའི་ཆབ་སྲིད་ཀྱི་ལས་འགུལ་ཚོགས་པ་ Generation Ecologie ཞེས་པས་གོ་སྒྲིག་ཞུས་ཤིང་། སྣོད་བཅུད་རིག་པའི་ཐོག་ཆེད་མཁས་པ་དང་རྒྱལ་སྤྱིའི་གནད་དོན་སོགས་ཀྱི་ཐོག་ཕྱག་ལས་གནང་མྱོང་མཁན་གཞུང་དང་གཞུང་འབྲེལ་མིིན་པའི་ཚོགས་པ་ཁག་གི་སྐུ་ཚབ་ཁག་གཅིག་མཉམ་ཞུགས་གནང་ཡོད།།
