ཕྱི་ལོ་ ༢༠༢༠ ཟླ་ ༡༠ ཚེས་ ༣ རེས་གཟའ་སྤེན་པ།

༄༅། །ཕྱི་ལོ་ ༢༠༢༠ ཟླ་ ༡༠ ཚེས་ ༡ ཉིན་ཏེ་རྒྱ་ནག་དམར་ཤོག་ཚོགས་པ་བཙུགས་ནས་ལོ་ངོ་ ༧༡ འཁོར་བའི་ཉིན་མོ་དང་བསྟུན།  བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་། རྒྱལ་སྤྱིའི་ཚོགས་སྡེ་ཁག་གི་སྐུ་ཚབ་སོགས་ཨ་རིའི་རྒྱལ་ས་ཝ་ཤིན་ཊོན་དུ་ལྷན་འཛོམས་ཐོག་རྒྱ་ནག་གཞུང་ལ་ངོ་རྒོལ་གྱི་རྒྱལ་སྤྱིའི་ལས་འགུལ་ཉིན་མོ་སྲུང་བརྩི་ཞུས་ཡོད།  

དེ་ཡང་རྒྱ་ནག་གཞུང་ལ་ངོ་རྒོལ་གྱི་རྒྱལ་སྤྱིའི་ལས་འགུལ་ཉིན་མོར་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་། ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཊོམ་སའོ་ཛི་ Tom Suozzi མཆོག  ཨ་རིའི་གྲོས་ཚོགས་འོག་མའི་གྲོས་ཚོགས་འཐུས་མི་སི་ཁོ་ཌི་པེ་རེ Scott Perry མཆོག  ཨ་རིའི་གྲོས་ཚོགས་འོག་མའི་གྲོས་ཚོགས་འཐུས་མི་ཌེ་ཌི་ཡོ་ཧོ་ Ted Yoho མཆོག   དེ་བཞིན་རྒྱལ་སྤྱིའི་ཡུ་གུར་ལྷན་ཚོགས་ཀྱི་སྐུ་ཚབ་ཨོ་མར་ཀ་ན་ཊི་ were Omer Kanat ལགས། ལྷོ་སོག་གི་འགྲོ་བ་མིའི་ཐོབ་ཐང་དང་ཤེས་ཡོན་བསྟི་གནས་ཁང་གི་སྐུ་ཚབ་ཊོ་གོ་ཆོག་ Enghebatu Togochog ལགས། བོད་རིགས་སྤྱི་མཐུན་ཚོགས་པ་ཁག་གི་སྐུ་ཚབ་སོགས་མཉམ་ཞུགས་གནང་ཡོད།

བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས།  ཡུ་གུར་མི་རིགས་དང་། སོག་པོ། ཧོང་ཀོང་མི་མང་སོགས་རྡོག་རྩ་གཅིག་སྒྲིལ་བྱས་ཏེ་རྒྱ་ནག་གཞུང་ལ་ངོ་རྒོལ་བྱེད་དགོས་པའི་གལ་གནད་སོགས་ཀྱི་སྐོར་གསུངས། ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཊོམ་སའོ་ཛི་མཆོག་གིས། རྒྱ་ནག་དམར་ཤོག་ཚོགས་པར་འཛམ་གླིང་ཡོངས་དབང་སྒྱུར་བྱེད་རྒྱུའི་འཆར་གཞི་ཡོད། ཅེས་གསུངས།།