ཕྱི་ལོ་ ༢༠༢༠ ཟླ་ ༡༠ ཚེས་ ༡༠ རེས་གཟའ་སྤེན་པ།
༄༅། །རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་ཏོག་དབྱིབས་གཉན་ནད་ཀྱི་ནད་རྟགས་ཐོན་པ་ཇེ་མང་དུ་འགྲོ་བཞིན་པར་བརྟེན། ཟླ་བ་འདིའི་ཕྱི་ཚེས་ ༧ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་ཚོགས་མི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་། ཏོག་དབྱིབས་གཉན་རིམས་ལས་དོན་ཚོགས་ཆུང་གི་ལམ་སྟོན་པ་བོད་ལུགས་སྨན་པ་ཚེ་དབང་རྟ་མགྲིན་ལགས་དང་། ཕྱི་ལུགས་སྨན་པ་ཚེ་བརྟེན་རྡོ་རྗེ་ལགས་བཅས་ཀྱིས་མོན་གྷོ་འདོད་རྒུ་གླིང་གི་ས་གནས་ཏོག་དབྱིབས་གཉན་རིམས་ལས་དོན་ཚོགས་ཆུང་དང་ལྷན་དྲ་རྒྱ་བརྒྱུད་ཚོགས་འདུ་ཞིག་བསྐོང་ཚོགས་གནང་ཡོད།
དེ་ཡང་མོན་གྷོ་འདོད་རྒུ་གླིང་ས་གནས་ཏོག་དབྱིབས་གཉན་རིམས་ལས་དོན་ཚོགས་ཆུང་ནང་ས་གནས་འགོ་འཛིན་ལྷག་པ་ཚེ་རིང་ལགས་དང་། ས་གནས་འཕྲོད་བསྟེན་སྨན་ཁང་གི་དྲུང་ཆེ་ངག་དབང་ཐུབ་བསྟན་ལགས། སྨན་པ་བསྐལ་བཟང་ཆོས་སྒྲོན་ལགས། འབྲས་སྤུངས་བློ་གསལ་གླིང་གི་མཁན་པོ་དགེ་བཤེས་བསམ་གཏན་ལགས། དགའ་ལྡན་བྱང་རྩེ་སྨན་ཁང་གི་སྨན་པ་དོན་གྲུབ་བཀྲ་ཤིས་ལགས། ཡན་ལག་སྨན་རྩིས་ཁང་གི་སྨན་པ་ཉི་མ་རྒྱལ་མཚན་ལགས། དེ་བཞིན་དགོན་སྡེ་ཁག་གི་སྐུ་ཚབ་དང་། གཞིས་གྲོང་ཁག་གི་སྤྱི་མི་བརྒྱ་དཔོན་བཅས་ཡོད།
ས་གནས་ཏོག་དབྱིབས་གཉན་རིམས་ལས་དོན་ཚོགས་ཆུང་གི་ཚོགས་མི་རྣམས་ནས་ནད་གཞི་སྔོན་འགོག་སླད་ལས་དོན་ཇི་སྤེལ་དང་། ད་ལྟའི་གནས་སྟངས་སོགས་ཀྱི་སྐོར་ངོ་སྤྲོད་ཞུས་རྗེས། བོད་ལུགས་སྨན་པ་ཚེ་དབང་རྟ་མགྲིན་ལགས་ཀྱིས་ནད་གཞི་སྔོན་འགོག་ཆེད་ས་གནས་ཏོག་དབྱིབས་གཉན་རིམས་ལས་དོན་ཚོགས་ཆུང་ནས་མུ་མཐུད་འབད་བརྩོན་གནང་དགོས་པ་དང་། འགོག་དབྱེ་ཟུར་འཇོག་ཁང་ཁག་གི་ནང་སྒྲིག་ལམ་བརྟན་པོ་སྲུང་དགོས་པ་དང་། མི་སྒེར་གྱིས་སྒྲིག་ལམ་ཡག་པོ་མ་སྲུང་བ་ལ་བརྟེན་ནས་སྤྱི་ཚོགས་ནང་ཏོག་དབྱིབས་ནད་གཞི་ཁྱབ་བརྡལ་འགྲོ་བའི་ཉེན་ཁ་ཆེན་པོ་ཡོད་སྐོར་དང་། ཏོག་དབྱིབས་གཉན་རིམས་ཀྱི་ནད་གཞི་ཕོག་པ་རྣམས་ནས་བོད་ལུགས་དང་ཕྱི་ལུགས་ཟུང་སྦྲེལ་ཐོག་ནས་སྨན་བཅོས་བྱེད་དགོས་སྐོར་གསུངས།
ཕྱོགས་མཚུངས་ཕྱི་ལུགས་སྨན་པ་ཚེ་བརྟེན་རྡོ་རྗེ་ལགས་ཀྱིས། ས་གནས་ཏོག་དབྱིབས་གཉན་རིམས་ལས་དོན་ཚོགས་ཆུང་ཀྱི་ཚོགས་མི་རྣམས་ནས་ད་བར་ནད་གཞི་སྔོན་འགོག་སླད་འབད་བརྩོན་གནང་བར་ཡི་རང་བསྔགས་བརྗོད་དང་། ནད་གཞི་ཁྱབ་བརྡལ་ཕྱིན་པའི་རྐྱེན་གང་ཡིན་པ་དང་། ཐབས་ལམ་ཇི་ཡོད་གོ་བསྡུར་མཐིལ་ཕྱིན་པ་གནང་དགོས་སྐོར་གསུངས།
བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས། འཕྲོད་བསྟེན་ལས་ཁུངས་ནས་ས་གནས་ཏོག་དབྱིབས་གཉན་རིམས་ལས་དོན་ཚོགས་ཆུང་རྣམས་ལ་རྒྱབ་སྐྱོར་ཡོད་སྐོར་དང་། ས་གནས་ཚོགས་ཆུང་ཁག་ལ་བསྔགས་བརྗོད་དང་འབྲེལ་མུ་མཐུད་ཏོག་དབྱིབས་སྔོན་འགོག་སླད་འབད་བརྩོན་གནང་དགོས་པའི་རེ་སྐུལ་ཡང་ཞུས་ཡོད་པ་བཅས།།
