ཕྱི་ལོ་ ༢༠༢༠ ཟླ་ ༡༠ ཚེས་ ༢༩ རེས་གཟའ་ཕུར་བུ།
༄༅། །ཕྱི་ལོ་ ༢༠༢༠ ཟླ་ ༡༠ ཚེས་ ༢༨ ཉིན་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་གོ་སྒྲིག་འོག་བོད་མིའི་འཛིན་སྐྱོང་དང་སྤྱི་ཚོགས་བདེ་དོན་ཐེབས་རྩའི་ལོ་འཁོར་ཚོགས་ཆེན་ཐེངས་དགུ་པ་དྲ་ཐོག་བརྒྱུད་བསྐོང་ཚོགས་གནང་ཡོད།
དེ་ཡང་བོད་མིའི་འཛིན་སྐྱོང་དང་སྤྱི་ཚོགས་བདེ་དོན་ཐེབས་རྩའི་ཚོགས་གཞོན་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དབུ་བཞུགས་ཐོག འགན་འཛིན་ལྷན་ཚོགས་ཀྱི་རྒྱུན་ལས་དང་ཚོགས་མི་བཅས་དྲ་ཐོག་བརྒྱུད་ལྷན་འཛོམས་ཀྱིས་ཐོག་མར་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས། བོད་མིའི་འཛིན་སྐྱོང་དང་སྤྱི་ཚོགས་བདེ་དོན་ཐེབས་རྩའི་དགོས་དམིགས་གཞིར་བཟུང་ས་གནས་འགོ་འཛིན་རྣམས་ནས་ལས་འཆར་ཁག་ལག་བསྟར་གནང་དགོས་གལ་དང་།
བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ལོ་ཧྲིལ་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུའི་ལས་འཆར་ཐོག་ས་གནས་འགོ་འཛིན་རྣམས་ཀྱིས་མཉམ་ཞུགས་གནང་བར་བསྔགས་བརྗོད་གནང་ཡོད། དེ་རྗེས་བོད་མིའི་སྒྲིག་འཛུགས་ཀྱི་དཔལ་འབྱོར་དྲུང་ཆེ་ཡེ་ཤེས་དབང་མོ་ལགས་ཀྱིས་བོད་མིའི་འཛིན་སྐྱོང་དང་སྤྱི་ཚོགས་བདེ་དོན་ཐེབས་རྩའི་རྩིས་ལོ་ ༢༠༡༧་་་༢༠༡༨ དང་ ༢༠༡༨་་་༢༠༡༩ ལོའི་ལོ་འཁོར་ལས་བསྡོམས་དང་། ལོ་འཁོར་ཚོགས་ཆེན་ཐེངས་བརྒྱད་པའི་སྐབས་ཀྱི་ཚོགས་འདུའི་ཚིག་ཐོ་ཁག་སྙན་སེང་ཞུས། ཚོགས་ཆེན་མཇུག་སྡོམ་ཐོག་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་ལས་གཞི་ཁག་ལག་བསྟར་ཡོང་སླད་ཚང་མས་ཧུར་བརྩོན་ངང་མཉམ་ཞུགས་ཡོང་བའི་རེ་སྐུལ་དང་འབྲེལ་ཚོགས་བཅར་བ་ཡོངས་ལ་ཐུགས་རྗེ་ཆེ་ཞུས་ཡོད་པ་བཅས། །
