ཕྱི་ལོ་ ༢༠༢༠ ཟླ་ ༡༠ ཚེས་ ༢༧ རེས་གཟའ་མིག་དམར། 

༄༅། །ཕྱི་ལོ  ༢༠༢༠ ཟླ་ ༡༠ ཚེས་ ༢༣ རེས་གཟའ་པ་སངས་ཉིན་སྦན་ད་ར་ནོར་རྒྱས་གླིང་བོད་མིའི་ས་གནས་འགོ་འཛིན་དོན་གྲུབ་རྒྱལ་པོ་ལགས་དང་། ས་གནས་བོད་དོན་རྒྱབ་སྐྱོར་བ་སྐུ་ཞབས་སན་དེ་ཤི་མི་ཤི་རམ་Sandesh Meshram ལགས། འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་བཅས་ཀྱིས་ Samta Sainik Dal ཞེས་པའི་ཚོགས་པའི་ལས་ཁུངས་སུ་བཅར་ཏེ་བོད་དོན་རྒྱབ་སྐྱོར་བ་སྐུ་ཞབས་ཝི་མལ་སུ་རི་ཡཅི་མན་ཀར་ Marshal Adv. Vimalsurya Chimankar ལགས་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་མྱ་ངན་གུས་འདུད་ཞུས་ཡོད།

སྐབས་དེར་དམ་པ་ཁོང་གི་ཆེད་མཆོད་འབུལ་སྨོན་ལམ་ཞིག་ཚོགས་རྗེས་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས་དེ་སྔ་དམ་པ་ཁོང་དང་ལྷན་དུ་ཕྱག་ལས་གནང་བའི་མྱོང་ཚོར་དང་། དམ་པ་ཁོང་གིས་བོད་དོན་ཐད་རྒྱབ་སྐྱོར་ཤུགས་ཆེ་གནང་ཡོད་པའི་སྐོར་སོགས་གསུངས།

དེ་རྗེས་སྦན་ད་ར་ནོར་རྒྱས་གླིང་བོད་མིའི་ས་གནས་འགོ་འཛིན་དོན་གྲུབ་རྒྱལ་པོ་ལགས་ཀྱིས་ས་གནས་བོད་མི་ཡོངས་ཀྱི་ཚབ་ཞུས་ཏེ་གདུང་སེམས་མཉམ་སྐྱེ་ཞུས་པ་དང་སྦྲགས། སྐུ་ཞབས་ཁོང་ནི་མང་ཚོགས་ཀྱི་དཀའ་སྡུག་ཐོག་གླེང་སློང་ཤུགས་ཆེ་གནང་མཁན་ཞིག་ཡིན་སྟབས་ང་ཚོས་དྲན་གསོ་ཞུས་དགོས། ཞེས་གསུངས།

ཕྱི་ཚེས་ ༢༤ ཉིན་བྷིམ་རའོ་ཨེམ་བྷེ་དེ་ཀར་དྲན་རྟེན་ཚོགས་ཁང་དུ་དམ་པ་ཁོང་གི་ཆེད་མཆོད་འབུལ་སྨོན་ལམ་དང་སྦྲགས་གདུང་སེམས་མཉམ་སྐྱེའི་མྱ་ངན་ཞུས་འདུག་པ་བཅས། །