ཕྱི་ལོ་ ༢༠༢༠ ཟླ་ ༡༠ ཚེས་ ༠༡ རེས་གཟའ་ཕུར་བུ།
༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༠༩ ཟླ་ ༣༠ ཉིན་བོོད་མིའི་སྒྲིག་འཛུགས་ཆོས་རིག་ལས་ཁུངས་དང་དཔལ་ལྡན་སྨད་རྒྱུད་གྲྭ་ཚང་གངས་ཅན་རིག་གནས་སློབ་གྲྭ་ཟུང་འབྲེལ་ཐོག་བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་ཐེངས་བདུན་པའི་དབུ་འབྱེད་མཛད་སྒོ་ཚོགས་ཡོད།
དེ་ཡང་མཛད་སྒོའི་ཐོག་སྐུ་མགྲོན་གཙོ་བོར་སྨད་རྒྱུད་གྲྭ་ཚང་གི་མཁན་རིན་པོ་ཆེ་རྗེ་བཙུན་བློ་བཟང་དབང་འདུས་མཆོག་དང་། ཆོས་རིག་ལས་ཁུངས་ཀྱི་སྐུ་ཚབ་ཧོན་རབ་རྒྱས་གླིང་ས་གནས་འགོ་འཛིན། གྲྭ་ཚང་གི་བླ་མ་དབུ་མཛད་དང་གྲྭ་ཚང་གི་ཕྱག་མཛོད། སློབ་སྤྱི་གཙོས་པའི་དགེ་ལས་སློབ་ཕྲུག་རྣམས་ཚང་འཛོམས་གནང་ཡོད།
སྐབས་དེར་མཁན་རིན་པོ་ཆེ་མཆིག་གིས་བོད་བརྒྱུད་ནང་བསྟན་གྱི་གལ་གནད་དང་། དེ་འདྲའི་རྩ་ཆེའི་ནང་དོན་རིག་པའི་གཞུང་ལུགས་རྣམས་དེང་རབས་ན་གཞོན་ཚོར་འཇགས་ཐབས་གནང་བའི་ལས་གཞི་འདི་ཧ་ཅང་གལ་ཆེ་བའི་སྐོར་གསུངས་ཤིང་། ཕྱོགས་མཚུངས་ཆོས་རིག་ལས་ཁུངས་ཀྱི་སྐུ་ཚབ་ས་གནས་འགོ་འཛིན་གྱིས་སློབ་ཕྲུག་ཚོར་གོ་སྐབས་ཧ་ཅང་བཟང་པོ་ཞིག་སོན་པར་གོ་སྐབས་དམ་འཛིན་གནང་སྟེ་སློབ་སྦྱོང་འཐུས་ཤོས་མེད་པ་གནང་དགོས་པའི་སྐོར་དང་། རྒྱུད་སྨད་བླ་མ་དབུ་མཛད་མཆོག་གིས་ཀྱང་སློབ་ཕྲུག་ཚོར་འདི་ཕྱིའི་ལམ་སྟོན་གསུང་བཤད་གནད་ལ་འཁེལ་བ་གནང་ཡོད།
ཟབ་ཁྲིད་འདི་བཞིན་རྒྱུན་གཏན་ཟླ་ ༧ ནས་ཟླ ༡༢ བར་ཚོགས་ཀྱི་ཡོད་ཀྱང་འདི་ལོ་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་རྐྱེན་པས་ཕར་འགྱངས་ཀྱིས་ཕྱི་ལོ་ ༢༠༢༠ ཟླ་ ༡༠ ནས་ཕྱི་ལོ་ ༢༠༢༡ ཟླ་ ༠༢ བར་ཚོགས་གཏན་ཁེལ་ཡོད།
རྩ་བའི་ཟབ་ཁྲིད་ཐེངས་བདུན་པར་འཛུལ་ཞུགས་ཆེད་སྙན་འབུལ་བ་སློབ་མ་བཞི་བཅུ་ཙམ་བྱུང་ཡོད་ཀྱང་། ད་ལན་ནད་ཡམས་འདིའི་རྐྱེན་པས་ཟབ་ཁྲིད་དུ་དངོས་སུ་མཉམ་ཞུགས་ཐུབ་མཁན་ ༢༥ བྱུང་ཡོད། སློབ་ཕྲུག་རྣམས་ཐོག་མར་ས་གནས་ཡུལ་ཁྲིམས་དང་མཐུན་པར་གཞིས་ཆགས་ཀྱི་ཟུར་བཀག་ནང་བཞུགས་ཏེ་འཕྲོད་བསྟེན་ལས་ཁུངས་ཀྱི་མཐུན་འགྱུར་འོག་བརྟག་དཔྱད་རིམ་པ་བརྒྱུད་སློབ་གྲྭར་བདེ་དགའི་ངང་ཕེབས་འབྱོར་གནང་ཡོད། །
