ཕྱི་ལོ་ ༢༠༢༠ ཟླ་ ༡༠ ཚེས་ ༢༦ རེས་གཟའ་ཟླ་བ།

༄༅། །ཕྱི་དྲིལ་བོད་ཀྱི་འགྲེམས་སྟོན་ཁང་ནས་ཕྱོགས་བསྡུས་གནང་བའི་ཤུལ་བཞག་དངོས་རྫས་རྣམས་ཉར་ཚགས་དང་། གཅེས་སྲུང་། འགྲེམས་སྟོན་སོགས་ཀྱི་ལས་གཞི་ཞིག་འགོ་འཛུགས་གནང་ཡོད།

དེ་ཡང་ཉར་ཚགས་གནང་བའི་ཤུལ་བཞག་དངོས་རྫས་རྣམས་ཕྱིས་སུ་རྡ་ས་གངས་ཅན་སྐྱིད་ཤོང་དུ་ཡོད་པའི་ཕྱི་དྲིལ་བོད་ཀྱི་འགྲེམས་སྟོན་ཁང་གསར་པའི་ནང་འགྲེམས་སྟོན་གནང་རྒྱུ་ཡིན་འདུག་པ་མ་ཟད། བོད་དང་བོད་པའི་རིག་གཞུང་གི་ལོ་རྒྱུས་དང་གནས་ཚུལ་མཁོ་སྤྲོད་སླད་རིག་གཞུང་དང་ལོ་རྒྱུས་ཀྱི་མཛོད་ཁང་ལྟ་བུར་རྩི་བཞིན་ཡོད། ལས་གཞི་དེ་ཉིད་བསྒྲུབ་ཆེད་སྒྱུ་རྩལ་ཉར་ཚགས་ཀྱི་བརྟག་དཔྱད་ཁང་ཞིག་གསར་འཛུགས་གནང་ཡོད་པ་དང་། དངོས་རྫས་དང་འབྲེལ་བའི་ཡིག་ཆ་ཕྱོགས་བསྒྲིགས་དང་། ཉར་ཚགས། གཅེས་སྲུང་། དེ་བཞིན་ཕྱོགས་བསྡུས་གནང་བའི་དངོས་རྫས་རྣམས་འགྲེམས་སྟོན་ཆེད་ཕྱི་དྲིལ་བོད་ཀྱི་འགྲེམས་སྟོན་ཁང་གི་དངོས་རྫས་ཉར་ཚགས་རུ་ཁག་ནས་འབད་བརྩོན་བྱེད་བཞིན་ཡོད།

ཕྱི་དྲིལ་བོད་ཀྱི་འགྲེམས་སྟོན་ཁང་གི་དངོས་རྫས་ཉར་ཚགས་རུ་ཁག་ཁོངས། སྒྱུ་རྩལ་ཉར་ཚགས་ཀྱི་སློབ་སྟོན་པ་པང་ཀཇ་ཤར་མ་ Pankaj Sharma ལགས་དང། རས་ཆ་ཉར་ཚགས་ཀྱི་སློབ་སྟོན་པ་ས་མི་ཏ་སིངྒ་ Smita Singh ལགས། དེ་བཞིན་ཕྱི་དྲིལ་བོད་ཀྱི་འགྲེམས་སྟོན་ཁང་གི་འགན་འཛིན་བཀྲ་ཤིས་ཕུན་ཚོགས་ལགས་ཀྱིས་གཙོས་ལས་བྱེད་བསྟན་འཛིན་སྦྱིན་པ་ལགས་དང། ཀུན་དགའ་ཆོས་སྒྲོན་ལགས། ན་ཛི་མ་ཅོ་དྷིརི་ལགས། ཚེ་རིང་ནོར་བུ་ལགས།   ཀརྨ་བཀྲ་ཤིས་ལགས་བཅས་ཡོད། 

ཕྱི་དྲིལ་བོད་ཀྱི་འགྲེམས་སྟོན་ཁང་གིས་ཕྱོགས་བསྡུས་གནང་བའི་ཤུལ་བཞག་དངོས་རྫས་རྣམས་ཉར་ཚགས་དང་། གཅེས་སྲུང་། འགྲེམས་སྟོན་སོགས་ཀྱི་ཆེད་ཨ་རིའི་རོགས་ཚོགས་ (USAID) དང་བོད་ཀྱི་འཐེབ་རྩ་གཉིས་ནས་མ་དངུལ་དང་རྒྱབ་སྐྱོར་གནང་ཡོད།།