ཕྱི་ལོ་ ༢༠༢༠ ཟླ་ ༡༠ ཚེས་ ༨ རེས་གཟའ་ཕུར་བུ།

༄༅། །བོད་ཀན་ལྷོ་ཁུལ་བསང་ཆུ་རྫོང་མི་དམངས་ཁྲིམས་ཁང་ཟེར་བས་བོད་མི་བཅུ་ལ་དྲང་བདེན་མིན་པའི་ཁྲིམས་ཐག་བཅད་ཡོད་པའི་སྐོར་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ཕྱི་ལོ་ ༢༠༢༠ ཟླ་ ༡༠ ཚེས་ ༡ ཉིན་ཤོག་གྲངས་ ༢༨ ཅན་གྱི་སྙན་ཐོ་ཞིག་བཏོན་འདུག

དེ་ཡང་སྙན་ཐོའི་ནང་འཁོད་པ་ལྟར་ན། བོད་ཀན་ལྷོ་ཁུལ་བསང་ཆུ་རྫོང་མི་དམངས་ཁྲིམས་ཁང་ཟེར་བས་བོད་མི་བཅུ་ལ་ཁྲིམས་བཤེར་བྱས་ཏེ་དངུལ་བཙན་འཕྲོག་བྱས་པ་དང་། བཙན་དབང་གིས་ཚོང་རྒྱག་བཅུག་པའི་ཉེས་འཛུགས་འོག་ལོ་ ༩ ནས་ ༡༤ བར་གྱི་བཙོན་འཇུག་ཁྲིམས་ཐག་བཅད་ཡོད་འདུག       བཙོན་འཇུག་བྱས་པའི་བོད་མི་བཅུ་ནི། བཀྲ་ཤིས་རྒྱ་མཚོ་ལགས་དང་། སྙིང་ལྕགས་ལགས། རྒྱལ་ལོ་ལགས། བསོད་ནམས་རྒྱལ་ལགས། སྟག་ཐར་རྒྱལ་ལགས། ཚེ་དབང་ལགས། བསྟན་པ་རྒྱ་མཚོ་ལགས། རྟ་མགྲིན་རྡོ་རྗེ་ལགས། རྟ་མགྲིན་ཚེ་རིང་ལགས། གཅོད་པ་ཚེ་རིང་ལགས་བཅས་ཡིན་ཞིང་། འདི་ལོའི་ཕྱི་ཟླ་ ༦ ཚེས་ ༢༨ དང་ ༢༩ བཅས་ཉིན་གྲངས་གཉིས་རིང་བོད་ཀན་ལྷོ་ཁུལ་བསང་ཆུ་རྫོང་མི་དམངས་ཁྲིམས་ཁང་ཟེར་བས་བོད་མི་བཅུ་ལ་ཁྲིམས་བཤེར་བྱེད་སྐབས་ཆུ་ཚོད་ ༡༠ ཅན་གྱི་བརྙན་ཞིག་ལག་སོན་བྱུང་བ་དང་། བརྙན་དེར་གཞིགས་ན་ཁྲིམས་བཤེར་སྐབས་ཁྲིམས་ཞིབ་པ་དང་ཞུ་གཏུག་པས་ཡང་དང་བསྐྱར་དུ་བོད་མི་དེ་ཚོར་ནག་ཚོགས་ (Evil gang) ཞེས་མིང་འབོད་བྱས་ཡོད་པ་དང་།

ཕྱི་ལོ་ ༢༠༡༢ ལོར་བསང་ཆུ་རྫོང་བང་དཀར་ཐང་ཕྱོགས་སུ་རྒྱ་ནག་གཞུང་གིས་རོགས་སྐྱོར་འཛུགས་སྐྲུན་ཞེས་པའི་ལས་གཞིའི་ཁྲོད་ས་གནས་སུ་བཤས་ར་ཞིག་བཙུགས་པར། བོད་མི་ཚོས་འགོག་ཐབས་བྱས་ཀྱང་འགོག་མ་ཐུབ་པར་བརྟེན་གུན་གསབ་དགོས་བའི་དགོས་འདུན་བཏོན་ཡོད། བཤས་ར་ཁང་གི་ས་གནས་སུ་མཆོད་རྟེན་ཞིག་བཞེངས་ཆེད་རྒྱ་སྒོར་ས་ཡ་གཅིག་གུན་གསབ་སྤྲད་པ་དེ་ཕྱི་ལོ་ ༢༠༡༣ ལོར་མྱུར་སྐྱོད་གཞུང་ལམ་སོགས་འཛུགས་སྐྲུན་གྱི་ལས་གཞིའི་ཁྲོད་ས་གནས་ཀྱི་ཡུལ་མི་ཚོའི་ཞིང་ས་ཤོར་བ་དང་ཁང་ཁྱིམ་ལ་སེར་ཀ་བྱུང་སྟབས། ས་གནས་ཡུལ་མི་ཚོས་གུན་གསབ་ཕྲན་བུ་རེ་བླངས་པར་བརྟེན་འདི་ལོའི་ཕྱི་ཟླ་ ༦ པའི་ནང་བསང་ཆུ་རྫོང་མི་དམངས་ཁྲིམས་ཁང་ཟེར་བས་བོད་མི་བཅུ་ལ་དངུལ་བཙན་འཕྲོག་བྱས་པ་དང་། བཙན་དབང་གིས་ཚོང་རྒྱག་ཏུ་བཅུག་པའི་ཉེས་འཛུགས་བྱས་ཡོད་འདུག །