ཕྱི་ལོ་ ༢༠༢༠ ཟླ་ ༡༠ ཚེས་ ༢༢ རེས་གཟའ་ཕུརབུ།

༄༅། །ཕྱི་ལོ་ ༢༠༢༠ ཟླ་ ༡༠ ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་མཐུན་འགྱུར་འོག་ཀུམ་རའོ་སྒ་པ་བོད་མིའི་གཞིས་ཆགས་སུ་ལམ་ཀ་བཟོ་བཅོས་དང་རྩིག་སྐྱོར་གྱི་ལས་གཞི་ལེགས་པར་གྲུབ་པའི་དབུ་འབྱེད་མཛད་སྒོ་ཞིག་དྲ་རྒྱ་བརྒྱུད་ཚོགས་གནང་ཡོད།

དེ་ཡང་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་དྲ་རྒྱ་བརྒྱུད་དབུ་འབྱེད་གནང་ཡོད་པ་དང་། སྐབས་དེར་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་དང་ཀུམ་རའོ་ས་གནས་འགོ་འཛིན་རབ་བརྟན་ཚེ་རིང་ལགས་རྣམ་གཉིས་ཀྱང་མཉམ་ཞུགས་གནང་ཡོད། 

ས་གནས་འགོ་འཛིན་རབ་བརྟན་ཚེ་རིང་ལགས་ཀྱིས་ལམ་ཀ་བཟོ་བཅོས་དང་རྩིག་སྐྱོར་ལས་གཞིའི་དགོས་པ་དང་དམིགས་ཡུལ་སྐོར་ངོ་སྤྲོད་དང་འབྲེལ་བོད་མིའི་སྒྲིག་འཛུགས་ནས་ལས་གཞིའི་མ་དངུལ་བཀའ་འཁྲོལ་གནང་བར་ཐུགས་རྗེ་ཆེ་ཞུས་ཡོད་པ་མ་ཟད། ལས་གཞི་འདིས་གཞིས་མིའི་འདོད་དོན་དང་། ཉེ་འཁོར་རྒྱ་གར་ཡུལ་མི་ལའང་ཕན་ཐོགས་ཡོད་སྐོར་སོགས་གསུངས།  

ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས་ལས་གཞིའི་དབུ་འབྱེད་སྐབས་དྲ་རྒྱ་བརྒྱུད་གཞིས་མི་རྣམས་ལ་གསུང་བཤད་དང་། སྒ་པ་བདེ་དོན་ཚོགས་པའི་ཚོགས་གཙོ་སྤྱི་ཟུར་བྲའུ་ཚེ་བརྟན་བུ་ཁྲིད་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས། །