ཕྱི་ལོ་ ༢༠༢༠ ཟླ་ ༡༠ ཚེས་ ༣ རེས་གཟའ་སྤེན་པ།
༄༅། །ཕྱི་ལོ་ ༢༠༢༠ ཟླ་ ༡༠ ཚེས་ ༢ རེས་གཟའ་པ་སངས་ཉིན་བོད་ཀྱི་ཟློས་གར་ཚོགས་ཁང་དུ་འོས་བསྡུ་དང་འབྲེལ་བའི་ཤེས་བྱ་གོང་མཐོར་གཏོང་ཐབས་སླད་དབུས་འོས་བསྡུ་ལས་ཁུངས་དང་བོད་ཀྱི་ཟློས་གར་ཚོགས་པ་ཟུང་འབྲེལ་ཐོག་ ༼ ང་ཚོའི་འོས་ནི། ང་ཚོའི་མ་འོངས། ༽ ཞེས་པའི་གློག་བརྙན་དབུ་འབྱེད་ཀྱི་མཛད་སྒོ་ཞིག་ཚོགས་ཡོད།
དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༦།༣༠ ཐོག་དབུས་འོས་བསྡུའི་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་མཆོག་དང་འོས་བསྡུའི་འགན་འཛིན་ལས་འཕར་དགེ་བཤེས་མ་བདེ་ལེགས་དབང་མོ་ལགས། ལོ་རྒྱུས་སློབ་དཔོན་རྒན་པ་སྤྱི་ཟུར་བསོད་ནམས་རྒྱལ་མཚན་ལགས། དྲུང་ཆེ་ཚེ་རིང་དབྱངས་སྐྱིད་ལགས་ཀྱིས་གཙོས་འབྲེལ་ཡོད་ལས་བྱེད་རྣམ་པ། བོད་ཀྱི་ཟློས་གར་ཚོགས་པའི་འགན་འཛིན་དང་སྒྱུ་རྩལ་བ་སོགས་ལྷན་འཛོམས་ཐོག་དབུས་འོས་བསྡུའི་སྤྱི་ཁྱབ་འགན་འཛིན་མཆོག་གིས་འཚམས་འདྲི་དང་འབྲེལ་གསུང་བཤད་གནང་དོན། དེ་རིང་བོད་ཀྱི་ཟློས་གར་ཚོགས་པའི་ཚོགས་ཁང་དུ་དབུས་འོས་བསྡུ་ལས་ཁང་ནས་འོས་བསྡུ་དང་འབྲེལ་བའི་ཤེས་བྱ་གོང་མཐོར་གཏོང་ཐབས་སླད་ང་ཚོའི་འོས་ནི། ང་ཚོའི་མ་འོངས། ཞེས་པའི་གློག་བརྙན་ཞིག་གསར་བཟོ་གནང་ཡོད།
ང་ཚོས་རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་གཱན་ངྷི་མཆོག་གི་སྐུའི་འཁྲུངས་སྐར་དང་བསྟུན་ལས་རིམ་འདི་གོ་སྒྲིག་ཞུས་པ་ཡིན།རྒྱ་ཆེ་མང་ཚོགས་ནས་དགོངས་མངའ་ལྟར་དབུས་འོས་བསྡུ་ལས་ཁུངས་ནས་དྲང་བདེན། འདྲ་མཉམ། གསང་བའི་ཐོག་ནས་སྲི་སྤྱི་གཉིས་ཀྱི་འོས་བསྡུ་ཆེན་མོ་འདི་ལེགས་པར་གྲུབ་པར་འབད་བརྩོན་ཞུ་དགོས་པའི་སྐབས་བབས་ཀྱི་ལས་འགན་ཆ་ནས་དེ་སྔ་འོས་བསྡུ་བསྐྱར་བཅོས་སྒྲིག་གཞི་ཁག་ཡོངས་རྫོགས་ཐད་སྲིང་ཞུས་པ་ཡིན། དེ་བཞིན་ས་གནས་འོས་བསྡུ་འགན་འཛིན་ཡོངས་ལ་གོ་རྟོགས་སྤེལ་ཡོད།
ད་ལྟའི་འཆར་དབུས་འོས་བསྡུའི་སྤྱི་ཁྱབ་འགན་འཛིན་དང་ལས་འཕར་རྣམ་གཉིས་ཀྱིས་འོས་བསྡུའི་སྒྲིག་གཞི་ཡོངས་རྫོགས་རེས་གཟའ་མིག་དམར་ནམ་ཡིན་ལ་ཆུ་ཚོད་ ༡༠ ཐོག་ཐད་སྲིང་ཞུ་བཞིན་ཡོད། འདི་ལོར་ IFS ཞེས་པའི་ཨ་རིའི་རོགས་ཚོགས་བརྒྱུད་རོགས་དངུལ་ཕྲན་བུ་སོན་ཡོད་སྟབས། མང་ཚོགས་ནང་འོས་བསྡུ་དང་འབྲེལ་བའི་ཤེས་བྱ་གོང་འཕེལ་སླད་ལས་འགུལ་ཁ་ཤས་སྤེལ་ཐུབ་པ་བྱུང་ཡོད། དང་པོ་དེར་བཙན་བྱོལ་བོད་མིའི་གཞིས་ཆགས་ཁག་གིས་གཙོས་བོད་མི་འདུས་སྡོད་ཡོངས་ལ་བདུན་ཕྲག་གཉིས་རེའི་མཚམས་གྱང་སྦྱར་པར་གཞི་བརྒྱུད་ང་ཚོའི་འབོད་སྒྲ་དང་། འོས་བསྡུའི་སྒྲིག་གཞི་ནས་གནད་དོན་གལ་ཆེ་ཁག་ཚུར་བཏུས་ཏེ་ཁྱབ་བསྒྲགས་བྱེད་ཀྱི་ཡོད། དེ་དག་གི་ཐོག་ས་གནས་འོས་བསྡུའི་འགན་འཛིན་གྱིས་གཙོས་རྒྱ་ཆེ་མང་ཚོགས་ནས་ཧ་ཅང་ཐུགས་སྣང་གནང་གི་འདུག དེ་དག་ལ་ངས་རྗེས་སུ་ཡི་རང་དང་། ད་དུང་ཡིན་ནའང་མུ་མཐུད་ཐུགས་སྣང་གནང་དགོས་རྒྱུ་གལ་ཆེན་པོ་རེད། ཅེས་ཞུ་རྒྱུ་ཡིན།
དེ་བཞིན་བར་ལམ་ནས་སྤྱི་ཚོགས་ནང་དར་ཁྱབ་ཡོད་པ་ནང་བཞིན་འགུལ་བརྙན་བརྒྱུད་མིང་གཞུང་དེབ་འགོད་ཞུ་ཕྱོགས་སྐོར་ལས་རིམ་བསྒྲིགས་པ་ཡིན། མང་པོ་ཞིག་གིས་དེ་ལ་དགའ་མོས་ཧ་ཅང་གནང་གི་འདུག སྤོབས་པ་སྐྱེ་འོས་པ་ཞིག་ལ་དེ་དག་ཚང་མ་བཟོ་མཁན་བོད་པ་ཡིན། ང་ཚོས་འོས་བསྡུའི་ལས་དོན་ཐོག་མཐའ་བར་གསུམ་ལེགས་གྲུབ་ཡོང་སླད་ལས་འགུལ་སྣ་མང་སྤེལ་བཞིན་ཡོད་པའི་ནང་ནས་དེ་རིང་གློག་བརྙན་ཞིག་བཟོས་ཡོད། དབུས་འོས་བསྡུ་ལས་ཁུངས་ནས་གློག་བརྙན་གྱི་སྒྲོམ་གཞི་བོད་ཀྱི་ཟློས་གར་ཚོགས་པར་ཕུལ་བ་ལྟར་བོད་ཀྱི་ཟློས་གར་ཚོགས་པས་དུས་ཡུན་ཐུང་ངུ་ཞིག་གི་ནང་ཧ་ཅང་ཡག་པོ་གནང་སོང་། དེར་བརྟེན་ངས་ཐུགས་འགན་བཞེས་མཁན་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན།
གློག་བརྙན་འདི་བཟོ་དགོས་པའི་དམིགས་ཡུལ་གཙོ་བོ་ནི། མང་ཚོགས་ནང་འོས་བསྡུ་དང་འབྲེལ་བའི་ཤེས་བྱ་གོང་མཐོར་གཏོང་ཐབས་སླད་དམིགས་པ་ཞིག་ཡིན། གཞུང་འབྲེལ་ཐོག་ནས་འོས་བསྡུ་དང་འབྲེལ་བའི་གློག་བརྙན་བཟོ་པ་ཕལ་ཆེར་ད་རེས་ཐེངས་དང་པོ་ཆགས་ཀྱི་ཡོད། ཅེས་སོགས་ཀྱི་གསུང་བཤད་གནང་། །
