ཕྱི་ལོ་ ༢༠༢༠ ཟླ་ ༡༠ ཚེས་ ༡༡ རེས་གཟའ་ཉི་མ། 

༄༅། །ཕྱི་ལོ་ ༢༠༢༠ ཟླ་ ༡༠ ཚེས་ ༨ ཉིན་རྒྱ་གར་དབུས་གཞུང་གི་རྡུལ་ཕྲན་ནུས་ཤུགས་ཉམས་ཞིབ་ལྷན་ཁང་ Atomic Energy Commission གི་བློན་ཆེན་དང་། རྒྱ་གར་ Lok Jansakti Party (LJP) ཞེས་པའི་སྲིད་དོན་ཚོགས་པའི་དབུ་ཁྲིད་སྐུ་ཞབས་རམ་ཝི་ལ་སི་པ་སི་ཝན་ Shri Ram Vilas Paswan མཆོག་རྒྱ་གར་གྱི་རྒྱལ་ས་ལྡི་ལིར་དགུང་ལོ་ ༧༤ ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དམ་པ་ཁོང་གི་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོའི་གསུང་འཕྲིན་ཞིག་གནང་བའི་ནང་འཁོད་དོན། རྒྱ་གར་གྱི་གྲོས་ཚོགས་འཐུས་མི་ལོ་བརྒྱད་རིང་གནང་མྱོང་བ་དང་མི་མང་ཉམ་ཐག་ཚོའི་བདེ་དོན་ཆེད་དུ་ཕྱག་ལས་གནང་མྱོང་མཁན། དེ་བཞིན་ཆབ་སྲིད་ཀྱི་དབུ་ཁྲིད་རླབས་ཆེན་སྐུ་ཞབས་རམ་ཝི་ལ་སི་པ་སི་ཝན་ Shri Ram Vilas Paswan མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོ་བའི་གནས་ཚུལ་གོ་ཐོས་བྱུང་བས། ཕྲན་རང་ཉིད་ནས་དམ་པ་ཁོང་གི་ནང་མི་རྣམས་ཀྱིས་གཙོས་བྷི་ཧར་མངའ་སྡེའི་མི་མང་དང་རྒྱ་གར་མི་མང་ཡོངས་ལ་གདུང་སེམས་མཉམ་སྐྱེ་དང་ཐུགས་གསོ་ཞུ་རྒྱུ་ཡིན།

སྐུ་ཞབས་རམ་ཝི་ལ་སི་པ་སི་ཝན་མཆོག་ནི་བོད་དང་བོད་མིའི་ཡིད་ཆེས་བློ་འགེལ་གྱི་གྲོགས་པོ་ཞིག་ཡིན་ཞིང་། དམ་པ་ཁོང་གིས་ལོ་ངོ་བཅུ་ཕྲག་འགའི་རིང་ཆབ་སྲིད་ཀྱི་ཕྱག་ལས་གནང་བའི་སྐབས་བོད་དོན་སླད་རྒྱབ་སྐྱོར་ཤུགས་ཆེ་གནང་མྱོང་ཡོད་པ་མ་ཟད། བོད་མི་དང་བོད་དོན་སླད་རྒྱབ་སྐྱོར་ཡུན་རིང་ཤོས་གནང་མཁན་གྲས་ཤིག་ཀྱང་ཡིན། དམ་པ་ཁོང་གིས་བོད་དོན་རྒྱབ་སྐྱོར་མཚོན་སླད་བོད་དོན་ལས་འགུལ་ཁག་འདྲ་མིན་ནང་མཉམ་ཞུགས་གནང་ཡོད་པ་མ་ཟད། ཕྱི་ལོ་ ༢༠༡༣ ཟླ་ ༢ ནང་རྒྱ་གར་གྱི་རྒྱལ་ས་ལྡི་ལིར་བཀའ་སྤྱི་གཉིས་ཀྱིས་སྣེ་ཁྲིད་པའི་བོད་མིའི་གདུང་སེམས་མཉམ་སྐྱེའི་ལས་འགུལ་ཆེན་མོ་སྤེལ་སྐབས་སུའང་མཉམ་ཞུགས་གནང་ཡོད་པ་དང་། དེ་ནས་ལོ་གཅིག་རྗེས་དམ་པ་ཁོང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་ཁོང་གི་བཞུགས་ཤག་ཏུ་སྣེ་ལེན་གནང་ཡོད། ཕྱི་ལོ་ ༢༠༡༤ ལོར་ཁོང་དང་ཐུག་འཕྲད་ཀྱི་གོ་སྐབས་བྱུང་། སྐབས་དེར་དམ་པ་ཁོང་ནི་ཧ་ཅང་བརྩེ་སེམས་ཆེ་ཞིང་བག་དྲོ་བ་ཞིག་འདུག རྒྱ་གར་དབུས་གཞུང་གི་བློན་ཆེན་དང་གྲོས་ཚོགས་འཐུས་མི་ཞིག་ཡིན་པའི་ཆ་ནས་དམ་པ་ཁོང་གིས་མུ་མཐུད་བོད་དོན་ཆེད་དུ་རྒྱབ་སྐྱོར་ཤུགས་ཆེ་གནང་རྒྱུ་ཡིན་པའི་ཁས་ལེན་གནང་བྱུང་། སྐུ་འཚོ་བཞུགས་རིང་དམ་པ་ཁོང་གིས་ཐུགས་བརྩེ་བ་ཆེན་པོའི་སྒོ་ནས་བོད་དོན་སླད་དུ་རྒྱབ་སྐྱོར་གནང་བ་དེ་བོད་མི་ཚོས་དུས་རྟག་ཏུ་དྲན་ངེས་ཡིན། ཞེས་འཁོད། །