ཕྱི་ལོ་ ༢༠༢༠ ཟླ་ ༡༠ ཚེས་ ༢༦ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༡༠ ཚེས་ ༢༤ རེས་གཟའ་སྤེན་པ་ཉིན་ཐེ་ཝན་བོད་ཀྱི་སྐུ་ཚབ་དོན་ཁང་དང་། ཐེ་སྡོད་བོད་རིགས་ཚོགས་པ་ནས་གཙོ་འགན་ཐོག་ ༢༠༢༠ ལོ་ཐུན་མོང་གི་གཞི་རྟེན་འཚོལ་བ་ཞེས་རྒྱལ་སྤྱིའི་བགྲོ་གླེང་ཚོགས་འདུ་ཞིག་ཐེ་ཝན་རྒྱལ་ས་ཐའེ་པེ་གྲོང་ཁྱེར་ནང་གོ་སྒྲིག་གནང་ཡོད་པ་རེད།
ཐེངས་འདིའི་བགྲོ་གླེང་ཚོགས་འདུ་ནི་༼ནད་ཡམས་དང་། རྒྱལ་སྤྱིའི་འགྱུར་ལྡོག་ཤུགས་ཆེ་འགྲོ་བའི་སྐབས་རྒྱ་ནག་གཞུང་གིས་བོད་དང་། སོག་པོ། ཤར་ཏུར་ཀི་སི་ཐན། ཧོང་ཀོང་ཐོག་འཛིན་པའི་སྲིད་བྱུས།༽ ཞེས་པའི་བརྗོད་གཞིའི་ཐོག་བགྲོ་གླེང་ལྷུག་པོ་གནང་ཡོད། དེང་སྐབས་འཛམ་གླིང་ས་གནས་གང་སར་རྒྱ་ནག་ཝུ་ཧན་ནས་ཁྱབ་པའི་ནད་ཡམས་ཀྱིས་རྐྱེན་པས་ཨ་རི་དང་། འཇར་མི་ནི། ཨུ་རུ་སུ། ཧོང་ཀོང་སོགས་ནང་གནས་སྡོད་ཕྱི་རྒྱལ་མི་རིགས་དང་། རྒྱ་རིགས། སོག་པོ། ཧོང་ཀོང་བ་སོགས་ནས་དྲ་རྒྱ་དང་། བརྙན་འཕྲིན་ཐོག་ནས་གཏམ་བཤད་གནང་ཡོད་པ་རེད།
བགྲོ་གླེང་ཚོགས་འདུའི་ཐོག་མར་སྐུ་མགྲོན་གཙོ་བོ་རང་གཞུང་ཆོས་རིག་བཀའ་ཟུར་༸སྐྱབས་རྗེ་ཀིརྟི་རིན་པོ་ཆེ་མཆོག་གིས་ཚོགས་ཞུགས་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་དང་སྦྲགས། ཏོག་དབྱིབས་ནད་ཡམས་རྒྱ་ནག་ནས་ཁྱབ་གདལ་ཕྱིན་ནས་འཛམ་གླིང་ཡོངས་ལ་དཀའ་ངལ་བཟོས་ཡོད་པ་དང་། ཆབས་ཅིག་རྒྱ་ནག་གཞུང་གིས་དྲིལ་བསྒྲགས་རྫུན་མ་དང་གནོན་ཤུགས་སོགས་བྱས་པ་ཚང་མ་འཛམ་གླིང་མི་མང་གིས་ཤེས་རྟོག་དགོས་རྒྱུའི་དུས་ཚོད་ཅིག་ཤར་ཡོད་ལ། དུས་མཚུངས་ང་ཚོ་གྲངས་ཉུང་མི་རིགས་ཀྱི་དཀའ་ངལ་དེ་བདེན་པ་ཡིན་པ་དེ་འཛམ་གླིང་མི་མང་ལ་ཤོད་རྒྱུ་མ་ཟད། རྒྱ་ནག་མི་མང་ལ་ཡང་ངོ་སྤྲོད་བྱ་རྒྱུའི་སྡིངས་ཆ་ཡག་པོ་ཞིག་ཆགས་ཡོད་པས་བགྲོ་གླེང་ཚོགས་འདུ་འདི་བཞིན་སྐབས་སུ་བབ་པ་ཡིན་སྐོར་སོགས་ཀྱི་གསུང་བཤད་གནང་ཡོད།
དེ་རྗེས་སྐུ་མགྲོན་ཐའེ་པེ་གྲོང་ཁྱེར་གྲོས་ཚོགས་འཐུས་མི་སྲས་མོ་ལིན་དབྱི་མོང་ལགས་ཀྱིས། ཁོང་ཉིད་བོད་མི་སོགས་ལ་རྒྱབ་སྐྱོར་གནང་དགོས་དོན་ནི་ཐེ་ཝན་གཞོན་སྐྱེས་ཚོས་རྒྱ་ནག་གཞུང་གིས་བོད་མི་སོགས་ལ་འཛིན་པའི་སྲིད་བྱུས་དང་། ལག་བསྟར་གང་བྱེད་བཞིན་ཡོད་པ་དེ་དག་ཤེས་རྟོག་དང་རྒྱབ་སྐྱོར་ཐོབ་ཆེད་ཁོང་གིས་ལས་འགུལ་སྤེལ་གྱི་ཡོད་པའི་སྐོར་ངོ་སྤྲོད་གནང་།
ཐེ་སྡོད་བོད་རིགས་ཚོགས་པའི་ཚོགས་གཙོ་བསྟན་འཛིན་རྣམ་དག་ལགས་ཀྱིས་བགྲོ་གླེང་ཚོགས་འདུ་གོ་སྒྲིག་གནང་བའི་དགོས་དམིགས་ངོ་སྤྲོད་གནང་རྗེས་བགྲོ་གླེང་ཚོགས་འདུ་དངོས་གཞི་འགོ་འཛུགས་གནང་།
ཚོགས་ཐེངས་དང་པོ་ཨུ་རུ་སུའི་རྩོམ་པ་པོ་སྐུ་ཞབས་ཀུ་ཛ་མིན་ལགས་ཀྱིས་བརྙན་འཕྲིན་བརྒྱུད་༼སྦས་བསྐུངས་ཀྱི་བོད།༽ཅེས་པའི་དཔེ་དེབ་ནང་དོན་གཞི་བཞག་གིས་བོད་ཀྱི་ལོ་རྒྱུས་གནས་བབ་ངོ་སྤྲོད་དང་། འཇར་མི་ནིར་གནས་སྡོད་ཆུའི་ཐོན་ཁུངས་ཁྱད་ལས་པ་རྒྱ་མི་རིགས་སྐུ་ཞབས་ཝང་ཝིའི་ལོའོ་ལགས་ཀྱིས་བརྙན་འཕྲིན་བརྒྱུད་༼རྒྱ་གཞུང་གིས་ལྷོ་ཆུ་བྱང་འདྲེན་གྱི་ནུབ་བརྒྱུད་ལས་གཞིས་བོད་ས་མཐོའི་ཁོར་ཡུག་ལ་ཤུགས་རྐྱེན།༽ཞེས་པའི་བརྗོད་གཞིའི་ཐོག་ནས་ངོ་སྤྲོད། ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་༼རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས།༽ཞེས་པའི་བརྗོད་གཞིའི་ཐོག་ད་ལྟའི་བོད་ནང་གི་ཛ་དྲག་གནས་སྟངས་ངོ་སྤྲོད་དང་ཚོགས་ཞུགས་པའི་དྲི་བར་ལན་འདེབས་བཅས་གནང་།
ཚོགས་ཐེངས་གཉིས་པ་འཇར་མི་ནིར་གནས་སྡོད་སོག་པོ་མི་རིགས་ཞིའི་ཧའེ་མིང་ལགས་ཀྱིས་བརྙན་འཕྲིན་བརྒྱུད་༼རྒྱ་ནག་གཞུང་གིས་སོག་པོའི་ཐོག་འཛིན་པའི་སྲིད་བྱུས།༽ཞེས་པ་དང་། དེ་བཞིན་རྒྱ་ནག་དྲུག་བཞིའི་དོན་རྐྱེན་སྐབས་སློབ་ཕྲུག་གི་འགོ་ཁྲིད་ཡུ་གུར་བ་ཝུའེ་ཁེ་ཤེ་ཡིས་༼རྒྱ་ནག་གཞུང་གིས་ཤར་ཏུར་ཀི་སི་ཐན་ཐོག་འཛིན་པའི་སྲིད་བྱུས།༽ཞེས་པའི་བརྗོད་གཞིའི་ཐོག་ངོ་སྤྲོད། གངས་ལྗོངས་དཔེ་སྐྲུན་ཁང་གི་འགན་འཛིན་ལྕམ་ལེའེ་གཡུས་ཉིང་ལགས་ཀྱིས་༼རྒྱ་གཞུང་གི་ལྐོག་བྱུས།༽ཞེས་པའི་བརྗོད་གཞིའི་ཐོག་ནས་ངོ་སྤྲོད་གནང་རྗེས་དྲི་བར་ལན་འདེབས་བཅས་གནང་།
ཚོགས་ཐེངས་གསུམ་པ་གཙོ་བོ་ཧོང་ཀོང་གི་བརྗོད་གཞིའི་ཐོག་ཧོང་ཀོང་ནས་མི་གྲངས་གསུམ་གྱིས་བརྙན་འཕྲིན་དང་དྲ་ལམ་ཐད་གཏོང་ཐོག་ནས་ཧོང་ཀོང་ནང་འཕྲད་པའི་དཀའ་ངལ་ངོ་སྤྲོད་དང་། ཐེ་ཝན་དབུས་ཞིབ་འཇུག་ཁང་གི་ལོ་རྒྱུས་ཞིབ་འཇུག་སློབ་དཔོན་ཝུའུ་རུད་རེན་ལགས་ཀྱིས་ཧོང་ཀོང་མི་མང་གི་འཐབ་རྩོད་སྐོར་ངོ་སྤྲོད་དང་དྲི་བར་ལན་འདེབས་བཅས་གནང་།
ཚོགས་ཐེངས་བཞི་པ་ཨ་རི་ཀོ་ལོམ་བྷི་ཡ་གཙུག་ལག་སློབ་ཆེན་དགེ་ཆེ་སྐུ་ཞབས་ཇེ་མི་སི་སེ་མོར་ James Seymour ལགས་ཀྱིས་བརྙན་འཕྲིན་བརྒྱུད་༼རྒྱལ་སྤྱིའི་ཁྲིམས་ཐོག་ནས་བོད་དང་ཐེ་ཝན་གྱི་རང་སྐྱོང་གནས་བབ།༽སྐོར་ངོ་སྤྲོད་དང་། དེ་མིན་ཐེ་ཝན་དགེ་ཆེ་གསུམ་གྱིས་བོད་དང་རྒྱ་ནག་སོགས་ཀྱི་སྐོར་ལ་གཏམ་བཤད་གནང་བ་མ་ཟད། དགེ་ཆེ་སུའུ་ཅཱ་ཧུང་ལགས་ཀྱིས་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་འོས་བསྡུའི་སྔོན་འགྲོའི་འོས་མི་དང་འབྲེལ་བའི་སྐོར་ལ་ངོ་སྤྲོད་བཅས་གནང་ནས་ཉིན་གཅིག་གི་བགྲོ་གླེང་ཚོགས་འདུ་མཇུག་སྒྲིལ།
ཐེངས་འདིའི་བགྲོ་གླེང་ཚོགས་འདུར་དྲ་ལམ་ནས་ཐོ་འགོད་ཀྱིས་ཟུར་ཉན་པ་མི་གྲངས་དྲུག་ཅུ་ལྷག་མཉམ་ཞུགས་གནང་ཡོད་པ་དང་། ཐེ་ཝན་མང་གཙོ་ཚོགས་པ་དང་། ཡུན་རིང་ཞི་བདེ་རོགས་ཟླ་ཚོགས་པ་ནས་འགྲོ་གྲོན་མཐུན་རྐྱེན་གནང་ཡོད་པ་རེད།
ཐེ་ཝན་བོད་ཀྱི་སྐུ་ཚབ་དོན་ཁང་དང་། ཐེ་སྡོད་བོད་རིགས་ཚོགས་པ་མཉམ་འབྲེལ་ཐོག་ཕྱི་ལོ་ ༢༠༡༤ ལོ་ནས་བཟུང་ཐེ་ཝན་ནང་ཐུན་མོང་གི་གཞི་རྟེན་འཚོལ་བ་ཞེས་རྒྱལ་སྤྱིའི་བགྲོ་གླེང་ཚོགས་འདུ་ལོ་རེར་ཐེངས་རེ་བསྐོང་ཚོགས་གནང་མུས་ཡིན་པ་རེད། །
