ཕྱི་ལོ་ ༢༠༢༠ ཟླ་ ༡༠ ཚེས་ ༡༩ རེས་གཟའ་ཟླ་བ།
༄༅། །འདི་གར་སིམ་ལ་བོད་མིའི་༸རྒྱལ་བའི་བཀའ་དྲིན་རྗེས་དྲན་ཚོགས་ཆུང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ནས་ལམ་སྟོན་བཀའ་ཡིག་དགོངས་དོན་ལྟར། ཕྱི་ལོ་ ༢༠༢༠ ཟླ་ ༧ ཚེས་ ༡ ནས་ཕྱི་ལོ་ ༢༠༢༡ ཟླ་ ༦ ཚེས་ ༣༠ བར་༸རྒྱལ་བའི་བཀའ་དྲིན་རྗེས་དྲན་གྱི་ལོ་སྲུང་བརྩི་ཞུ་རྒྱུ་ཐུགས་གཏན་ལས་འཆར་ལྟར། ཕྱི་ལོ་ ༢༠༢༠ ཟླ་ ༩ ཚེས་ ༡༡ ཉིན་ཧི་མཱ་ཅལ་མངའ་སྡེའི་སྲིད་སྐྱོང་ལས་ཡུན་ལོ་གཅིག་ཧྲིལ་པོ་འཁོར་བའི་ཉིན་དང་བསྟུན་ཁོ་པར་འཚམས་འདྲི་ཞུས་པ་བཅས་དེ་ཉིན་ནས་སི་མ་ས་གནས་སུ་བོད་མི་རྣམས་ནས་༸རྒྱལ་བའི་བཀའ་དྲིན་རྗེས་དྲན་སྲུང་བརྩི་ཞུ་རྒྱུ་འགོ་འཛུགས་ཞུས།
སིམ་ལ་ས་གནས་༸རྒྱལ་བའི་བཀའ་དྲིན་རྗེས་དྲན་ལས་དོན་ཚོགས་ཆུང་ནས་སྤྱི་སྒེར་གཉིས་ཀྱི་དྲུང་ནས་ཞལ་འདེབས་བསྡུ་རུབ་ཀྱིས་མཚོན་ཕྱི་ལོ་ ༢༠༢༡ ཟླ་ ༦ ཚེས་ ༣༠ བར་༸རྒྱལ་བའི་བཀའ་དྲིན་རྗེས་དྲན་སྲུང་བརྩི་ཞུ་ཕྱོགས་ཐད་གོ་བསྡུར་དང་ལས་རིམ་རགས་ཟིན་བཟོ་སྒྲིག་ཞུས།
སིམ་ལ་ས་གནས་༸རྒྱལ་བའི་བཀའ་དྲིན་རྗེས་དྲན་ཚོགས་ཆུང་གི་གོ་སྒྲིག་འོག་ཕྱི་ལོ་ ༢༠༢༠ ཟླ་ ༡༠ ཚེས་ ༡༧ ཉིན་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རི་གསེར་གྱི་གཟེངས་རྟགས་འབུལ་བཞེས་མཛད་པའི་སྐལ་བཟང་ཉིན་མོར་ཁྱབ་ཁོངས་དགོན་སྡེ་གཉིས་དང་། རྒས་གསོ་ཁང་། གཞིས་སྒར་བཅས་ཀྱི་སེར་སྐྱ་མང་ཚོགས་ནས་༸རྒྱལ་བའི་སྐུ་ཕྱྭའི་ཞབས་རིམ་གསོག་སྒྲུབ་ཞུས་པ་བཅས། །
