ཕྱི་ལོ་ ༢༠༢༠ ཟླ་ ༩ ཚེས་ ༣ རེས་གཟའ་ཕུར་བུ།
༄༅། །ཕྱི་ལོ་ ༢༠༢༠ ཟླ་ ༩ ཚེས་ ༢ ཉིན་ཨིན་ཡུལ་གྱི་རྒྱལ་ས་ལོན་ཌོན་གྱི་གྲོང་སྡེའི་སྤྱི་ཁྱབ་ལས་ཁུངས་ནས་བོད་ཀྱི་རྒྱལ་དར་སྒྲེང་འཛུགས་ཀྱི་ལམ་ནས་བཙན་བྱོལ་བོད་མིའི་ཆབ་སྲིད་ཀྱི་རང་བཞིན་ཡང་དག་པའི་མང་གཙོའི་ལམ་སྲོལ་དུ་བསྒྱུར་ནས་ལོ་ངོ་ ༦༠ ཧྲིལ་པོ་འཁོར་བའི་དུས་ཆེན་སྲུང་བརྩི་ཞུས་གནང་འདུག
དེ་ཡང་ལོན་ཌོན་གྲོང་སྡེའི་སྤྱི་ཁྱབ་པ་སྐུ་ཞབས་རོ་བྷིན་ Christopher Robin མཆོག་གིས་ཨིན་ཡུལ་སྐུ་ཚབ་དོན་ཁང་བརྒྱུད་བོད་མི་ཡོངས་ལ་འཚམས་འདྲི་གནང་འདུག སྤྱིར་ལོན་ཌོན་གྲོང་སྡེའི་ཚོགས་ཁང་དུ་ལོ་གསུམ་གོང་ནས་བཟུང་བོད་ཀྱི་རྒྱལ་དར་སྒྲེང་འཛུགས་ཙམ་དུ་མ་ཟད། ལས་ཁུངས་ཀྱི་འགོ་ལས་རྣམ་པ་དང་ས་གནས་བོད་མི་ལྷན་འཛོམས་ཐོག་བོད་མིའི་མང་གཙོའི་དུས་ཆེན་སྲུང་བརྩི་གནང་བཞིན་ཡོད་ཀྱང་། འདི་ལོར་ཏོག་དབྱིབས་གཉན་རིམས་ཁྱབ་བརྡལ་གྱི་རྐྱེན་པས་མི་ཚོགས་འདུ་འཛོམས་ཐུབ་མེད་ནའང་། གྲོང་སྡེ་ལས་ཁུངས་ནས་བོད་ཀྱི་རྒྱལ་དར་སྒྲེང་འཛུགས་གནང་ཐུབ་ཡོད་སྐོར་གྲོང་སྡེའི་སྤྱི་ཁྱབ་པས་གསུང་འདུག
ཕྱོགས་མཚུངས་གྲོང་སྡེའི་སྤྱི་ཁྱབ་པ་མཆོག་གིས་ལོན་ཌོན་གྲོང་སྡེ་ལས་ཁུངས་དང་བོད་མིའི་དབར་མཛའ་བརྩེའི་འདུ་ཤེས་དང་རྒྱབ་སྐྱོར་མུ་མཐུད་ཡོད་སྐོར་གསུང་ཞིང་། གལ་གནད་ཆེ་བའི་བོད་མིའི་མང་གཙོའི་དུས་ཆེན་ལོ་རྗེས་མ་མུ་མཐུད་སྔར་རྒྱུན་བཞིན་མི་ཚོགས་འདུ་འཛོམས་ཀྱི་ལམ་ནས་སྲུང་བརྩི་ཞུ་གནང་རྒྱུ་ཡིན་པ་གསུང་འདུག
ཨིན་ཡུལ་སྐུ་ཚབ་དོན་གཅོད་ལས་ཁུངས་ནས་ལོན་ཌོན་གྲོང་སྡེའི་སྤྱི་ཁྱབ་པ་མཆོག་གིས་གཙོས་ཕྱག་སྦྲེལ་ལས་བྱེད་ཡོངས་ལ་ད་ལྟའི་ཛ་དྲག་གནས་སྟངས་ལ་མ་ལྟོས་པར་བོད་མིར་རྒྱབ་སྐྱོར་གྱིས་མང་གཙོའི་དུས་ཆེན་གང་ཐུབ་སྲུང་བརྩི་ཞུ་གནང་བར་བཀའ་དྲིན་ཆེ་ཞུས་གནང་འདུག །
