ཕྱི་ལོ་ ༢༠༢༠ ཟླ་ ༩ ཚེས་ ༡༨ རེས་གཟའ་པ་སངས།

༄༅། །སྦེལ་ཇམ་གྱི་རྒྱལ་ས་སྦར་སེལ་ Brussels ནང་རྟེན་གཞི་བྱས་པའི་ད་ལྟ་ NOW ཞེས་པའི་རྒྱལ་སྤྱིའི་ལས་འགུལ་ཚོགས་པས་ཆུ་ཚོད་ ༢༤ རིང་རྒྱང་རྒྱུག་བང་རྩལ་འགྲན་བསྡུར་ Marathon ཞིག་གོ་སྒྲིག་གནང་སྟེ་རྒྱ་ནག་གི་བཙན་གནོན་འོག་ཡོད་པའི་བོད་དང་། ཐེ་ཝན། ཧོང་ཀོང་། ཤར་ཏུར་ཀི་སི་ཐན། ལྷོ་སོག་པོ་བཅས་ཀྱི་གནད་དོན་སྐོར་བགྲོ་གླེང་གནང་ཡོད།

དེ་ཡང་ཕྱི་ལོ་ ༢༠༢༠ ཟླ་ ༩ ཚེས་ ༡༥ ཉིན་ཏེ་རྒྱལ་སྤྱིའི་མང་གཙོ་ཉིན་མོ་དང་བསྟུན་ད་ལྟ་ཞེས་པའི་རྒྱལ་སྤྱིའི་ལས་འགུལ་ཚོགས་པས་དྲ་རྒྱ་བརྒྱུད་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཆེད་དུ་མགྲོན་འབོད་ཞུས་ཏེ་བཙན་བྱོལ་བོད་མིའི་མང་གཙོ་འཕེལ་རིམ་སྐོར་གསུང་བཤད་གནང་བཅུག་ཡོད།

སྐབས་དེར་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་བཙན་བྱོལ་བོད་མིའི་མང་གཙོ་འཕེལ་རིམ་སྐོར་གཟབ་རྒྱས་གསུང་བ་མ་ཟད། དབུ་མའི་ལམ་ནི་བོད་ཀྱི་གནད་དོན་གསལ་བར་དངོས་ཡོད་གནས་ཚུལ་དང་མཐུན་པ་ཞིག་ཡིན་པ་དང་། ཡུ་རོབ་སྤྱི་མཐུན་ཚོགས་པའི་ངོས་ནས་ཐག་གཅོད་ཅིག་གནང་སྐབས་ཕྱོགས་གཉིས་ཀར་ཁེ་ཕན་ཆེད་དུ་གྲོས་མོལ་དང་བགྲོ་གླེང་གནང་གི་ཡོད་ཅེས་དང་།

གཞན་ཡང་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས། རྒྱ་ནག་གཞུང་གིས་ཕྱི་ལོ་ ༡༩༥༠ ལོར་བོད་ནང་དབང་སྒྱུར་བྱས་པའི་སྐབས་བོད་མིའི་གཞུང་འཛིན་སྐྱོང་གནང་སྟངས་དང་། སྲོལ་རྒྱུན་འཚོ་བ་སྐྱེལ་སྟངས་ཐོག་དམ་བསྒྲགས་ཚད་ལས་བརྒལ་བ་བྱས་ཏེ་མཐར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བཙན་བྱོལ་བོད་མི་བརྒྱད་ཁྲིི་ལྷག་རྒྱ་གར་ལ་བཙན་བྱོལ་དུ་ཕེབས་དགོས་བྱུང་ཡོད།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལ་བཙན་བྱོལ་དུ་ཆིབས་སྒྱུར་བསྐྱངས་རྗེས་རིམ་པས་བཙན་བྱོལ་བོད་མིའི་མང་གཙོ་སྒྲིག་འཛུགས་དབུ་འཛུགས་མཛད་ཡོད།

བཙན་བྱོལ་བོད་མིའི་མང་གཙོ་སྒྲིག་འཛུགས་དེ་རྒྱ་ནག་གི་གཉའ་གནོན་འོག་མྱོང་བཞིན་པ་རྣམས་ལ་མིག་དཔེ་ལྟ་བུ་ཆགས་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༠༡ ལོ་ནས་ཕྱེད་རྒན་ཡོལ་མཛད་པ་དང་། ཕྱི་ལོ་ ༢༠༡༡ ལོར་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་འགོ་འཁྲིད་ལ་རྩིས་སྤྲོད་མཛད་ཡོད། ཅེས་གསུངས།

ཐེངས་འདིའི་ལས་རིམ་གོ་སྒྲིག་ཚོགས་ཆུང་ནས་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ལས་རིམ་ནང་མཉམ་ཞུགས་གནང་བ་དེས་བོད་མིའི་འཐབ་རྩོད་དང་། བཙན་བྱོལ་བོད་མིའི་མང་གཙོའི་སྒྲིག་འཛུགས་སྐོར་གོ་རྟོགས་ཡོང་བར་ཕན་ཐོགས་འབྱུང་ངེས་ཡིན་པ་མ་ཟད། རྒྱལ་སྤྱིའི་ཚོགས་སྡེ་ཁག་ནས་ཀྱང་བོད་དོན་རྒྱབ་སྐྱོར་སླད་ཕན་ཐོགས་འབྱུང་ངེས་རེད་ཅེས་སོགས་གསུངས།།