༄༅། །ཕྱི་ལོ་ ༢༠༢༠ ཟླ་ ༨ ཚེས་ ༢༨ ནས་ ༢༩ བར་ཉིན་གྲངས་གཉིས་རིང་བོད་ལྗོངས་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་ཟེར་བ་རྒྱ་ནག་གི་རྒྱལ་ས་པེ་ཅིང་དུ་ཚོགས་ཡོད་པ་དང་། སྐབས་དེར་རྒྱ་ནག་གི་སྲིད་འཛིན་ཞི་ཅིན་ཕིང་གིས། དུས་རབས་གསར་པའི་ནང་ངེས་པར་དུ་མེས་རྒྱལ་གོང་བུ་གཅིག་གྱུར་སྲུང་སྐྱོབ་བྱེད་དགོས་པ་དང་། མཐའ་མཚམས་སྐྱོང་བར་སྔོན་ལ་བོད་བརྟན་ལྷིང་ཡོང་བ་བྱེད་དགོས་པ། མི་རིགས་མཐུན་སྒྲིལ་ལ་ཤུགས་སྣོན་རྒྱག་དགོས་པ། མང་ཚོགས་ལ་སློབ་གསོ་དང་ཁྲིད་སྟོན་བྱེད་དགོས་པ། ཁ་བྲལ་ལ་ངོ་རྒོལ་བྱེད་དགོས་པ། བོད་བརྒྱུད་ནང་བསྟན་དེ་ཀྲུང་གོ་ཅན་དུ་འགྱུར་བར་སྐུལ་འདེད་གཏོང་དགོས་ཞེས་ཚོར་བ་ཤུགས་ཆེན་པོའི་སྒོ་ནས་གཏམ་བཤད་སྤེལ་ཡོད།

བོད་ལྗོངས་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་སྔོན་མ་དང་མ་འདྲ་བར། ཞི་ཅིན་ཕིང་གིས་ཐེངས་འདིའི་ཚོགས་འདུ་སྟེང་སྤེལ་བའི་གཏམ་བཤད་དེ་རྒྱལ་ནང་དང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གི་ནང་འགྲེམས་སྤེལ་བྱས་ཡོད་པ་མ་ཟད། རྒྱ་ནག་གི་གཞུང་འབྲེལ་གསར་འགྱུར་བརྒྱུད་ལམ་ནང་དུས་རབས་གསར་པའི་ཏང་གི་བོད་སྐྱོང་འཐབ་ཇུས་ཞེས་བཀོད་ཡོད། རྒྱ་ནག་དམར་ཤོག་ཚོགས་པའི་གཞུང་འབྲེལ་གསར་འགྱུར་ཤིན་ཧཱ་དྲ་ཚིགས་Xinhua News སྟེང་མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ཀྱིས་ཕྱུག་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་ཞིག་འབད་པ་ཆེན་པོས་འཛུགས་སྐྲུན་བྱེད་དགོས་ཞེས་དང་། བོད་ལྗོངས་ཀྱི་ལས་དོན་གྱིས་ངེས་པར་དུ་མེས་རྒྱལ་གོང་བུ་གཅིག་གྱུར་ལ་སྲུང་སྐྱོབ་དང་། མི་རིགས་མཐུན་སྒྲིལ་ལ་ཤུགས་སྣོན་རྒྱག་རྒྱུ་དེ་གཞི་འཛིན་ས་དང་ཤུགས་འདོན་སར་བརྩི་དགོས། མང་ཚོགས་ལ་སློབ་གསོ་དང་ཁྲིད་སྟོན་བྱ་རྒྱུར་ཤུགས་སྣོན་རྒྱག་པ་དང་། མང་ཚོགས་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་ནང་ཞུགས་རྒྱུར་སྐུལ་སློང་རྒྱ་ཁྱབ་བྱས་ནས། བརྟན་ལྷིང་ལ་སྲུང་སྐྱོང་བྱེད་པའི་སྲ་བརྟན་མཁར་གྱང་ཆགས་པ་བྱ་དགོས། ཞེས་ཞི་ཅིན་ཕིང་གིས་གཏམ་བཤད་སྤེལ་བ་དེ་ལུང་འདྲེན་གྱིས་བཀོད་ཡོད།

ཞི་ཅིན་ཕིང་གིས་གཏམ་བཤད་སྤེལ་བའི་བརྗོད་བྱ་དང་ཚིག་བེད་སྤྱོད་གཏོང་སྟངས་དེ་དག་གིས་བོད་ནང་བརྟན་ལྷིང་མེད་པ་དང་རྒྱ་ནག་དམར་ཤོག་ཚོགས་པས་ད་བར་བོད་ནང་མགོ་སྐོར་བསླུ་བྲིད་ཀྱི་སྲིད་བྱུས་ལག་བསྟར་བྱས་པ་ཁག་ལམ་ལྷོངས་བྱུང་མེད་པ་གསལ་པོར་བསྟན་ཡོད། རྒྱ་ནག་གི་འགོ་ཁྲིད་གཙོ་བོ་ཞི་ཅིན་ཕིང་གིས་གཏམ་བཤད་སྤེལ་བ་དེས་རྒྱ་ནག་གིས་འདས་པའི་ལོ་ངོ་ ༧༠ རིང་བོད་ལ་དབང་སྒྱུར་བྱས་ཏེ་བོད་དང་བོད་མིར་ཕན་ཐོགས་པའི་གྲུབ་འབྲས་གང་ཡང་ཐོན་མེད་པའི་བདེན་དཔང་གསལ་རྗེན་དུ་བསྟན་ཡོད། བོད་མི་ཚོས་རྒྱ་ནག་དམར་ཤོག་ཚོགས་པར་ཡིད་ཆེས་དང་བློ་འགལ་བྱེད་ཐུབ་ཀྱི་མེད། རྒྱ་ནག་གིས་བོད་ནང་རྒྱ་སྐྱེད་རིང་ལུགས་ཀྱི་སྲིད་བྱུས་སྤེལ་བའི་ཐོག་བོད་ཀྱི་གཏེར་ཁ་གང་བྱུང་སྔོག་འདོན་དང་བོད་མཐོ་སྒང་དམག་སར་བསྒྱུར་ཐབས་བྱེད་བཞིན་ཡོད།

རྒྱ་ནག་གིས་རྒྱུན་དུ་བོད་བཅིངས་བཀྲོལ་དང་། མང་གཙོ་བཅོས་བསྒྱུར། འགྲོ་བ་མིའི་ཐོབ་ཐང་། ཆོས་དད་རང་དབང་སོགས་ཡར་རྒྱས་བཏང་ཡོད་པ་མ་ཟད། བོད་ཞིང་བྲན་རིང་ལུགས་ནས་བདེ་སྐྱིད་ལྡན་པའི་སྤྱི་ཚོགས་རིང་ལུགས་ཀྱི་སྤྱི་ཚོགས་སུ་བསྒྱུར་ཡོད། ཅེས་བཤད་ཀྱི་ཡོད། དེ་འདྲ་ཡིན་ན་ཅིའི་ཕྱིར་གློ་བུར་དུ་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་ཞིག་འབད་པ་ཆེན་པོས་འཛུགས་སྐྲུན་བྱེད་དགོས་ཞེས་བཤད་དགོས་རེད་དམ། འདས་པའི་ལོ་ངོ་ ༧༠ རིང་བོད་བདེ་སྐྱིད་ལྡན་པའི་སྤྱི་ཚོགས་རིང་ལུགས་ཀྱི་སྤྱི་ཚོགས་སུ་བསྒྱུར་ཡོད། ཅེས་བཤད་པ་དེར་ཅི་ཞིག་བྱུང་བ་རེད་དམ། 

ཅིའི་ཕྱིར་མེས་རྒྱལ་གོང་བུ་གཅིག་གྱུར་ལ་སྲུང་སྐྱོབ་དང་། མི་རིགས་མཐུན་སྒྲིལ་ལ་ཤུགས་སྣོན་རྒྱག་རྒྱུ་དེ་གཞི་འཛིན་ས་དང་ཤུགས་འདོན་སར་བརྩི་དགོས། མང་ཚོགས་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་ནང་ཞུགས་རྒྱུར་སྐུལ་སློང་རྒྱ་ཁྱབ་བྱས་ནས། བརྟན་ལྷིང་ལ་སྲུང་སྐྱོང་བྱེད་པའི་སྲ་བརྟན་མཁར་གྱང་ཆགས་པ་བྱ་དགོས། ཞེས་ནན་ཏན་གྱིས་བཤད་དགོས་རེད་དམ། རྒྱ་ནག་དམར་ཤོག་ཚོགས་པས་བོད་ཀྱི་གནད་དོན་དེ་ད་ལྟ་རྒྱལ་སྤྱིའི་གནད་དོན་ཞིག་ཆགས་ཡོད་པར་ངོས་འཛིན་བྱས་ཡོད་པ་མ་ཟད། གནད་དོན་དེས་རྒྱ་ནག་དམར་ཤོག་ཚོགས་པའི་སྟོབས་ཤུགས་ཉམས་རྒུད་དུ་གཏོང་གི་ཡོད་པ་ངོས་འཛིན་བྱས་ཡོད། 

ཕྱི་ལོ་ ༡༩༨༨ ཟླ་ ༦ ཚེས་ ༡༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སི་ཊས་སི་སྦག་ཏུ་ཡོ་རོབ་གྲོས་ཚོགས་སུ་སྩལ་བའི་གསུང་འཕྲིན་ནང་། རྒྱ་ནག་གི་འགོ་ཁྲིད་ཚན་པ་ཁག་གིས་ཁོ་ཚོས་བཙན་བཟུང་བྱས་པའི་ས་སྡེ་ཁག་ཏུ་ལག་བསྟར་བྱེད་པའི་མི་སེར་སྤེལ་ཡུལ་གྱི་རིང་ལུགས་དེ་ནི་ད་ཆ་དུས་ལས་ཡོལ་ཟིན་པ་ཞིག་ཡིན་པ་ངོས་འཛིན་ཐུབ་པ་བྱ་གལ་དང་། དོན་དམ་པའི་མཉམ་སྦྲེལ་ལམ། མཉམ་མཐུན་ནི་དྭངས་བླངས་ཁོ་ནའི་ཐོག་ནས་ཡོང་ཐུབ་ཅིང་། ཕྱོགས་ཁག་ཚང་མའི་འདོད་བློ་ཁེངས་པའི་ཁེ་ཕན་ཞིག་ལ་བརྟེན་ནས་ཡོང་ཐུབ་པ་ཞིག་ཡིན། ཡོ་རོབ་དཔལ་འབྱོར་མཐུན་ཚོགས་ནི་དེ་ལྟར་ཡོང་ཐུབ་པའི་དཔེ་གཞི་གསལ་པོ་ཞིག་ཡིན། ཕྱོགས་གཞན་ཞིག་ནས་བཤད་ན་དྲག་ཤུགས་དེ་དབང་སྒྱུར་གྱི་གཞི་རྩའི་ཐབས་ལམ་དུ་སྤྱོད་པ་དང་། ཕན་ཚུན་དབར་ཡིད་ཆེས་དང་ཁེ་ཕན་མེད་པའི་གནས་ཚུལ་བྱུང་ན་རྒྱལ་ཁབ་བམ། མི་རིགས་གཅིག་ཡིན་རུང་དུམ་བུ་གཉིས་སམ་དེ་ལས་མང་བར་གྱེས་སྲིད། ཅེས་འཁོད་ཡོད།

ཕྱི་ལོ་ ༢༠༠༩ ལོ་ནས་བཟུང་ད་བར་བོད་མི་ ༡༥༤ ཙམ་གྱིས་རྒྱ་ནག་གི་དྲག་གནོན་ཅན་གྱི་སྲིད་བྱུས་ལ་ངོ་རྒོལ་གྱིས་རང་ལུས་མེར་སྲེག་གནང་ཡོད། རྒྱ་ནག་གིས་འདས་པའི་ལོ་ངོ་ ༧༠ རིང་བོད་མི་ཚོར་དྲག་གནོན་དང་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱས་ཡོད། རྒྱ་ནག་གཞུང་གིས་བོད་མིའི་སློབ་གྲྭ་ཁག་ཏུ་བོད་ཡིག་སློབ་ཁྲིད་ཀྱི་སྐད་བརྡའི་ཚབ་ཏུ་རྒྱ་ཡིག་སློབ་ཁྲིད་ཀྱི་སྐད་བརྡ་བེད་སྤྱོད་བྱེད་ཀྱི་ཡོད་པ་དང་། དེ་བཞིན་བོད་མི་རྣམས་ལ་བཙན་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཆོད་གཤོམ་སྟེང་ནས་མར་ཕབ་བཅུག་སྟེ་རྒྱ་ནག་གི་སྲིད་འཛིན་ཞི་ཅིན་ཕིང་གི་པར་ཡར་མཆོད་གཤོམ་སྟེང་འཇོག་འཇུག་གི་ཡོད། རྒྱ་ནག་གཞུང་གིས་བོད་པའི་སློབ་ཕྲུག་རྣམས་བོད་ཀྱི་ཤེས་རིག་གི་བསྟི་གནས་དགོན་སྡེ་ཁག་ཏུ་སློབ་སྦྱོང་དང་ཆོས་ཕྱོགས་ཀྱི་བྱེད་སྒོ་ཁག་ལ་འགྲོ་མི་ཆོག་པ་བཟོས་ཡོད་པ་མ་ཟད། ཐ་ན་དར་ལྕོག་ཀྱང་འཛུགས་མི་ཆོག་པ་བཟོས་ཡོད། 

རྒྱ་ནག་གཞུང་གིས་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཡབ་ཡུམ་བཅས་བཙན་ཁྲིད་བྱས་ཏེ་ད་བར་གར་སོང་ཆ་མེད་དུ་གྱུར་ཡོད། རྒྱ་ནག་གཞུང་གིས་རྒྱ་ནག་དམར་ཤོག་ཚོགས་པའི་རྒྱུག་ཁྱི་པཎ་ཆེན་རིན་པོ་ཆེ་ཞིག་བསྐོ་བཞག་བྱས་ཏེ་བོད་མི་ཚོར་བཙན་གྱིས་བརྩི་བཀུར་བྱེད་འཇུག་གི་ཡོད། འདི་འདྲིའི་གནས་སྟངས་ཤིག་གི་འོག་རྒྱ་ནག་གི་འགོ་ཁྲིད་ཚོས་བོད་མི་ཚོར་རྒྱ་ནག་གཞུང་ལ་ཡིད་ཆེས་དང་བརྩི་བཀུར་ཡོང་བའི་རེ་བ་རྒྱག་ཕོད་དམ། སྤྱི་ཚོགས་བརྟན་ལྷིང་དང་མི་རིགས་མཐུན་སྒྲིལ་ཟེར་བ་མེ་མདའ་དང་དྲག་གནོན་འོག་ཡོང་མི་སྲིད། དེ་ལྟར་ཡོང་དགོས་ན་རྒྱ་ནག་གིས་བོད་མིའི་ཆོས་དང་རིག་གཞུང་ལ་བརྩི་བཀུར་ཞུ་དགོས། 

ཞི་ཅིན་ཕིང་གི་སྲིད་བྱུས་ནི། བོད་བརྒྱུད་ནང་བསྟན་དེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཅན་དུ་འགྱུར་བར་སྐུལ་འདེད་གཏོང་དགོས་ཞེས་པ་དེ་ཡིན་ཞིང་། ཞི་ཅིན་ཕིང་གི་སྲིད་བྱུས་དེས་བོད་མི་ཙམ་མ་ཟད། བོད་བརྒྱུད་ནང་བསྟན་གྱི་རྗེས་འབྲང་བ་ཧི་མ་ལ་ཡ་རི་རྒྱུད་ཀྱི་མི་རིགས་ཡོངས་ལའང་ཕོག་ཐུག་ཆེན་པོ་བཏང་ཡོད། རྒྱལ་སྤྱིའི་ཚོགས་སྡེ་ཁག་གིས་ཀྱང་དེར་མཐའ་གཅིག་ཏུ་ངོ་རྒོལ་བྱེད་ངེས་རེད། སྲིད་བྱུས་དེས་བོད་མིའི་ཆོས་དད་རང་དབང་དང་རྒྱ་ནག་གི་རྩ་ཁྲིམས་གཉིས་ཀ་རྩིས་མེད་རྡོག་རོལ་བཏང་ཡོད། རྒྱ་ནག་གི་ཉིན་རེའི་གསར་འགྱུར་དྲ་ཚིགས་ China Daily སྟེང་ཞི་ཅིན་ཕིང་གིས་བོད་ཀྱི་དབུལ་ཕོངས་སེལ་ཐབས་སུ་ཕྱོགས་ཡོངས་ནས་ལས་དོན་མང་ཙམ་བསྒྲུབ་དགོས་པ་དང་རྒྱབ་སྐྱོར་བྱེད་དགོས་ཞེས་བཤད་པ་དེ་ལུང་འདྲེན་བཀོད་ཡོད། དབུལ་ཕོངས་ངལ་སེལ་གྱི་ཐད་ནས་བཤད་ནའང་བོད་ནི་ལོ་རྒྱུས་ཐོག་ནས་ནམ་ཡང་དབུལ་ཕོངས་ཀྱི་ལུང་པ་ཞིག་མིན།  བོད་མི་ཚོ་རང་ཁ་རང་གསོ་དང་འདོད་ཆུང་ཆོག་ཤེས་བྱས་ནས་འཚོ་བ་བསྐྱལ་ཡོད། 

རྒྱ་ནག་གཞུང་གིས་བོད་ས་ཡོངས་རྫོགས་དབང་སྒྱུར་བྱས་པར་བརྟེན་ཕྱི་ལོ་ ༡༩༦༡ ནས་ ༡༩༦༤ བར་བོད་ནང་མུ་གེ་ཐེངས་གཅིག་དང་། ཕྱི་ལོ་ ༡༩༦༨ ནས་ ༡༩༧༣ བར་མུ་གེ་ཐེངས་གཅིག་བཅས་ཁྱོན་བོད་ནང་མུ་གེ་ཐེངས་གཉིས་བྱུང་སྟེ་བོད་མི་མང་པོའི་ཚེ་སྲོག་ཤོར་ཡོད། དེར་བརྟེན་ཞི་ཅིན་ཕིང་གིས་དབུལ་ཕོངས་ངལ་སེལ་ག་རེ་སྐོར་བརྗོད་ཀྱི་ཡོད་དམ། 

རྒྱ་ནག་གིས་བོད་དབང་སྒྱུར་མ་བྱས་གོང་བོད་ནང་གཞུང་ལམ་དང་། མེ་འཁོར་ལྕགས་ལམ། གནམ་ཐང་སོགས་མེད་པས་འགྲུལ་བཞུད་དེ་ཙམ་སྟབས་བདེ་མེད་སྲིད། འོང་ཀྱང་བོད་མི་ཚོ་རྟ་ནོར་ལུགས་གསུམ་དང་མཉམ་རང་དབང་གི་སྒོ་ནས་བསྐྱོད་ཀྱི་ཡོད། དེང་སང་རྒྱ་ནག་གིས་བོད་ནང་གང་སར་སོ་ལྟ་པར་ཆས་བཙུགས་ཏེ་རྒྱུན་དུ་བོད་མིའི་ཐོག་སོ་ལྟ་བྱེད་བཞིན་པ་མ་ཟད། བོད་མི་ཚོ་བོད་ནང་ཁུལ་དུའང་ཕར་ཚུར་འགྲོ་འོང་བྱེད་པར་དམ་བསྒྲགས་བྱེད་ཀྱི་ཡོད། ཞི་ཅིན་ཕིང་གི་གཏམ་བཤད་དེས་བོད་དང་རྒྱ་གར་ཙམ་མ་ཟད། ཁྱིམ་མཚེས་རྒྱལ་ཁབ་གཞན་ཚོ་ལའང་བརྡ་ལམ་ངན་པ་ཞིག་བསྟན་ཡོད། རྒྱ་ནག་གིས་བོད་ཀྱི་གནས་མཆོག་གངས་རིན་པོ་ཆེ་དང་མ་ཕམ་གཡུ་མཚོའི་ཁུལ་དུ་དམག་སྒར་བརྒྱབ་པ་དང་སྒྱོགས་མདའི་ས་ཚུགས་བཙུགས་ཡོད། 

གངས་རིན་པོ་ཆེ་ནི་ལྷ་དབང་ཕྱུག་ཆེན་པོའི་གནས་ཡིན་ཞེས་ཧིན་དུ་ཚོས་ཀྱང་གནས་མཆོག་ཏུ་རྩི་ཡི་ཡོད། རྒྱ་གར་དང་རྒྱལ་སྤྱིའི་ཚོགས་སྡེ་ཁག་གིས་བོད་ཀྱི་གནད་དོན་དེ་དཀའ་རྙོག་ཅན་དུ་བལྟ་རྒྱུའི་ཚབ་ཏུ་གནད་དོན་སེལ་བའི་ཐབས་ལམ་ཞིག་ལ་བལྟ་དགོས། བོད་ནི་དུས་རབས་མང་པོ་རིང་རྒྱ་དཀར་ནག་གཉིས་ཀྱི་དབར་བར་གནས་སུ་ཆགས་ཡོད་པ་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཀྱང་མ་འོངས་པར་བོད་ཞི་བདེའི་ས་ཁུལ་ཞིག་ཏུ་བསྒྱུར་རྒྱུ་ཡིན་སྐོར་བཀའ་སྩལ་བ་ལྟར། འཕགས་བོད་ས་མཚམས་སུ་ཞི་བདེ་དང་བརྟན་ལྷིང་ཡོང་བར་ཐབས་ལམ་གཅིག་པུ་ནི་བོད་དེ་ལོ་རྒྱུས་ཐོག་ཞི་བདེའི་ས་ཁུལ་ཡིན་པ་དེ་བསྐྱར་གསོ་བྱེད་དགོས།། 

གོང་གི་རྩོམ་ཡིག་ནང་འཁོད་པའི་བསམ་ཚུལ་རྣམས་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཨརྱ་ཚེ་དབང་རྒྱལ་པོ་ལགས་སྒེར་གྱི་བསམ་ཚུལ་ཡིན་པ་ལས་བོད་མིའི་སྒྲིག་འཛུགས་ཀྱི་བསམ་ཚུལ་ཡིན་པའི་ཁྱབ་པ་མེད། ཕྱི་དྲིལ་བོད་ཡིག་ཚན་པས་མ་རྩོམ་ཨིན་ཡིག་ལས་ཕབ་སྒྱུར་ཞུས་པ་དང་། ཚིག་དོན་ལ་ཧེ་བག་ཡོད་ཚེ་མ་རྩོམ་ཨིན་ཡིག་ལ་རྩ་འཛིན་ཡོང་བ་ཞུ།